JOB 11 - Sumi Naga CL (Re-edited) Bible (BSI)

Zophar: No ye Alhoksa Ithulu küzüe

¹ Tileno Naamahmi Zophar no khochile:

² “Atsa kichi hijeje khochile move no atsa likhi pi kemi pesü achipiu shive tsüni keshea?

³ Nono akiqi kühakeu tsa zale akeu pesü timi hasüve eno thaigha akelo khunomu o shikujo moni keshea?

⁴ Kughengu nono, ‘I küpülü no tsüghükhüi, eno Alhou nhethe lo ni ye mqhamqhi ani’ ipi anike.

⁵ Ikemu Alhou no Pa kichi xükhope o pütsa penishi nolae,

⁶ Pa ye küsü püakeu lokütsü tsaqo pesü o vilo piniche! Kughengu Pa lokütsü ye aghola kütüta acheni. Ikehu Alhou ye o xine jume nguno akimkheu betsü anie.

⁷ “No ye Alhouw tuqhou thime phuphelu nani kema? No ye Akughushuu ghili ithi khalu nani keshea?

⁸ Tino atsütsü nguno akiqheu keno nono kiu shiluni kea? Kithigha nguno akuthou keno nono kiu ithini kea?

⁹ Tipau mighi kelo ayeghi nguno kushuo eno azüghi nguno kije.

¹⁰ Pa no xuju ighi no khuana akughu shive eno küghaki lo kusü namu khuu no Pa hakha kulupu kea?

¹¹ Kughengu Pa no amekükühami ithi ani; alhoksa ithulu kelo Pa ye kümsü kutoju moni keshea?

¹² Ikemu mbomzümi ye aghasa lo küa khurha no timi pitive kethiu likhino vethakulu lokütsü ithulu nani!

¹³ “Nono o mlo kutope aghi aye, no ye Alhou lau o u chhopuwo nani.

¹⁴ O u lo axine dapusü aghi aye kushuo lo pevelo, küsakügha ye o kibo lo ape kevilo.

¹⁵ Tishiaye mtsüqheino no ye atiche kühano o gi peqhelu nani; no ye msa mono süshokulu anani.

¹⁶ Nono o veküsa kümsümave nani; tipaqo ye züqozü no qowuve ketoi nono kümsülu nani.

¹⁷ O küxü ye puchou nguno vü nani; eno aküzü tsala no inaqhe toi nani.

¹⁸ Lajupu ania kehu nono amlo mtotoi iqüghai akulhoqhilu nani.

¹⁹ Khumu o shikümsa mono no ye zühulu nani eno kutomo no o kukuphu laju ighi nani.

²⁰ Ikemu küsaküghami nhethi ye zamemeive nani; panongu ye pokulupu laghi lakhimu kühave nani, eno pano tuthu kishekha luni keu no panow lajupu shi nani.