JOB 13 - Sumi Naga CL (Re-edited) Bible (BSI)

Job: Ni ye Alhou Lajuni aphi

¹ “I nhethi no hi kümtsü ithuluvae, I kini no chilu no vethaluvae.

² Nongu no kiu ithi ani keno ni ghi ithi anike ni ye kiu lonomu nongu qhou kumoe.

³ Ikemu ni ye Akughushuu pütsani, I sheamzü tsa pesü Alhou sasü kigheni ke khelho ani.

⁴ Eno nonguu ye, akimki pesü tsübuikeu lo nuda cheni; nongu ye kümtsü ameküküha shikipivimi kena.

⁵ Nongu no inaqhoi keaye nongu lokütsüpu shiniche keghi lae!

⁶ Itehi I no piputo eno mlominyi qhüiniju akeu tsa ini tsülo.

⁷ Nongu ye Alhou ghenguno alatsa pi eno pishiqhini keshea?

⁸ Nongu ye Pa zülo agijuni kea? Pa zülo atsa küghaluni keshea?

⁹ Pa no nongu lheju kelo nongu ghenguno akivi aghi nanio? Ikeo timi pishiqhi ketoi nongu ye Pa pishiqhilu nani kea?

¹⁰ Nongu no tuqhou no agiju aye, Pa ye mtsüqheino sakiyi nani.

¹¹ Pa kükanguagha no nongu shikümsa eno Pa jupe khokhoshi keu no nongu shou ikughi moni keshea?

¹² Now küghakiche tsaqo ye ami inheilove keu holetsa ke, eno now shokükha tsa ye aniba pesü shokha keu paphie.

¹³ “Iqünhei shilo, eno I no atsa pini, I shou kiu ighini keno ighi pelo.

¹⁴ I küxü pesü I u lono kuthukulho shino ahu nomu mikipe thini.

¹⁵ Pa no I ghiqhive kepu shinamu ni ye Pa laju anani; tishimu ni ye I sheamzü tsa pesü Pa zülo wuni aphie.

¹⁶ Alhou kümthami ye Pa zülo ighi lumo nanie pikeu no I xakulupue.

¹⁷ Tsaqüi I tsa iniju tsüalo eno Iw shukiphe nongu kini lo ilolu pelo.

¹⁸ Ni ye I sheamzü tsa kutope ani, eno ni ye achipie pi I no ithi ani.

¹⁹ Khuana I sasü kigheni keu anio? Aghi aye, I no inaqhoi ngove no thivenie.

²⁰ I kupulo hiküma likhi anike pulo tsülo, tishiaye I no O zülono I peküsüve monie:

²¹ I launo O u gha ikhichile luvelo, eno O jupe khokhoshi keu pesü I shithüghüi kevilo.

²² Tishino I kulo, I no khochileni; momu I pelo atsa piju pelo, eno Nono khochileju lo.

²³ I kipimi I xine ye khije aghi nani kea? Iw hekibide ngo I xine pesü I piputo tsülo.

²⁴ No ye kushiye O gi küsüve no I pesü O ghümi toi kihi ani kea?

²⁵ No ye anipa fupe chekeu shikümsa eno ateni hani keshea?

²⁶ Kughengu Nono kukhukimji tsa I shou yepuku no I pelo I lhothe lo kipimi ighilu anipe.

²⁷ Nono I pukhu lo apukhukhasü sütsü no I laghi jukuto ani; eno I nepa sheniye I phitsü lo amchipu süve tsüae.

²⁸ Ikehu timi huye apithe no aphimini tsaphe keshi tsümavae.