JOB 18 - Sumi Naga CL (Re-edited) Bible (BSI)

Bildad: Alhou no Kixikilami Ghime Cheni

¹ Tileno Bildad no khochile:

² “No ye khitohi atsa hajuni kea? Kümsüju lo, tishino nino pini.

³ Kushiye ningu pesü amishi kimihi shitsü ani kea? Kushiye ningu pesü o zülo anikha paphishi ani kea?

⁴ O xukighide lono o likhi o ghüzave keu ye noke, o ghenguno kütami ye ayeghi hipau phevelo pi keo, ikeo asü-atu ye pa-a lono ikhivelo pi kea?

⁵ “Iyei, küsaküghami kulu ye pinhevetsü cheni eno pa mi mili ye yepüvü chemoe.

⁶ Pa kilo aküvü ye züchiyi eno pa zülo akulu huye inheve nani.

⁷ Pa pukhu küpka kughukhove tsü eno pa ampi no kuchughu keu no pa kuluqhive cheni.

⁸ Kughengu pa pukhu no pa sasü akhame lo kitimeve cheni, eno aqokutho shou checheno tile ikiqive cheni.

⁹ Alichhe no pa phitsü meluve no pa phimpi qhoi meluve cheni.

¹⁰ Pa ghenguno akighi kumkhope küsü püacheni, eno pa ghenguno ala lo alichhe shipe khe cheni.

¹¹ Akümsapu no ala kümtsü lono pa shikichi eno pa haqhi cheni.

¹² Pa kumto ye püqüvae eno amhekiqi no pa püxa nike khe ani.

¹³ Tino pa yiko chuve cheni, akithi nu anoghiu no pa pukhu chuve cheni.

¹⁴ Pa no pükhübe chekeu ki lono pa sünhe sasü akümsapu kükau lau ighi cheni.

¹⁵ Pa kilo khikhi paw kumo keno tipaqo likhi acheni; amichu no pa ki hokümxa kuchopu leküxü püanie.

¹⁶ Pa kuhu no alouno qhaive eno aloka no kunguu no thive cheni.

¹⁷ Pa ghili ye ayeghi lono hauvae, alaghila lo pa juaje küha niae.

¹⁸ Aküvü lono aküzü lo pa hasüve no ayeghi lono hapheve nani.

¹⁹ Pa ye athiu ighini kemi pa polo kughukomi kühave nani, pa no acheke-a lo ghükulumi lakhimu aghimoae.

²⁰ Kulolaumi no pa ghili chilupe apuchopungovae, eno akümsa no kipelaumi shithüghüivae.

²¹ Mtsüqheino küsaküghami eno Alhou kümthami küxü ye hitoie.