JOB 12 - Sumi Naga CL (Re-edited) Bible (BSI)

Job: AMPEU no Hipau Shike

¹ Tileno Job no khochile:

² “Iyei, timi no nongu tsa ini cheni, nongu no thive aye alokütsü ghi no gholono thive nani.

³ Ikemu ni ghi nongu qhemi vethakulu lokütsü ani; eno kiu lonomu nongu qhou kumoe pikeu khuu kümtha kea?

⁴ I küsami zülo ni ye azükutunupu shivae, Alhou ku kelo Pa no khochile tsüche, achipiu eno atiche kühakeu huye azükutunupu ilhouvae.

⁵ Avesaju mokemi ye amlo lono anguküsami thaigha acheni; Panongu ye nekiphepe veqhiveni kemi khe acheni.

⁶ Küpkami kibo ye iqüghai acheni, khunono Alhou xukuthoni keno pano no sükusho acheni, pano kumto no pano lhou ke.

⁷ “Ikemu tüghashi ngo atsütsü lo aghauqo vilo ighijulo; panongu no o shika no pi nani.

⁸ Ayeghi lo asütsüni ngo azüghi lo akha vilo iniju aye o shika nani.

⁹ Hi ye AMPEU u no mlae pi hipaqo dolo khuu no mthani kea?

¹⁰ Aküxüküa thime kümtsü eno timi kümtsü tuthu ye Pa u lo ani.

¹¹ Ataha no achuqupu michelu ketoi akini no atsa kimchi mlani kea?

¹² Alokütsü ye layemi gholo ani, eno vethakulu kighithi no axükushumi lolo achenie.

¹³ “Alhou gholo alokütsü ngo akumto ani, Pa ye mijekütsü ngo vethakulu ghi ani.

¹⁴ Pa no xaqhive aye khunomu shiqhekithe mlae; Pa no khuana akughu shive aye khunomu khaqhiphe mlae.

¹⁵ Pa no azü khatha luve aye, ayeghi ye qhaive cheni, Pa no phepuwuve aye tino ayeghi yimive cheni.

¹⁶ Akükakumto ngo mtsümishei keu lokütsü ye Pa gholo ani; pishiqhive kemi ngo pishikiqhimi pamagha Paw ke.

¹⁷ Pa no yepemi küka liluve no aphikümsa shivetsü cheni, küghaküthami pesü mbomzümi kughulhove tsü cheni.

¹⁸ Pa no kükami yikichhe kighi kuqhove tsü cheni, eno pano chita lo chighichepu khatsü cheni.

¹⁹ Achinemi phimini chijeboi keu Pa no xavetsü cheni, eno kükagha kipemi ikhive cheni.

²⁰ Timi no pükhübe chekemi tsapi ghasüve cheni eno layemiw kimchikulupu kighithi luvetsü cheni.

²¹ Pa no gihuküzümi shou thoküghapu pukutsü cheni, akumtomi pokha xavetsü cheni.

²² Pa no aküzü lono thonhei keu vehu lhaphetsü cheni eno aküzü kutho pesü aküvü lo saipeghi cheni.

²³ Pa no shiye pesü kije shitsü no itaghi kütsave cheni; Pa no shiye kughukotsü cheni, eno haküghütsüve cheni.

²⁴ Pa no ayeghi lo atomiqo launo vethakulu luve tsüno jedou-a lo ameküküha ghütsü shiuve chenipe.

²⁵ Panongu no aküvü kühano aküzü lo kükaju cheni, Pa no panoqo pesü shokümzümi toi nanashiuve chenipe.