JOB 19 - Sumi Naga CL (Re-edited) Bible (BSI)

Job: I Xachilekuluu ye Xüani

¹ Tile Job no khochile:

² “Nongu ye khitohi I pishipuju eno atsa pesü I chunuqhini kea?

³ Hi ghuthu chighi piqi nongu no I thaighavae; nongu ye I lau akumou shini keu kujomo keo?

⁴ I no küqüve namu ti ye I kipimi.

⁵ Nongu no thebei I nguno akiviu kepi kümsü eno I no thoküghapu shi akeu pesü I küla aghi aye,

⁶ hi ithilo, Alhou no I küghape akumou lo qhivae, eno Pa khame pesü I küzü luvae.

⁷ I no ighamku, ‘Kütsakungo ani!’ ipi kemu I khochile moe; I no kuphu penike igha kemu kuchou xakütha shitsümoe.

⁸ Pa no I pelo wulu pemo niye I la lo atupi yevetsü, eno aküzü pesü I la nhave tsüe.

⁹ Pa no I launo agigihupu xaqhive tsüno I kütsükuqho luve tsüae.

¹⁰ Pa no ala kümtsü lono I heqhike ni ye thiveni ye shivae, eno Iw lajupu ye asübo toi Pa no akuhu lono nhüjovae.

¹¹ Pa no I shou no Pa loghu küiqü eno I pesü Pa ghümi toi kihi ani.

¹² Paw ghüshimi no aqoshi ighi, panoqo no I leniye amoqhe puku eno I ki homxape aghazü shi ani.

¹³ “Pa no I thiküzümi pesü I launo putosüu qhive tsüae, eno khunono ni ithiche keno I launo tüsümi shivae.

¹⁴ I bolomi no I qhivae, I poshumi no I kümsüma khavae.

¹⁵ I kilo shoinami ngo I qelimi no inaghami toi ni kihi ani; pano zülo ni ye tüsümi shi auvae.

¹⁶ I no I qeu ku namu khochilemo, I kimiye tsü penike I kichi lono qhüiniju masavae.

¹⁷ I tuthu kümna huno I nipu kuqhu pupo eno I thiküzü chelimi kutolo I xo kümna tshamlavae.

¹⁸ Itimiu thotsü I jukünatha ani, I no puthugho aye I pipütha anie.

¹⁹ I poshumi no I jupe aphimqhü, eno I no khuno kimiye che keno panoqo no I qhivae.

²⁰ I yiko ngo ashi no I ghi lo tsatsai kime luvae eno ni ye akushukulu akithi lono pojolue.

²¹ O nongu I küsamiqo, I kimiye tsülo, I kimiye tsülo, kughengu Alhou u no I buvae!

²² Kushiye nongu ghi Alhou toi I pishipuju ani kea? Nongu no I phiashi hi ithuluve keghi aghaqi mphi keshea?

²³ “O I tsa yepe qhilu keaye lae! Kaku lo tipaqo yesülu keaye lae!

²⁴ O, ayi yesüta lo ayizü lesü no alhokupuju atuqu lo yepukulu keaye lae!

²⁵ Ikemu I xachilekuluu ye xüani kepi I no ithi ani, eno ashekha lo Pa no ayeghi shou puthugho nanie.

²⁶ I yiko kuchopu hitoi tsaphe pinyive kethiu, I phiashi hipau lono I no Alhou ithulu nanie,

²⁷ Pa no I phivilo aghikeu ni ampi no ithulu nani, tüsümi kumoe ikemu I nhethi no tsaqüi Pa ithulu nani. Ni ye ti huqhe anipi lhouvae!

²⁸ Nongu dolono, ‘Ningu ye kishi pa pishipuju luni kea?’ eno, ‘Pa ghime kuhu aghü ye pa lolono phulu nani’ ipi aye,

²⁹ azüta msa alo, kughengu azüta no Alhou loghu süghi cheni, tishino nongu no küghakütha anie pi ithi nani.