JOB 30 - Sumi Naga CL (Re-edited) Bible (BSI)

¹ “Ikemu itehi ye I nguno ayitiuqo no I junu ani, panongu papuqo no I mbeloji kheche keu atsüqo gholo ngonie pikeu ghi ni ye pulo moni cheke.

² Panongu kumto ye kühave ake I ghenguno kiu shitsü luni kea?

³ Akumlho eno akhüava lono panongu ye putho lono ghasüghave lo asükuhu qhaikeu minheju püha cheni;

⁴ vashuniye ngo achhophebo kuhu pesü pano khuna shicheni.

⁵ Panongu ye küpkami hakeshi aqoaho lono hapheve kemie.

⁶ Ikehu azülaki, mkakuki eno atukiqo lo ngo masave cheni.

⁷ Panongu no asüminipho lono igha eno apüghüli lo kütsape ngocheni.

⁸ Kümsükümla amekükühami tianuli ye ayeghi lono hapheve cheni.

⁹ “Ikemu itehi ni ye panoqo tsabo eno pano zükutunupu shiauvae.

¹⁰ Panongu no I jupe aphimqhü eno tsütsüngoju ani; panongu ye I gilo müsü pukuni keu ighü chemoe.

¹¹ Alhou no I kughuchove no I sünheqhive akehu panongu ye I zülo süchile keu kiumu kühavae.

¹² I u ajeu no kütsakungoni kemi loji ithughi no I hapupo ani; eno I leniye aqoghe ghepuku ani.

¹³ Panongu no I la chhuthave tsüno I kütsaqhi nike kuchughu keu lo kütami kukuphu sümono toluvae.

¹⁴ Panongu no aliwo vexü ilo keshi ipaiqike gholono I shou ikiqi ikughie.

¹⁵ Shithüghüi keu no I mhoqhive, I kikhi ye amülhü no fupe wuve ketoi, eno Iw kinikülü ye khüngküsü toi hauvae.

¹⁶ “Itehi I lolo aküxüpu akeu ye puquleve keshivae; shiluküsa tsala no I tsüqü luvae.

¹⁷ Putho tsala no I ghi tsüghüqhi, tsaqhi keu küsü no zühu mlavae.

¹⁸ Alhou no I phiküzü kuokükha lono tsatsai I tsüqüqhi eno aphimini toi ni süchighie.

¹⁹ Pa no aniba lo I vesü no ni ye ayeghimkhu eno ayevu toivae.

²⁰ I no kuphu penike ighamku kemu Nono I khochile moe; I no puthughope animu O nhethi likhino I juke.

²¹ Nono I lau ayiküsa shino O kumto pesü I pishipujue.

²² Nono I pesü amülhü lo vepuku no tino I fupe wuvepe, eno pasapagha kuloghi mta lono I sükujokiji ke.

²³ Kughengu Nono küxümi kümtsü ghenguno kuto püakeu akithi kilo I sawo süniye akeu I no ithi anie.

²⁴ “Ikeghi timi ye itamjui anamu au chhope kuphu penike igha moni keshea?

²⁵ Adoküsa sholupe akemi gholo ni ye mloqa püamo keo? Kumlhomi ghenguno I mlo kughuju shipüamo keshea?

²⁶ Ikemu kughou I no akivi laju akeno alhoksau ighive, eno aküvü khe aye aküzüu ighike.

²⁷ I lolo tubonoli no mqhomzai no khilemu iqüghai mlae; kushuküqha tsala no I sasü kusho niye ighivae.

²⁸ Khetsünhe no kumo, ikemu ni ye tsüngtsüi iqhoiqi cheni; kuho akelo I no puthugho no kuphu penike ighamkue.

²⁹ Ni ye atine thiküzümi, eno ostrichqo gholo kicheu shivae.

³⁰ I yiko no tsübui no ikiqi khavae, eno akülü no I ghi pitiqhi anie.

³¹ I kighilebo no akumlo le phe ani, eno Iw ayihulebo no mloqa chekemi sütsa ilhouvae.