JOB 31 - Sumi Naga CL (Re-edited) Bible (BSI)

Job Tsapi Kishekha

¹ “I no I nhethi sasü ashoqhi shivae; imaye ni ye kushiye ili lhothe shou jupukuni kea?

² Alhou kunguu küau launo I saje kiu aghini eno Akughushuu launo I mheghi kiu aghi nani kea?

³ Küsakusho ye Alhou kümthami ghenguno, eno kütsakungo keu no alhoksami ghenguno ke kumo?

⁴ Pa ye I laghi ithulu eno I pukhu nepa kümtsü kihi chemo keshea?

⁵ “Tsala I no akimki sasü apukhune lakhishi cheghi, I pukhu no kakashi pishikiqhi lo ilo cheghi aye;

⁶ (I küghape amikucho kimghipu lono huju no Alhou no I kikhi ithilu pelo!)

⁷ tsala I pukhu no ala vepimive, I mlo no I nhethi pape püaghi, eno I u lo axine dapusü aghi aye,

⁸ I no xusükeu kütami no chuve peni eno I lulo pekighi kümtsü abo lono nhüve pelo.

⁹ “Tsala totimi kütami lau I mlo müsü sawu püaghi aye, eno I kisüghüu hukikha ijepe khe püaghi aye,

¹⁰ I nipu pelo kütami qemi kümla shiuve pelo, eno kütami no li shou itsaqi ikuve pelo.

¹¹ Kughengu ti ye aghime tsüküzü kixikila kümlae; ti ye akithipu ghime pesü küghatha tsükeu qhemi,

¹² ti ye Kithimi yeghi kutolo maha iqi tove kepu mi ke, I küakini kümtsü akuhu kutolo pitileve tsükulupu anie.

¹³ “I qepumi eno I qelimi no I lau muchho ighi kelo I no pano vehupu milive püaghi aye,

¹⁴ ni ye Alhou no ipeghi kelo kiu shiveni kea? Pa no kighinikile kelo ni ye kiu pesü khochileni kea?

¹⁵ I za polo I lhophe keu no panoqo ghi lhoke kumo? Eno atita lono ningu mlaphe keu ye Pa no kekumo keshea?

¹⁶ “Tsala kumlhomi no laju chekeu I no süchilelu püaghi, momu chimemi püqapunu püzü anhebo khoivepe aghi aye,

¹⁷ momu mighimi sasü küsajemo no I likhino chu püaghi aye

¹⁸ (kughengu I lhothe lono I no apu shi mighimi saputhu, eno I za polo aphi lono I no chimemi la kiche tsüke),

¹⁹ tsala khuana no aphimini küha kehu thiveni ye aghi, momu aphimini küha kemi I no ithulu püaghi aye,

²⁰ eno pa mlo lono I shikimthilu püaghimo, Iw ambe mhi phimini no pa vapülülu püaghimo aye,

²¹ tsala khagho lo I ngulami ithuluke ghenguno I no mighimi shou I u chho püaghi aye,

²² tileno I naghu lono abi kupuju ijo ipeghive pelo, eno I umlo no I bighi kikime lono ipove pelo.

²³ Kughengu ni ye Alhou no kütsani keu msa ae, Pa kükanguagha pumlani keu msa ake.

²⁴ “Tsala I no ameshoyi pesü I küpkhüpu shipüaghi, momu ameshoyi kivi pesü I mlo kumtopu shipüaghi aye,

²⁵ tsala I küakini no kupukuno shi, momu I u lo angukümgha aghi kehu I lovi püaghi aye,

²⁶ tsala I no khetsünhe momu aqhi no qhivütsünyi akeu jupe

²⁷ tino tuqhouno I mlo züluve eno I u pesü I kichi lo di püzü mümape tsüpüaghi aye,

²⁸ highi akithipu ghime pesü küghatha tsükeu qhemie, kughengu ni ye kungugha Lhou lau akimkiu shiveni cheke.

²⁹ “Tsala I mithi kemi mhekiqipu lo I no alovi püaghi, momu alhoksa no pa theqhive kelo alovi ilhe püaghi aye,

³⁰ (ni ye I kichi pesü pa ghusho pithi keu xine shipüamoe),

³¹ I ki lo küami no, ‘Pa shi-akha no ghapiqi tsümokeu ani kea?’ ipi püaghimo aye,

³² (ni ye shoinami lau I hukikha khaqhitsü ighie; kupokicheu ye alaghila lo zü püamoe),

³³ tsala kütami toi I no I xine küsü püaghi aye, eno I kipimi pesü I mlo lo küsü püaghi aye,

³⁴ ni ye aqokitikhi no cheqhini keu msache kehu, eno I bolomi no thaighani keu kümsa no thüghüi, tino ni ye khalau mu ipemo no inaqhoive cheke.

³⁵ O milakhi nomu I tsa initsü keaye lae! (Iw jemchi hi süve ake Akughushuu no I khochile tsülo!) I külau no I nguku keu tsa yekeu kaku aghinishi nolae!

³⁶ Kuchou no I bighi lono ti xapu no I kütsükuqho shi puni cheke;

³⁷ I küxü ghili kümtsü Alhou lau kihikülai tsüni che, kijemi lakhi toi I no Pa zülo wuni cheke.

³⁸ “Tsala I yeghi no igha I küla ithughi eno tile ayikuqo no qa küqha püaghi aye,

³⁹ tsala I no ame tsümo no tipau lo pekighi chu püaghi eno tipau mpemi no tipa jeku lono aküxü kühave aghi aye,

⁴⁰ Athi züqhulo asahubou ipeghive pelo, eno ashothi züqhulo alupiu ipeghive pelo. Job tsa ye kishekhavae.