JOB 23 - Sumi Naga CL (Re-edited) Bible (BSI)

Job: Alhou ye Khile Ania?

¹ Tileno Job no khochile:

² “Ishi ghi I kumchho ye mijimlai ani, I no igha akeghi Alhou u no mishishei qaqhi ani.

³ O khileno Pa phuluni keno ithi keaye I no Pa lakhü-a lomu wuni chekeghi lae!

⁴ I no I vehu pesü Pa zülo kulhuqhi no I kichi kichhishi kigheni cheke.

⁵ Pa no I khochile keu I no ithi eno I vilo pikeu vethaluni cheke.

⁶ Pa küka kumto kuloghi pesü Pa ye I sasü kuxuni keshea? Moe; Pa ye I lau amlotsüni che.

⁷ Tile akümzümi no Pa sasü kütsala eno alhokupuju ghenguno Iw küghaküthau no I tsa xathave tsüniche.

⁸ “I no azüu eno athiu huwoju kemu julo, Pa ye tilau kühae;

⁹ piyiu Pa kümla-a lo, eno ajeu tsüghüju kemu Pa jupühave.

¹⁰ Ikemu Pa ye I no pülache keu la ithi ani kehu kughou Pa no I pejuveni keno ni ye ameshoyi toive nani.

¹¹ I pukhu ye Pa nepa lo nesü chephi; ni ye Pa laghi züsü cheni thono tsüghüsü wuve mphie.

¹² Ni ye Pa no piqhikeu zakütsü qhive mphi; Pa no pikeu tsa no I chuqupu nguno akughupu shicheni.

¹³ Ikemu Pa ye kilive mlae, eno khuu no moe piluni kea? Pa no kiu pulo keno ti shicheni.

¹⁴ Pa no I ghenguno kiu kughu püani keno shikupu nani, eno hitoi keu thime kutomo Pa mlo lo anie.

¹⁵ Tighenguno ni ye Pa zülo ighini ke khokhoshi ani; kughou I no ti kümsü keno ni ye thüghüive cheni.

¹⁶ Alhou no I mlo shipühave tsüae, Akughushuu no I kichiqhivae;

¹⁷ ikeghi aküzü ghenguno ni ye inaqhoive mla momu aküzü kutho no I gi nhaveke ghenguno I hasüve mlae.