JOB 21 - Sumi Naga CL (Re-edited) Bible (BSI)

Job: Kixikilami no Pofushi Acheni

¹ Tileno Job no khochile:

² “I tsa initsü alo, eno tinomu nongu lovekughuno lulo.

³ I no pinike kutuu tsülo, tithiu nomu nongu no thaigha alo.

⁴ I ghengu ye, I kumchho hipau ye timi shou keo? Ni ye kushiye kutuu lhove moni kea?

⁵ I jupe apuchopungo no nongu u pesü no kichi kujukha luvelo.

⁶ Kughou I no kümsü luni keno ni ye thüghüive ani, I phi kümtsü süküthüuve anie.

⁷ Kushiye kixikilami no ateasü kutolo xüno mtokithe cheni kea?

⁸ Pano tianuli eno atilimi no pano nhethe lono aküxü boqha mtotoi luve cheni.

⁹ Pano kibo ye akümsapu lono süsholu cheni, eno pano shou Alhou qheküsü ikughi chemoe.

¹⁰ Pano tsüaqu no ati vemlave chemoe, pano mishi no ijomo no ati pitilu cheni.

¹¹ Pano tianuli no ambeti loji toi ili eno phaphashi ilhe cheni.

¹² Amqü, küghaküsü lebo eno fulili küigha alovi ale phecheni.

¹³ Pano küxü tivilo pofushi ache no iqüghai Kithigha lo iqive cheni.

¹⁴ Panongu no Alhou vilo picheni, ‘Ni launo chevelo! Ningu ye O laghi lo checheni keu kighithi lunishi amoe.

¹⁵ Akughushuu ye khuue pi ningu ye Pa qe amasa kea? Pa lau inikhu kelo ningu la kiu shilu nani kea?’

¹⁶ Panongu ye pano ka-agha lono kinikülü shiluke kumo? Ikemu niu ye pano küxü ghola lono putosü pe anie.

¹⁷ “Kixikilami kulu ye ghuthu khije pinheve tsü akea? Momu ghuthu khije küsakusho sholuve akea? Alhou ye ghuthu khije Pa xuide ghi pano ghimeve akea?

¹⁸ Panongu ye ghuthu khije amülhü zülo khauteni toi, eno pasapagha no amuu fupewu ketoive akea?

¹⁹ Nongu no picheni, ‘Alhou no pano kipimi pesü pano tianuli sala qhitsü cheni.’ Ikemu pano pelo ithi penike Pa ye panoqou ghime kepue.

²⁰ Panongu nhethi atho no pano ghime ithulu masae, eno panongu no Akughushuu loghu jukhu ye masae.

²¹ Kughengu pano tsala tove kethiu panongu ye pano kibo ghenguno kiu amlo tsüluni kea?

²² Alhou no kungughami shou ghi küghatha chekeno khuu no akighithi tsa Pa shika luni kea?

²³ Khami ye ashiaji kumto, iqüghai eno sükusho akelono thive cheni,

²⁴ pa philo atha pubeyi eno aghi lo aqü chhitoi apüzü kühave cheni.

²⁵ Kütamiu ye angukümgha michemla no mijimlai thive cheni.

²⁶ Ikemu pamagha aphiphi shi ayeghimkhu lo wove cheni, eno apithe no küzüluve cheni.

²⁷ “I pimi nike nongu no kümsüpu akeu ngo nongu mqü I no ithi ani.

²⁸ Kughengu nongu no, ‘Ajekipimi ki khile ani kea? Kixikilami no achekeu ki khile ani kea?’ ipi cheni.

²⁹ Nongu ye ala lo kicheghüzümi vilo ighiju no panow kichekütsü ikhilumo kea?

³⁰ Tishiaye nongu no kixikilau ye küsakusho lono xaluvae, pa ye aloghu tsala lono xaluvae pi chiluni cheke.

³¹ Khuu no kixikilau gi thepe pa ghili küsa shupheju kea? Pa no mlaveke qhemi khuu no pa tsüchileju kea?

³² Kughou akumo kilo pa sükumo pewuni keno akheu pesü pa kumo jukuto chenipe.

³³ Pa jonha keu yeghi mqo ye pa ghenguno akivie, timi kümtsü pa pape wuve cheni, eno pa züuno wuve aghi kemi ye kihikha kümlapu ke.

³⁴ Imaye kishino nongu ye atsa kümsa pesü I lokughuno tsüni kea? Nonguw khokichile ye alatsa kumo aye kiumu kühavae.