JOB 22 - Sumi Naga CL (Re-edited) Bible (BSI)

Eliphaz: Job Kixikila ye Kije

¹ Tithiu Eliphaz no khochile:

² “Timi ye Alhou vehupu shilu nani keshea? Mtsüqheino alokütsümi ghi pa vehupu likhi shilu anie.

³ Nono achipi shiaghi namu tino Akughushuu lopu shilu, momu tukutiye kühakeu no Pa vehupu shiluni keshea?

⁴ Nono Pa sümsake ghenguno Pa ye o sakiyi eno o sasü küghaküthapu lo ilo anie pi kümsü ani keshea?

⁵ O lhoksa ye kütsasa anike kumo? O kipimi ye ashekha kühae.

⁶ O thiküzümi no o lochile mla nosa kehu no ye akumou lono pa phimini xaluve no aphi kümsa qhive cheni.

⁷ No ye azü pesü tüghüthi cheghi kemi piye chemo, müzüthi akemi launo achuqupu süchile luve cheni.

⁸ Ayeghi ye akumtomi sala shive cheni eno pa mlo kuchumi no tile xüuve cheni.

⁹ Nono chimemiw süxaluve no au kümsa shivetsü, eno mighimi chunudaqhi cheni.

¹⁰ Ikehu alichhe no o vehope auvae, züle kümsapu no o mhoqhi ani,

¹¹ o pelo ithulu pemo niye aküzü no ke-i o nhaluvae, eno züqozü no no yimivae.

¹² “Alhou ye kungugha kiqhe-a lo anike kumo? Ayepuqo no kishi chuqumghai ani keno julo!

¹³ Ikeghi nono picheni, ‘Alhou no kiu ithi ani kea? Pa ye aküzü kutho vexü ipe küghathabe luni keshea?

¹⁴ Khüngküsü no shishoi Pa nhape anike Pa ye ithumlae, Pa ye atsütsü kütsüqa lo likhino iqhoiqi achenie.’

¹⁵ No ye kixikilami no püla keu la aqau lo likhi chenani keshea?

¹⁶ Panongu ye pano do tomphi lono süxa pewuve; pano tsükucho ye atshünazü no qope wuveke.

¹⁷ Panongu no Alhou vilo picheni, ‘Ni launo chevelo,’ eno ‘Akughushuu no ningu lau kiu shiluni kea?’

¹⁸ Ikeghi Alhou no thime kivi pesü pano ki shepichhi tsüe, ikemu ni ye kixikilami kükütsü launo putosü anie.

¹⁹ Amikuchomi no ti ithulupe amloqi cheni; eno pimimo kemi no pano junu ghi ishi cheqhi cheni,

²⁰ ‘Mtsüqheino ningu mjochile chekemi ye kütsavae, kütsa khakumo ami no pitivae.’

²¹ “Alhou sasü külashi luvelo, eno iqüghai auvelo; tishianguno o lau akivi ighi nani.

²² Pa kichi lono kütsü-shika keu lulo eno o mlo lo Pa tsa qhilulo.

²³ Nono Akughushuu lau ideighi aye o chukhepuku nani; o ki lono kuchokumo ikhive aye,

²⁴ ameshoyi pesü ayeghimkhu paphishi kihive aye, eno Ophir meshoyi pesü azülaki lo atu gholo peve aye,

²⁵ tileno Akughushuu huno ow ameshoyi ngo akughupu ghükayi shive nani.

²⁶ Kughengu no ye Akughushuu lau o züküvü auve nani eno teqhitelei o gi peqhelu nani.

²⁷ Nono Pa lau akighini shikelo Pa no chilutsü nani eno o shoqhi shikeu shikupulu nani.

²⁸ Nono xatha keu kümtsü o ghenguno shikuputsü nani, o la lo aküvü no yepüvütsü nani.

²⁹ Timi sünheqhi kelo nono picheni, ‘Ti ye aqheküza ghengunoe’, ikemu Pa ye aqhokighemi xalu chenie.

³⁰ Pimive kemiu ghi Pa no xaphelu cheni, o u kimthe vecheo nou ghi xaphe luve nani.”