JOB 14 - Sumi Naga CL (Re-edited) Bible (BSI)

Job: Kümtsü lau Akithi Cheni

¹ “Totimi no punu kemi thaqhü ye aveküsa eno alho ikhoke pachie.

² Pa ye axamunu toi pu ipeghi no ighiqive cheni, ngopushu mono yekükhü toi hauve cheni.

³ Hitoi kemi shou O lokümsü shi O sasü atsa kügha anipe keshea?

⁴ Mithekumo lono akimthe thime süghilu nanio? Khumu kühae.

⁵ Pa tsala ye püzüu no kihithavae, aqhi kikihi ye O u lo ani, Nono botha keu pa ye hechemla keke,

⁶ pa launo tsüghüve no pa likhi qhivelo, tishino pa ye aqekiqemi toi aghakiqishi pa do-aghuloki puwolu nani.

⁷ “Asübo ghengu ye lajupu ani, ti yeqhive namu itaghi mini ipeghive no tipa khuni ye khilemu hauve chemoe.

⁸ Tipau kuhu no tekhoi qüilove, eno azüngü no thive aghi namu,

⁹ azü dilu kemtsa tino mini ipeghi eno abo lhothe toi aloka ishe ipeghive cheni.

¹⁰ Ikemu timi ye thive no ayeghi qhou shiqhove cheni; pa tuthu kishekhave kelo pa ye khile acheni kea?

¹¹ Ayizükucho lono azü hauve eno aghoki no qhaive ketoi,

¹² timi no züuve kethiu ye ithughi kithe move cheni; atsütsü no haumoke kutolo pa ye ithughi momu küdaputhu moae.

¹³ O Nono I küghape Kithigha lo küsüve keaye, O loghu kishekha moke kutolo I küghütshüve keaye, eno I ghenguno ado kihitha tsüno I kümsülu tsü keaye lae!

¹⁴ Timi lakhi no thive aye, pa ye xüchilelu nani keshea? Tishike aye I küxü kupuju ime anamu I theli lo ighi moke kutolo ni ye khejuni cheke.

¹⁵ Nono kukelo I no O khochileni che eno No ghi O u no lhokeu junishi khelhoni cheke.

¹⁶ Tishino Nono I pukhune sükiqhe kümtsü jukuto eno I xine kihikülai tsümoni che;

¹⁷ I kipimi ye tsüghape apucho lo ikhisüve tsüno I xine jonhave tsüni cheke.

¹⁸ “Ikemu naghuto no ikiqi ipopinyive eno atuqo no atuxu lono iluqi khave keshi;

¹⁹ azü no atuqo chhephove; eno züqozü no ayeghi chhele pewuve keshi Nono timiw lajupu kütsavetsü cheni.

²⁰ Nono alholo ghenguno pa theqhive no pithive cheni; Nono pa gi kilivetsü no O zülono hapupove cheni.

²¹ Pa nuli no agigihupu ithulu keu pa ye ithi chemo, panoqo shikuloti namu pa ye ithi chemoe.

²² Pa ye pa phimpi lo aküsü akeu likhi ithi cheni eno pa ghengu likhi mloqa chenie.