JOB 32 - Sumi Naga CL (Re-edited) Bible (BSI)

Elihu no Job Küsami Sakiyi

¹ Ikehu pano küthü ye Job khochilemo no ngove, kughengu pa likhi pau no amikuchou shi auveke.

² Tileno Buzimi Barachel nu Elihu, Ram no bolomi no Job ju axuideve, kughengu pa no Alhou nguno amikuchou shi auveke.

³ Elihu no Job küsami küthü shou ghi axuideve kughengu panongu no Job ye akumou shi anie pi shuphe pülaghi khokichile phumlave ke.

⁴ Elihu ye panoqo nguno ayitiu kehu Job vilo atsa piniye kheae.

⁵ Eno kughou pano küthü kichi lono khokichile kühave keno, Elihu no axuide thuke.

⁶ Elihu no khochile: “Ni ye lhothemi aphi, eno nongu no muchomike; ikehu I kükümsü nongu vilo pinike ni ye amlo tülalo eno msa ake.

⁷ I no kümsü, ‘Kichimi no pi peni, eno xükülayeve kemi no alokütsü shika peni.’

⁸ Ikemu timi lolo anguagha akeu, Akughushuu tuthu huno pa pelo ithikuthulu cheni peke.

⁹ Layemi likhino alotsü anike kumo, momu kichimi likhino kiu no achipi keno ithikuthulu chenike kumoe.

¹⁰ Ikehu I no pi ani, ‘I tsa inilo; ni ghi I kighithi tsa piphenie.’

¹¹ “Nongu no kiu pikepu keno phuju akelo ni ye khelho ghi nongu lokütsü tsapi ini ake.

¹² I no nongu lau amlotsü akelo nongu khumu Job ghechilemo momu pa tsa khochile tsümoe.

¹³ Mthamini ishi pilu nosa, ‘Nino alokütsü phuluvae; timi no kumono Alhou no pa hasüve peni.’

¹⁴ Pa ye nongu külakeu tsa pi ake thono I shou pipuku moe, ikehu ni ye nongu tsa pesü pa khochilemo nani.

¹⁵ “Panongu ye atsa pimla no khochile movae; atsa lakhi mu pikepu kühavae.

¹⁶ Panongu no kiumu khochilemo eno inaqhoi auve akeke imaye ni ye khe auveni keshea?

¹⁷ Ni ghi I sheamzü lo khochileni; eno I kighithi tsa shupheni.

¹⁸ Kughengu ni ye pikepu kütsasa ani eno I ghungu no choha ani.

¹⁹ I mlo ye akichi tsüghave tsükeu hughi toi pukope ani, ahughi lo atsaizü kithe mpaveni ye akeshi ani.

²⁰ Alophalei luve kepushi I mütsü xükhope khochile masavae.

²¹ Ni ye khuu gimu jumo momu akumou lono akishe tsümo nani.

²² Kughengu ni ye akumou lono akishe tsümthae, I no tishi aye I lhoküsüu no kighithe I sawoveni ake.