JOB 17 - Sumi Naga CL (Re-edited) Bible (BSI)

Job: Iw Lajupu Khile ania?

¹ I nguagha ye kubolevae; I tsala ye ghitha kughukhovae, akumo kilive no kutope I khe ani.

² Mtsüqheino thoküghami I phivilo ani, panoqo no xukutho akeu I nhethi no juani.

³ “I ghenguno ashoqhi shitsülo; khuu no I xaphelu kepu me tsüve tsüluni kea?

⁴ Nono panow vethakulu mlo khavetsü akehu No ye pano pelo tolu pemo nani.

⁵ Khuu no aküsami nhemgha luve niye pa thechuni keno pa tianuli nhethi ye icheve nani.

⁶ “Pa no I küghape timiqow küghakichepu shivetsü, eno ni ye kümtsü no müsüte kepu timi lakhi shivae.

⁷ I nhethi ye amloghuju lono zamemeivae, I phiau no yekükhü toi hauvae.

⁸ Akümzümi no hipau jupe apuchopungo eno pimimo kemi no Alhou kümthami shou axuide ithughi ani.

⁹ Tishimu, amikuchomi ye pa laghi pheve chemo, khunono au mithe ani keno pano no alau mtokithe chenie.

¹⁰ Ikemu itaghi nongu kümtsü no pükapütsaju lo, ni ye nongu gholo alokütsümi lakhimu ithuluni chemoe.

¹¹ I tsala ye wovae; I kukughu eno I no laju chekeu ye ipopinyivae.

¹² I küsami no putho pesü puchou shive tsüno picheni: ‘Aküvü ye aküzü phivilo ani.’

¹³ Tsala I no Kithigha pesü I ki shinishi aghi, aküzü lo I züa kuto püaghi,

¹⁴ aqokutho vilo, ‘No ye I pu,’ I tsaqhi akeu pithe vilo, ‘I za’, momu ‘I chepu’ ipi aye,

¹⁵ Iw lajupu ye khile ani kea? Khuu no Iw lajupu ithulu nania?

¹⁶ Ti ye Kithigha khagho lo iqi nanio? I sasü ayeghimkhu lo ideiqive nani keshea?