JOB 1 - Sumi Naga CL (Re-edited) Bible (BSI)

Job Küxü Eno Küakini

¹ Khaghi Uz yeghi lo timi lakhi Job ipikeu ache, pa ye tukutiye kühano müzüchoi kemi, Alhou sükümsami eno alhoksa lono tsüghüve chekemi.

² Pa ye ati-anuli kiptimi tsüni eno totimi küthü ache.

³ Tipau gholo ambe 7,000, sayeshi 3,000, alu kümla mishi atüna 500, khurhaqu 500, eno aqemi no kütsasa ache kehu kipela küdaumi gholo aje kijeshi ache.

⁴ Pa nuliqo dolono kivetsüghü ghi pütüta ki lono aghulhu tsüche eno pano chelimi küthü kusü no panongu sasü chusho che.

⁵ Kughou no aghulhu tsalaqo taveni keno, Job no panongu ku puwu no shikimthepe Alhou lau ikhiphe tsüche, pa no inaqhe itheno ithu panongu lakhikhi ghenguno akipti kümllagho shiche. Kughengu pa no piche, “I nuliqo no axine shive no panongu mlo lono Alhou ghushove aghi nosake.” Ikehu pa no alhokuthu hitoi shiche.

Satan Pelo Job Pejupe

⁶ Kughou kungugha lo küami no AMPEU zülo hekütsü kepu tsala ighi keno Satan ghi panongu gholo ighi.

⁷ AMPEU no Satan vilo pi, “No ye khilano ighi ani kea?” Satan no khochile, “Ni ye ayeghiqha kümtsü huju-woju itsü iqho iqiche no ighi ani.”

⁸ Tile AMPEU no Satan vilo pi, “No ye I qeu Job shou kümsü pukuju kema? Kughengu pa toi tukutiye kühano müzüchoi kemi, Alhou sükümsa shi xüno alhoksa lono tsüghüve chekemi ayeghi lo kühae.”

⁹ Ikehu Satan no AMPEU khochile, “Job ye akiqi kühano pimhi lono Alhou sümsani keshea?

¹⁰ Nono pa kibo eno paw pichepighi qhoi putukhave no ala kümtsü lono botha luveke kumo? Pa kümla kümtsü Nono kughuko tsüno pa tsüaqu no ayeghi nhakha luve ake.

¹¹ Ikemu pa pighi shou O u chhopuku julo, pa no O gi thepe ghusho nanike.”

¹² Eno AMPEU no Satan vilo pi, “Tishiaye pa shou o u chhopuku moni thono pa no akeu kümtsü pesü o u lo süve tsüae.” Ikehu Satan no AMPEU zülono wuve.

Satan no Job Nuli eno Küakini Luve

¹³ Ghulo lakhi Job nuliqo no amu anoghiu kilo aghulhu shi atsaizü sho akelono

¹⁴ aghinikishiu no Job lau posü ighi no pi, “Amishi sasü alu hokide eno khurhaqo no tipau phivilo achu mza akelo

¹⁵ paikhavi Sabeami no ighi püzü tipaqo hakholuve no sawovae eno azütakikihi pesü aqemi ghiqhi khave tsüke akushukulu I likhino pokasü o vilo piniye ighilu anie.”

¹⁶ Pa no pi aphi lono aghinikishiu lakhiu ighi no pi, “Atsütsü lono Alhou mi ikiqighi no ambe ngo aqemiqo pitiqhivae, eno I likhino pokasü o vilo piniye ighi anie.”

¹⁷ Pa no pi aphi lono itaghi lakhiu ighive no pi, “Chaldeami no amqo küthüshi ighi no sayeshiqo hakholuve no sawove tsüa eno aqemi ghiqhi khave tsüke akushukulu I likhino pokasü o vilo piniye ighilu anie.”

¹⁸ Pa no pi aphi lono itaghi lakhiu ighive no pi, “O nu anoghiu kilo anuliqo no chusho akelono

¹⁹ asayeqha küdau no pasapagha kije ighi no aki shou fupuku püzü tino ilaqi anuliqo veqa pithivae, eno akushukulu I likhino pokasü o vilo piniye hi ighi anie.”

²⁰ Ikelo Job no puthughove no pa phiküzü süxüve, eno pa kütsü miyeve no sükümsa shi ayeghi lo iqi pishiqhove.

²¹ Pa no pi, “Ni ye I za po lono aphi kümsa ighi, eno aphi kümsa idewove nani. AMPEU no tsüno AMPEU no ikhipe wuvae; AMPEU je shelo.”

²² Hi kümtsü lo Job ye axine shimo momu Alhou ngukumoe.