JOB 15 - Sumi Naga CL (Re-edited) Bible (BSI)

Eliphaz: Job ye Alhou Msa chemoe

¹ Tileno Eliphaz no khochile:

² “Alokütsümi ye amülhülo kighithi pesü khochile no kipelau mülhü pesü amlo lo xapu akepu keshea?

³ Pa ye ameküküha tsa lo kütsala, momu pa kivipu shimlani keu tsa lo kighe akepu keshea?

⁴ Ikemu no ye Alhou sükümsa peve no Pa mllani keu lakha ani.

⁵ Kughengu o kipimi no kiu pikepu keno o kipe ani, ikehu no ye amqükini miliu kisheluve akena.

⁶ I no kumono o kichi no akipimi o tsü ani eno o mütsü no o lachile thopi shi ani.

⁷ “Timi dolo o paghi punu kea? Ikeo atoghiqo züuno o lho kea?

⁸ Alhouw tuqhou hoho lo küptsa keu no ye chilu kea? Ikeo, alokütsü botha süpe o sala likhi shiniye kea?

⁹ Ningu no mthakeu kiu nono ithi ani kea? Nino mtsümishei mlakeu no ye kiu vethalu cheni kea?

¹⁰ O pu nguno akichiu layemi eno asa kümpami ni gholo anie.

¹¹ Alhou no o lokughunotsü keu, momu mtshaminhei o pütsa keu o ghenguno tülalo keshea?

¹² Kushiye o mlo no o sawuvepe eno o nhethi xukide ani kea?

¹³ Kushiye o xuide ghi Alhou mjochile eno o kichi lono tipa tsa piphe ani kea?

¹⁴ Timi ye kiue pi pa ye mithe luni kea? Momu totimi no punu kemi khuu no Alhou zülo amikucho shiluni kea?

¹⁵ Ithilo, Alhou ye Pa ghinimi pükhübe chemoe, atsütsü ye Pa zülo tsüghükhüi anike kumoe;

¹⁶ imaye, khuu no aphikümqhüpu eno shiküpsapu keno, azü toi amikuchokumo yeche keu ye kishita akimkheu kelae!

¹⁷ “I no o piyeni ke inilo, I no kiu ithulu püani keno shuphe tsüni

¹⁸ (alokütsümi no pano puasü launo küsüve mono pikeu tsa,

¹⁹ amheghi yeghi panongu tsü eno inaghami ye pano sabide moe).

²⁰ Kixikilami ye pa küxü tivilo aghime lono iju acheni, nedaqoda kemi sala kuto püakeu ghime pa no sholu acheni.

²¹ Pa kini lo thüghüi keu sütsa acheni, alokughuno shi akelono shiküpsami no pa shou leighive cheni.

²² Pa ye aküzü lono ipeghilu nanie pi pülü chemo, pa ye ghüyi lono wonikeu shi amchipu shivae.

²³ Pa no akuaqha lo achuqupu phuwu cheni, Aküzü tsala ye pa milepe ngovae pi pa no ithi ani;

²⁴ amloksa eno kütakihi keu no pa shikichiqhi cheni; akükau no aghü shiniye akeshi tipaqo no pa mhoqhi cheni.

²⁵ Pa no au sükumqo pe Alhou tsüno Akughushuu phimo kehu,

²⁶ pa mlo kuthoshi azüto shishoi keu pesü Pa launo po kehu,

²⁷ atha no pa gi küzüluve eno pa po lo atha no choleve kehu,

²⁸ pighive ke-a lo xüsüve, ixapinyi ngomo kepu kilo küghüna kehu;

²⁹ pa ye kinimi shimo eno pa küakini ye süpushumo, momu ayeghi lo qhawomo nani;

³⁰ pa ye aküzü lono povemla nani; ami no pa khuni pitileve nani, eno Alhou tuthukishe lono pa ye fupe wuve nani.

³¹ Abokümsa shou pükhüpe pa ampi pishiqhipe kevilo, kughengu abokümsa no pa jume shi nanike.

³² Pa do tomphi lono pa ye ighüive no pa loka ye xüthilei mo nani.

³³ Pa ye atsaibo no alothi nimphi lono ighive keshi nani, eno olive sübo no akupu ighive keshi nani.

³⁴ Kughengu Alhou kümthami loji ye anuhami ke, eno külügho lukemi phiki ye ami no pitive nani.

³⁵ Panoqo no alhoksa mishipuve no kixikila punu cheni, eno pano tita huno pishikiqhi iqüphe chenie.