JOB 27 - Sumi Naga CL (Re-edited) Bible (BSI)

Job: Ni ye I Kikhi Pekishe Nani

¹ Job no itaghi pa tsapi huthuve no pi:

² “I chipiu luvetsü no I küxü mijimlaive tsükeu Lhou, Akughushuu zülono I no pi ani,

³ I no aküxü ake tivilo eno Alhou tuthu no I nigipe lo ake tivilo,

⁴ I mütsü lono kichile tsa pimoni, I mili no pishikiqhi tsa pimoni.

⁵ Nongu ye achipie pi ni ye khilemu pimo nani; I no thimoke kutolo ni ye I kikhi phevemo nani.

⁶ Ni ye I mikucho tsüqüpe aphi eno ti phevemo nani; I no xüighike I mlo no akipimi I tsülu kepu küha aphie.

⁷ “I ghümi no kixikilami toi apelo, eno I mjochile ithughi akeu no amikuchokumomi toive pelo.

⁸ Kughengu Alhou kümthami ye kughou Alhou no pa küxü ghitha kughukhove tsüni keno paw lajupu ye kiu ani kea?

⁹ Pa lau shiluküsa ighi kelo Alhou ye pa ghügha chilutsü nanima?

¹⁰ Pa ye Akughushuu lau azüvü nanio? Pa ye ado kümtsü lo Pa vilo inikhulu nani kema?

¹¹ Alhou kükakumto ye kiu keno I no nongu shikani; Akughushuu no kiu ani keno I no küsüve moni.

¹² Ikemu nongu kümtsü no ithuluve aghi aye, kushiye adou tsa pi auve akea?

¹³ “Alhou no kixikilami saje kuto püakeu, Akughushuu no nedaqoda chekemi mheghi tsünikeu ye hike:

¹⁴ Pa tianuli no ikowo aghi namu ghüyi lono wonani, pa polo kughuko ye achuqupu lukümkha ithulumo nani.

¹⁵ Pa thisülu kemi ye püsa no shiqho nani eno pa nipuqo no mloqasü tsümo nani.

¹⁶ Pa no ghükayi no ayeghimkhu toi qhepuku püaghi na, tiphimini no aghani toi amoqhe puku püaghi namu,

¹⁷ amikuchomi no ti pepuve nani eno pimimo kemi no ghükayi kijeluve nani.

¹⁸ Thalaxü no aki ghoküna keshi, momu akhemi pushonha toi pa no aki shipüa cheni.

¹⁹ Pa no kinimi shi zühuve namu ti ye süpushu mlae; pa no ithughi kelo pa küakini ye hauve aghi cheni.

²⁰ Shithüghüi keu no züqozü toi pa yimive cheni; putho lono miyitsü no pa fupe wuve cheni.

²¹ Kipela mülhü no pa fuchighi saikuve no hauve nani; tino pa ki lono pa fusaipeve nani.

²² Tino kimiye mono pa shou vepuku kelo pa ye tipau launo shoxashi po nani.

²³ Tino au kukhupe pa tsüno pa-a lono junu nani.