JOB 3 - Sumi Naga CL (Re-edited) Bible (BSI)

Job Kumlo

¹ Tithiu Job no pa kichi xükhope pa punu tsala ghusho.

² Pa no pi:

³ “Khipa tsala lono I punu eno khipa ji lono ‘Anu mishi luvae’ ipi keno tipa tsala hauve pelo.

⁴ Tipa tsala ye aküzü shive pelo! Kungugha Lhou no tipa tsala phuju pemoniu, ti kumono aküvü mu tipau shou yepüvü pemoniu.

⁵ Züchiyi eno aküzü kutho no ti khonha luve peniu, khüngküsü no ti küzüpe zümoi keu tsala no shikichi peniu.

⁶ I mishilu keu ji, aküzü shishoi keu no ti tsüqü luve pelo! Ampe lo atsalaqo gholo ti kihisü pemoniu; aqhi gholomu iloghilu pemoniu.

⁷ Tipa ji pesü anuha shivetsü no alokivi küqa kühave peniu.

⁸ Khunono shixi-shili mili xapu Leviathan xukuthoni ke khecheni keno pano no tipa tsala ghushove peniu.

⁹ Tsükutho yepu no zümoive peniu; aküvü laju anamu ithulu pemoniu, tsütho ipeghi keu ithulu pemoniu,

¹⁰ Kughengu tino I za tita mu khatha luve tsümo, ti kumono I launo aghime pinamu küsüve tsümoke.

¹¹ “Kushiye ni ye apo lono thivemo, punuve kethiu nomu thivemo kea?

¹² Kushiye alukobo lono I khape momu I pini peche kepi lae?

^13-14 Tishiaye, kükami ngo yepemi khunono pano sala akighiki shiqhe kithe keno, ni ghi pano gholo qümüi ihozü eno akulhoqhi aghini che,

¹⁵ momu sakiphemi khunono ameshoyi ngo ghükayi no aki chhitoi ache keno, pano gholo zühuve aghini cheke.

¹⁶ Momu ala lono hauve keu nga no aküvü ithumlave keshi kushiye ni ghi tishive pemo kea?

¹⁷ Tile ye kixikilami no shipüsalu chemo eno kulhokughomi no akulhoqhilu cheni.

¹⁸ Akughumi ghi kümtsa iqüghai ngolu cheni eno akümla kughukütsüu sütsa chilu chemoe.

¹⁹ Kijemi ngo kitilami ghi tile ani, eno aqü-axemi no pano mpeu kütsügha lono ipeghilu cheni.

²⁰ Kushiye kushuküqha ghime sholu kemi lau aküvü tsücheni, eno kukhukimji shikemi lau aküxü tsücheni kea?

²¹ Pano ye akithi khelho chenimu tino ighi chemo, küsü püakeu kinikhuki nguno alau ti chhuju püha cheni.

²² Panongu no akumoki ithulu kelo mzamghalei alovi chenie.

²³ Alhou no timi laghi hekhape küsüve tsüni keghi kushiye aküvü pesü pa tsücheni kea?

²⁴ Kughengu I kumlo no I khuna züqhushi auvae, eno I ghime ghügha no azükuqo toi igha ipeghi ani.

²⁵ Kughengu I no msa chekeu huno I ha ighivae, eno I no ichi-ighü chekeu huno I shou ikughivae.

²⁶ Ni ye iqüghai eno qümüi ngo mlavae, ni ye akulhokiqhi kühano aghime no ighikibe auvae.