JOB 20 - Sumi Naga CL (Re-edited) Bible (BSI)

Zophar: Kixikilami ye Ime Nani

¹ Tile Zophar no khochile:

² “Tigheno I kükümsü lono khochileni shi I choha anike.

³ Shikithetsü anipi I pipütha keu tsa I no chilu ani, ikehu Iw vethakulu ghungu no I hakilhe auvae.

⁴ Khaghi ayeghi lo timi lhoke lonomu no ye hi mtha keshea?

⁵ Kixikilami lokivi ye ado ikholo, Alhou kümthami mlokiqi ye asüchedo lakhi likhie.

⁶ Pa kivi no qheiku atsütsü tove aghina pa kütsü no iku khüngküsü cholu aghi namu,

⁷ pa ye alhokupuju ghenguno pa ba toi hauve nani; pa ithulu püakeqo no, ‘Pa ye khila wuve akea?’ ipi nani.

⁸ Asamo toi pa ye yewuve no phumlave nani, putho lo züxou toi pa hapupove nani.

⁹ Pa ithulu chekemi eno pa ghüna lo küami no pa ithumlave nani.

¹⁰ Pa tianuli no kumlhomi kukuphu phuwu nani, pa u no pa küakini pesü tsüchileve nani.

¹¹ Pa ghi-anhü no alhothe lo küka xapu anamu pa gholono ayeghimkhu ilhouve nani.

¹² “Pa kichi lo alhoksa ghi ngonyi aghi namu, pa no alhoksa pesü pa milibo qholo küsüpüa namu,

¹³ pa no tipau qhinishi mono pa kichi lo müqapu luve namu,

¹⁴ pa chuqupu huno pa ghüve nani; tino pa polo cobraw tüghü toivae.

¹⁵ Pa no küakini munoqhi püakeu itaghi mughule cheni; Alhou no pa kive lono ikhipheve tsü chenie.

¹⁶ Pa no cobraw tüghü müsü nani; tütüghü no pa mighiqhive nani.

¹⁷ Pa ye xüwo akhingozü ngo akichhizüchi ghoki ithulumo nani.

¹⁸ Pa ye pa u ghülono mlaphe keu chumla no tsüchile masave nani; paw lhidikishi lo ala shikulu huye pa lokiqipu shilumo nani.

¹⁹ Kughengu pa no kumlhomi nedaqhi eno jumove; eno pa no shiqhe pukumo keu ki süxaluve tsüke.

²⁰ “Pa lolo kiumu aghaqi qhiyilu chemo kehu pa no pulove keu ye phepupo chemoe.

²¹ Pa no chuve kethiu atachumu achili shichemo; tighenguno paw kinikülü ye süpushumo nani.

²² Pa no tule-pele ililai akelono aveküsapu lo ilove nani; shiluküsa no pa qaluve nani.

²³ Pa po sünhei tsüniye Alhou no pa shou axukighide puwu no tino pa phimpi shou tsüghuqhi nani.

²⁴ Pa no ayi ghünanu zülono poka nani ikemu alazayi piji no pa philo vesüvetsü nani.

²⁵ Tino pa vepilipe pa phi tüxau no ipeghi nani, eno apiji yikümtsü phuphushi keu no pa tithi vepili ipeghi kelo pa ye kichimamave nani.

²⁶ Aküzü kutho no pa küakini ngokhe ani; züleno ami ipeghi no pa pitive nani, eno pa kilo kiu achili aghini keno qhoi pitive nani.

²⁷ Kungugha no pa xine piye nani, ayeghi no pa küla ithughi nani.

²⁸ Pa küakini aghike thaqhü ye züqozü no pewuve keshi, Alhou loghu tsala ighi kelo qhoi sünhe sawuve nani.

²⁹ Alhou no kixikilami saje kuto püakeu, pa mheghi ye hike.