JEREMIYA 8 - Sumi Naga CL (Re-edited) Bible (BSI)

¹ “Tipa ghuloki lo, Ampeu no asheshu, Judah kükami ngo kijemi saghi, achinemi ngo tungkupmi saghi, eno Jerusalem lo küxümi saghi kümtsü akumoki lono lhephe nani.

² Tipaqo pesü panongu no kimiye eno huthu chekeu, panongu no pape eno mlla nike phu chekeu khetsünhe, aqhi, eno ayepuqo zülo ikhiphe nani. Tipaqo ye xukumqo momu qhove monani, ikemu amishiba toi ayeghi chhigha shou anani.

³ I no alhoksa kibolomi khile haleve keno tipa-a kümtsü lo ghükulumi aghi keqo ye aküxü nguno akithiu mine nani, ipi Aqokitikhi MPEU no asheshu.

Axine eno Pishikiqhi

⁴ “No ye panongu vilo pilo, Ampeu no ishi piani: Timi no ikiqive kelo ithughi kitheve chenike kumo? Milakhi no vezüve kelo ideighive chenike kumo?

⁵ Imaye kushiye timi hipaqo ye ideighi mono athiu wove kea? Panongu no pishikiqhi tsüqüpe; eno ide ighini keu lachile.

⁶ I no amlokütsü shi ini kemu panongu no achipiu tsa pimoe; khunomu pa lhoksa lono xaide mono pi, ‘Ni ye kiu shive kea?’ Khurshi no shoxashi aghüshiqa lo poilo keshi kümtsü no pütüta la lo wuve.

⁷ Azüghau ghi aghuloki ithi ani, aqhewo, akhalu, eno azüghau ghi ideighini keu do ithi cheni, ikemu Iw timiqo ye Ampeu yezah mthae.

⁸ “Nongu ye kishino, ‘Ningu ye alokütsü, eno Ampeu yezah ye ni gholo ani,’ ipini kea? Ikemu julo, akiyemiw yesüta no akimki shivae.

⁹ Alokütsümi ye shikukujo nani; panongu ye aghüthisüve no meluve nani; julo, panongu no Ampeu tsa milivae, tishiaye panongu gholo kiu lokütsü ani kea?

¹⁰ Tighenguno I no pano nipuqo pesü kütami tsüve nani, eno pano lu pesü leighi kemi tsüve nani, kughengu kitila lono kije kutolo akumou lono ala shiniye alamine ke; tungkupu lono achineu kutolo pishikiqhi kümla shike.

¹¹ Panongu no Iw timiqo zaku küthathai ikhilue, khilehimu külakishi kühamu ‘Külakishi, külakishi,’ ipi cheni.

¹² Kuchhube kümla shive kelo panongu ye kujo keshea? Moe, panongu ye khilemu kujomoe; panongu ye kujoke ye mthae. Ikehu I no pano ghimeke tsala lo, panongu ye ikiqive kemi gholono ikiqive nani, ipi Ampeu no pi.

¹³ I no panongu hekütsü kelo, Ampeu no asheshu, atsaibo lo atsaithi küha nani, mububo lo mubuthi küha nani; anipaqo ghi kimghoive nani, eno I no kiu panongu tsü keno pano launo süwuve nani.”

¹⁴ Kushiye ningu ye iqa aphia? Kumqo lo, ningu aliwo kumto phughiqo ilo no tileno thiveni, kughengu Ampeu ni Alhou no ni pühaveni ke kughuvae, eno tüghü zü pesü ningu piyeni ke tsüvae, kughengu ningu no Ampeu lau axine shiveke.

¹⁵ Ningu no aloino laju, ikemu akivi ighimoe; shikipivi laju, ikemu julo, akümsapu ighie.

¹⁶ “Dan lono khurshiqo no igha keu chilu ani; panongu no ngosü mlano akeu sütsa no ayeghi süküghütha ani. Panongu no mishighüna lo ighi no ayeghi eno tile küakini akeu püghave tsüae.

¹⁷ Julo, I no nongu gholo apighiqo puwuni cheni, zümlani keu athicho pighiqo, panongu no nongu mighi nani,” ipi Ampeu no asheshu.

Jeremiah no Mloqa

¹⁸ I lokivi ye chevae; amloksa I shou ikughi ani; I mlo no aghime shi ani.

¹⁹ Julo, akuaqha lono Iw timi ngaqo no qa ani: “Ampeu ye Zion lo küha keshea? Li kükau ye tile küha keshea?” “Kushiye panongu gholo ajulho eno inaghami lhou julho pesü I xukutho ani kea?”

²⁰ “Ghile tusho wovae, mütsü tusho kishekhavae, ikemu ningu ye xamlavae.”

²¹ Iw timi ngaqo ghüzave keu ye I mlo ghüzavae; Ni ye mlo ani, aghüthi küsü no I sümxa luvae.

²² Gilead lo nukümtshau küha keshea? Tile shikipivimi küha keo? Tishiaye kushiye Iw timi ngaqo shiaji ye athoputho mla kea?