JOB 2 - Sumi Naga CL (Re-edited) Bible (BSI)

Satan no Job Shiaji Shipüsa Tsü

¹ Itaghi kughou kungugha lo küami no AMPEU zülo hekütsü kepu tsala ighi keno Satan ghi panongu gholono AMPEU zülo ngoni ke ighi.

² AMPEU no Satan vilo iniju, “No ye khilano ighi ani kea?” Satan no khochile, “Ni ye ayeghiqha kümtsü huju-woju itsü iqho iqiche no ighi ani.”

³ Tile AMPEU no Satan vilo pi, “No ye I qeu Job shou kümsü pukuju kema? Kughengu pa toi tukutiye kühano müzüchoi kemi, Alhou sükümsa shi xüno alhoksa lono tsüghüve chekemi ayeghi lo kühae. Nono pimhi lono pa kütsave peniye I xukutho kemu pa ye itehi kutolo pa mikucho tsüqüpe aphie.”

⁴ Satan no AMPEU khochile, “Ayiko no ayiko küzüpe akeshi timi ye aküxü aghive aye pa no akeu kümtsü tsüluve nanie.

⁵ Ikemu O u chhope pa phimpi kütsave tsüjulo, pa no O gi thepe ghusho nanike.”

⁶ AMPEU no Satan vilo pi, “Tishiaye pa küxü likhino lutsü moni thono pa pesü o u lo süve tsüae.”

⁷ Ikehu Satan no AMPEU zülono wuve no apiyi küsü lhoksa pesü Job kütsü lono apukhu kutolo qhawove tsü.

⁸ Job ye pa piyi chuxa kepu alitsa tachu pesü ayevu lo ihiuve.

⁹ Tileno pa nipu no pa vilo pi, “Itehi kutolo o mikucho tsüqü peni keshea? Alhou ghushove no thivelo.”

¹⁰ Ikemu pa no li vilo pi, “No ye mbomzümi totimi tsapi toi pi ani. Ningu ye Alhou launo akivi likhi luno alhoksa ye lumoveni keshea?” Hi kümtsü lo Job ye pa kichi lono axine tsa pimoe.

Job Küsami Küthü

¹¹ Kughou Job küsami Temanmi Eliphaz, Shuahmi Bildad, eno Naamahmi Zophar, pano küthü no Job shou alhoksa ikughi keu ghili qhoi chilu keno, panoqo no pa gholo amlosa qhiyi eno alovekughuno tsüniye pütüta-a qhive no avehu kughupe kümtsa ighi.

¹² Panongu no putou no Job ithulu kelo pa ju michi mlave. Tileno panongu no asütsa süqhe no qauve, eno panongu phimini süxüve no ayeghimkhu epe kunguu vepuku püzü panongu kütsü shou ikughipe.

¹³ Panongu no putho pucho atsala tsüni kupuju pa gholo iqave, eno khunomu atsa lakhimu pa vilo pimoe, kughengu pa ghime ye ihulokeu shi panongu no ithulue.