JOB 16 - Sumi Naga CL (Re-edited) Bible (BSI)

Job: Nongu ye Aghime Beqatsü Kemi

¹ Tile Job no khochile:

² “Ni ghi hipa tsa kutomo chiluva; nongu ye aghimepu pesü timi lokughunotsü chekemie.

³ Amülhü tsa ye ashekuho anima? Ikeo kiu no o xukuthope no ye khochile ani kea?

⁴ Tsala nono I-a lo aghike aye, ni ghi o toi piluni che, atsa kivi chijepe nongu külaqhi eno I kütsü küngüpe nongu tsüni cheke.

⁵ I kichi lono nongu shikumto eno I mütsü kukulo no nongu küsü küghüqü luni cheke.

⁶ “Itehi ye I no atsa pinamu I küsü no iqü luamoe, I no inaqhoive keu no ni ye aloinolu ani keshea?

⁷ Mtsüqheino Alhou no I pepüzüvae, Ni kibolomi kümtsü Nono kütsalevae.

⁸ Nono I süchighipe tino Iw thopi shivae, I yiko no aghi küzüpe I küla ithughivae, tino I gi thepe ashepe shi ani.

⁹ Pa no aloghu lono I süthave no I jumithi, Pa hu tsüghü bubushi eno anhethi xukidepe I juke.

¹⁰ Timi no pano baxa mkupe I ju; I phimo ghi I gimuchu lo ghatsü, eno hekütsüpe I mjochile anie.

¹¹ Pa no I pesü Alhou kümthami eno kixikilami u lo süve tsüae.

¹² Ni ye iqüghai xüache ke Pa no ni hepho kighinyive; I kuo lono tsüqüpe aleqhi shive; I küghape Paw vemijipu shive no;

¹³ Pa süzü kipemi no I boluve. Pa no I michilothi xülevetsü; eno I tithizü no ayeghi lo ijiqighi namu süchileve moe.

¹⁴ Pa no aliwo lakhi shelo lakhi tulailo keshi I vexü iloghi; eno aghütomi toi I shou toluve.

¹⁵ Ni ye kumshophi no I phiküzü shino ayeghimkhu lo ihozü keu no I kumto shi auvae.

¹⁶ Mloqa anipi I gi no huchuyivae, eno I nhebo khoive no aküzü no homxa luvae,

¹⁷ I u pesü kiumu kütsakungo mo, I kighini no tsüghükhüi keghi hitoi I lau shivae.

¹⁸ “O ayeghi, I ji jonhatsü kevilo, I ghügha inaqhoive pe kevilo.

¹⁹ Itehi mu Iw thopi ye kungugha lo ani, I shepe shitsü akeu ye kungugha lo ani.

²⁰ I küsami no I thogha ani; Alhou lau I nhezü piji ani,

²¹ tishino milakhi no pa küsami ghenguno pitsü ketoi, I ghenguno Alhou lau pitsü peni.

²² Kughengu ampe kushuo kumo thiu ni ye ideighi moni keu la lo wuveni ake.