JOB 28 - Sumi Naga CL (Re-edited) Bible (BSI)

Job: Alokütsü Khile Ani Kea?

¹ “Mtsüqheino ghükayi khuki eno ameshoyi ghukimthe chekeu-a ani.

² Ayeghi lono ayi chhuphe cheni, ayibazü no asapuyi mla cheni.

³ Timi no aküzü shekichi ghi vechesü aküzü kutho tsübui keu-a lo ayibazü phuwu cheni.

⁴ Kicheghüzümi no pülamo keu, timi ghüna lono putou akhila lo panongu no akhuki chhuilo cheni; panongu ye akighi lono tshüqhipe ihi cheni.

⁵ Eno ayeghi ghengu ye, tileno achuqupu ipeghi cheni, ikemu tipau qhou ye ami no pitive keshi acheni.

⁶ Tipa tuqu lono atsüla tu ithulu cheni, tile ghi ameshoyi acheni.

⁷ “Ashikuchu ghau ye tipa la mtha alhuqu nhethi mu ti ithulu mphi.

⁸ Tüghashiqo mu tipa la wumphi, abongshuu mu hecheju mphie.

⁹ “Timi no ayetu chhuphove cheni eno naghuto bophi lono izabide chhupilive cheni.

¹⁰ Atu dolono azü la ghecheni, pa nhethi no amekusho thime kümtsü ithulu cheni.

¹¹ Pa no aghoki qopuwu mono khetha luve püzü küsü püakeu thime ikhiphe cheni.

¹² “Ikemu alokütsü ye khileno phulu nani kea? Vethakulu-a ye khile ani kea?

¹³ Timi ye alokütsü meküa ithi chemoe, ti ye küxümi yeghi lono phulu chemoe.

¹⁴ Akuthoku no pi, ‘Ti ye I gholo kühae,’ eno azüghi no pi, ‘Ti ye I gholo kühae.’

¹⁵ Ameshoyi pesü ti qhümlae, eno ghükayi ye tipau me qhemi ahu shikhamlae.

¹⁶ Ophir meshoyi, onyx, atsülatu namu tipau me qhemi kumoe.

¹⁷ Ameshoyi momu ayina pesü tipau kimghi mlae, momu chiku-chila kivi pesü ti kilive mlae.

¹⁸ Azükhenu ghitu eno akughupu tuqo ye pi akepu kühae; alokütsü ye mlapuchi nguno amekushou ke.

¹⁹ Ethiopia lo aunetu mu tipau qhemi kumo, thakimtheve keu ameshoyi mu ti kimghi mlae.

²⁰ “Tishiaye, alokütsü ye khilau no ighi cheni kea? Vethakulu ye khile acheni kea?

²¹ Ti ye küxümi kümtsü nhethi eno aghauqo launo küsüvae.

²² Kithimi yeghi ngo Akithi no pi, ‘Ti ye uyeu no ni kini lo iloghie.’

²³ “Alhou likhino tipau la ithikuthulu eno tipau-a ithi ani.

²⁴ Kughengu Pa no ayeghi shekha kuto jupuwo no atsütsü qholo akeu kümtsü ithulu cheni.

²⁵ Kughou Pa no aküka pesü amülhü tsü, eno azüghi saje kimghipe kothatsü keno,

²⁶ kughou Pa no tsütsüghu ghenguno azah mlatsü eno tsütsüküsü kukulo laghi kutotsü keno,

²⁷ tileno Pa no alokütsü ithulu eno tipa meküa shuphetsü; Pa no ti iqhikumto eno lhejue.

²⁸ Pa no timi vilo pi, ‘Ampeu sükümsa no alokütsüe, eno alhoksa lono tsüghüve keu no vethakulu ke.’”