JEREMIYA 9 - Sumi Naga CL (Re-edited) Bible (BSI)

¹ O, I kütsü no azükikhe, eno I nhethi no azüpuki shi aghike aye, Iw timi ghiqhive keqo ghenguno putho pucho qa ani cheke!

² Asayeqha lo kicheghüzümi kungoki I no aghike aye, ni ye Iw timiqo qhive no tilau wuveni cheke! Kughengu panongu kümtsü küsalhami, pishikiqhi lojimi.

³ Panongu no pano mili pesü asüzü toi sükuho; kuchou no kumono akimkiu no ayeghi lo mtotoi thuwu ani; panongu no axine lakhi lono lakhiu shino Ni ithimo ke, ipi Ampeu no asheshu.

⁴ Kümtsü no pa kisüghümi launo kutokupui lo, eno athiküzümi khuu shoumu pükhübe kevilo, kughengu athiküzümi kümtsü pishikiqhimi ke, eno akisüghümi kümtsü no pishikiqhi shi itsüwu ke.

⁵ Kümtsü no pa kisüghümi pishiqhi, eno khunomu kuchou tsa pimoe; panongu mili pelo akimki tsa pi penike shikae; panongu ye axine shikeno akulhoshi cheni.

⁶ Qhasü keu no veqabe, eno pishikiqhi no veqabe, panongu no Ni ithini ke lachile ipi Ampeu no asheshu.

⁷ Tighenguno aqokitikhi MPEU no ishi piani: “Jualo, I no panongu thakütsüghü eno pejuni, Iw timiqo ghenguno Ni ye kiu shilo pi kea?

⁸ Panongu mili ye akithipu piji toike, tino pishikiqhi tsa picheni; pano kichi loye pano kisüghümi lau külakishi tsa picheni, ikemu pano mlo loye ghüthe shipe khe cheni.

⁹ Hi ghenguno Ni ye panongu ghime moni keo? Shiye hitoi keu shou amkhü lumoni keshea? ipi Ampeu no sheshu.

¹⁰ “I no naghutoqo ghenguno mloqani cheni, eno yenguyi ke-a lo atsüni ghenguno mloni cheni, kughengu tipaqo ye kümsa shive no khunomu katha movae, amishi loji no mzachu keu sütsa chimlavae; atsütsü lo aghau eno tüghashiqo ghi tileno wuvae.

¹¹ Jerusalem ye I no atachu shi kütsaleve nani, tüngtügha kungo-a shinani, Judah lo mishighünaqo ye pighive no küghüve nani.”

¹² Timi khuu no hi vethalu kepu lokütsü ani kea? Khuu pelo hepho piyelu penike Ampeu no pütsa püani kea? Kushiye ayeghi ye asayeqha toi kütsave no khunomu katha mlave akea?

¹³ Ampeu no pi; “Kughengu I no panongu zülo I yezah qhitsü keu panongu no pheve, I sütsa gholumo momu tipau kiqi lono cheche move,

¹⁴ ikemu panongu no kuthovi ghi pano pulou pape wuve eno pano puasüqo no shika ketoi Baal lhouqo pape wuve.

¹⁵ Tighenguno Israel Lhou, aqokitikhi MPEU no ishi piani: Julo, I no khumtsai keu chuqupu pesü timi hipaqo lojini, eno tüghü zü pesü panongu piyeni.

¹⁶ Panongu momu pano puasüqo no ithimo keu shiyeqo gholo I no panongu kuthole puwuveni, eno panongu qhoi pühave moke kutolo I no azütakikihi pano thiu puwuni.”

¹⁷ Aqokitikhi MPEU no ishi piani: “Kümsüju no mloqani kemi totimiqo ku puwulo; shitsami totimi pelo ighi pelo;

¹⁸ panongu pelo mtazü ni ghenguno mlo pelo, tishiaye ni nhethi lono anhezü qoipeghi nani eno ni nhebo lono anhezü qowu nani.

¹⁹ Zion lono akumlo sütsa chilue: Ningu ye kishi pighive akelae! Ningu ye shishe kujovae, kughengu ningu ye ayeghi qhivae, panongu no ni kungo-a xaleqhive tsüae.”

²⁰ O totimiqo, Ampeu tsa inilo, eno nongu kini xükhope Pa tsa chilu lo; nongaqo akumlo lakhi shikalo, akithilo le akisüghümi shikalo.

²¹ Ni lashe lo akithi iloghivae; niw kükakiqo lo iloghivae, tino alaghila lo ni tianuliqo eno kobidi-a lo lhothemiqo shou kütsale ighivae.

²² Pilo, “Ampeu no ishi asheshu ani: ‘Asükumo no aluza lo amishiba toi ikiqi nani, ghilemi thiu aghijini toi nani, khunomu pano hekütsümo nani.’”

²³ Ampeu no ishi piani: “Alokütsümi pelo pa lokütsü lo qhezape kevilo, akumtomi pelo pa kumto lo qhezape kevilo, kinimi pelo pa küakini lo qhezape kevilo,

²⁴ ikemu khuu no qhezani keno pa ye Ni ithi eno vethalu keu lono qheza pelo, kughengu Ni ye ayeghi lo ithamo keu kikimiye, kuchou xakütha, achipiu mikucho peitha cheni. Kughengu thime hipaqo lo I züküvü acheni, ipi Ampeu no asheshu.”

²⁵ “Julo, atsala ye cheni, ipi Ampeu no asheshu, khunono ashi lono aphighüyiko gha keno pano ghime nani

²⁶ Egypt, Judah, Edom, Ammon nuliqo, Moab, asayeqha lo xüküami, acheku lo asa amqo lakhi tsache keqo, shiye hi kümtsü aphighüyiko ghamo keqo, eno Israel kibolomi pano mlo lono aphighüyiko ghamo keqo kümtsü ghime nani.”