JOB 24 - Sumi Naga CL (Re-edited) Bible (BSI)

¹ “Kushiye Akughushuu ye küghakütha tsala kuto chemo eno kushiye Pa ithi kemi ye khilemu Pa tsala ithulu chemo kea?

² Khami no alughitu ikhi kiqeve cheni; panongu no ambe püka pewo pighi luve cheni.

³ Panongu no mighimiw khurha hasasü wuve cheni; api lomla nosa kehu chimemi mishitsü tshüluve cheni.

⁴ Panongu no kumlhomi kopheve cheni; ikehu kumlhomi ye msa kelauno itshüwu khave cheni.

⁵ Aghalo khurhaqo no asayeqha lo achuqupu phu ketoi kumlhomi no pa tianuli sala qhai-ghoi ke-a lo achuqupu phuwu cheni.

⁶ Panongu no alu lo phekiqhi kiche cheni eno kinimi tsailu lono ashekhau mqo xolu cheni.

⁷ Panongu ye putho lo aphi uzü kepu küha kehu atsala kumko lo pinamu aphi kümsa ihozü cheni.

⁸ Ato lo tsütsüghu ighi kelo panongu zapütsaqhi cheni kehu atuqu dakhoi ije cheni.

⁹ (Khami ye api lomlave keu theli lo mighimi launo akichhelo kupu tianuli ghi lekho pewuve tsü cheni.)

¹⁰ Ikemu kumlhomi ye aphimini küha eno müzüthi qhiyi athi pukishe acheni;

¹¹ panongu no kixikilamiw olive thazü tsüghüphe tsü; eno atsaizü tsüghüphe chenimu tüghüthi acheni.

¹² Aphughi lo aghüzaku kupumi eno thiuche kemi no kuphu lopi igha keghi Alhou no khuu kutokumo mu phüju tsümove.

¹³ “Aküvü laghi ithimo eno ti püla chemo kemi no tipau shou hebide ithughi cheni.

¹⁴ Ghikiqhimi no kumlhomi ngo mighimi pithiveni ye tsüküzü khe cheni, eno putho shive aye pa ye küpkami toike.

¹⁵ Küsalhami nhethi ghi tsüküzü shive penike huqhe acheni, eno agi nhave no ishi picheni, ‘Khumu ni ithulu moae’.

¹⁶ Panongu no putho lono aki vexü ilocheni, puchou ye aki khathape ngove cheni, panongu ye aküvü ithi chemoe.

¹⁷ Kughengu pano müzülo aküzü kutho huno inaqhe ke; pano ye aküzü kutho küighüpu sasü shoupau shicheni.

¹⁸ “Panongu ye azü lono mthüthei yipe wuve cheni; ayeghi lo pano ki-alu saje ye ghushove no khunomu pano tsailu lo humove cheni.

¹⁹ Züha ngo atsala kümgha lo apüghüzü itsüve keshi Kithigha no axine shiche kemi süxaluve cheni.

²⁰ Panongu paza no kümsümave cheni; apithe khuna shive no khunomu pano kümsü lumove cheni, ikehu kixikilami ye asübo toi icheve cheni.

²¹ “Panongu no anuhami sapüsa cheni eno chimemi lau akivi mla chemoe.

²² Ikemu Alhou no Pa küka pesü akumtomi sünheqhi cheni; pano no mtotoi aghimu aküxü iqhikumtolu chemoe.

²³ Pa no sükusho pesü tsükeu lono panongu ye mtotoi luvi, ikemu Pa nhethi no pano küxü jukuto acheni.

²⁴ Ado ikhonhei pano sheqhe anamu pai cheve cheni; aghibo gholuve keshi pano ghi kütami toi gholuve cheni; eno alupi ighüive keu toi xupe wuve chenie.

²⁵ Tsala hitoimo aye, khuu no ni ye akimkiue pi kiqiluni eno I no pi akeu ye abokümsae pi piyelu nani kea?