JOB 10 - Sumi Naga CL (Re-edited) Bible (BSI)

Job: Alhou Qhüiniju

¹ “Ni ye I küxü ju azüzüvae; ni ye I kumchho kuqhope zale niae; I küxü kukhukimji qhemi lono ni ye atsa piniae.

² I no Alhou vilo pini, Akipimi I tsü kevilo; kushiye I nguku ani keno I pelo ithi pelo.

³ O u lo kümla ye jukünatha, kixikilami kukughu lou azüvü, eno I qoda keu no O pulou kea?

⁴ No ye ashi nhethi ani keshea? No ye timi no ithulu chekeu gholau no ithulu cheni keo?

⁵ O tsala ye timi tsala toi, momu O mpe ye timi mpe toi kesheno

⁶ No ye I kutokumo eno I xine phuju acheni kea?

⁷ Kughengu I no akipimi kühakeu, eno khunomu O u lono xaphemla nikeu Nono ithi ani.

⁸ O u no I koghe mlatsü eno I lho kemu itehi ye Nono I kütsavae.

⁹ Nono aghani pesü I mlaphe keu kümsülu lo, itehi ye I küghape ayeghimkhu lo puwoveni keshea?

¹⁰ Nono akichhizü toi I peleqhi no athachi toi I kughupheke kumo?

¹¹ Nono ayiko ngo ashi pesü I küzü eno aghi anhü pesü I ghoküna ke.

¹² Nono aküxü eno ithamo keu kikimiye pesü I tsü, eno Ow tuchomjokütsü no I nguagha püxüpe qhitsüe.

¹³ Ikeghi Nono thime hipaqo pesü O mlo lo küsüve kehu hi no O kimji shi akenapi I no ithivae.

¹⁴ I no axine shiaye Nono miqe apüzü I xine peve tsümoe.

¹⁵ I no pimive aghi aye I hasapue! I no achipiu lo aghi aye ni ye I kijivile mlae, kughengu ni ye akukujo no chhitoi eno kushuküqha no mhoqhivae.

¹⁶ I kütsü peqhe ithuche aye Nono abongshuu toi I haqhi eno I ghüza niye akümzapu kümlaqo I shou mlae.

¹⁷ Nono Ow thopimi kithe süghi eno I lau O xukighide kighishe cheni; ghüshimi alau I shou süghi cheni.

¹⁸ “No ye kushiye I lhophe kea? Khunomu ni ithumla aphi lono thive aghi keu pavini chekeghi lae,

¹⁹ eno aküxü shimove no apo lono akumo lo ilove keaye lae.

²⁰ I tsala ye ikhonhei ke kumo? Tishiaye ado kitila likhimu I lopiqi lunike I gho shive pelo,

²¹ I no aküzü eno akuthoku yeghi lo wumphi lono alopiqi luni, kughengu ni ye ideighimo ake.

²² Tipau yeghi ye züchiyi aküzü no nhape kübangü keu-a ake, tile ye aküvü ghi aküzü paphie.”