JOB 29 - Sumi Naga CL (Re-edited) Bible (BSI)

Job Tsa Shekuho

¹ Itaghi Job no pa tsa pikibe ghi pi:

² “O khaghi Alhou no I hejukuto cheke ghuloki shiaghi penishie,

³ tipa ghuloki loye Pa kulu no I kütsü shou yepe ache, eno I no Pa küvü lono aküzü vechesü wucheke,

⁴ I heagho lo kehu Alhou sasü kuposhu keu no I kibo lo ache,

⁵ Akughushuu no I gholo ache, I tianuli no I sühope ache,

⁶ athachi no I laghi lo qowu che, eno atuqu no I sala thazü qole pipetsü cheke!

⁷ I no aphughi khagho lo ipe no kobidi-a lo iqani ye shi aye,

⁸ apumiqo no ni ithulupe a-a I tsüniye tsüghüve che, muchomiqo no puthughope ngoluve che;

⁹ yepemi no atsa pimove, eno au pesü akichi kujukha luveche;

¹⁰ Gihuküzümi tsa ghi hasüve no pano mili no ataha daluve che.

¹¹ Kughou timi no I ghili chilu eno ni ithulu keno, I vilo akümghaue piche eno amlo kiqishi ni ikhilu che,

¹² kughengu akukuphu küha kemi kumlhomi eno mighimi I no xaphe cheke.

¹³ Thiuve chekemi no I shikimthi eno I no chimemi lopivilu cheke.

¹⁴ I no amikucho phimini pepuche, kuchou xakütha no chijeboike phi eno akütsükükha ke.

¹⁵ Ni ye anhechemi nhethi, apukhu kinitakemi pukhu shiche.

¹⁶ Ni ye kumlhomi papu, ni mtha kemi ghenguno mu puthugho tsünike I no phuche.

¹⁷ I no kixikilami hu helave tsüno pa hu no mkipe akeu pheqhivepe.

¹⁸ Tishino I no kümsü, ‘Ni ye I ki lono thinie, I küxü tsala pesü asaye toi kighisheni,

¹⁹ I kuhu pesü azü küdau qüsüni eno puthotsü atsüzü no I lokaqo lo qipuku peni,

²⁰ I juaje ye xüthilei I gholo anani, eno I süzü no pülhapuju I u lo akitheshi ananie.’

²¹ “Timiqo no I tsa ini eno Iw mijekütsü luniye iqünhei kheche.

²² I no pive kethiu panongu ye piqamoe eno I tsa no panongu pütsa kümtshalu che.

²³ Tsütsüghu khe akeshi panongu no I khelho eno ghixu tsütsüghu mighelu keshi ni ikhilu cheke.

²⁴ Panongu no aghüthisü akelo I no ahumiyi piye aye, I gi küvü no pano lopivi luche.

²⁵ I no atou toi pano la kichetsü, akükau no paw ghüshimi sasü akeshi, eno mloqa akemi lokughuno kütsüu toi I no panongu gholo xücheke.