JEREMIYA 7 - Sumi Naga CL (Re-edited) Bible (BSI)

Ayeghi lo Alhoksa

¹ Jeremiah lau Ampeu tsa ighi:

² “Ampeu khagho lo puthugho no hipau tsa pesü asheshu no pilo, nongu Judah lo khaghoqo veche ilo Ampeu mlla chekemi kümtsü Ampeu tsa inilo.

³ Aqokitikhi MPEU, Israel Lhou no ishi piani: Nongu laghi eno no kümla kilive lo, eno I no nongu pelo hile xülupe nani.

⁴ Pishikiqhi tsa hipaqo shou pükhübe kevilo: ‘Hi ye Ampeu chineki, Ampeu chineki, Ampeu chineki ke.’

⁵ “Kughengu kuchou no nongu laghi eno no kümla kilive, lakhino lakhi lau kuchou xakütha shi aye,

⁶ nongu no kachenami, mighimi, chimemi qhasümo, momu hipa-a lono pimimo kemi ji pelemo, eno o ghüzapushi kütami lhouqo pape wumo aye,

⁷ I no khaghi no alholo ghenguno no puasüqo tsüve keu yeghi hipau lo nongu pelo xülupe nani.

⁸ “Julo, nongu no ame küha keu pishikiqhi tsa pükhübe cheni.

⁹ Nongu ye püka, ghiqhi, shupu-salha, akimki shoqhi shi, Baal lau akümllagho tsü, eno nongu no mtha keu kütau lhouqo pape cheni

¹⁰ püzü I je lono kukeu ki hipau lo ighi no I zülo puthugho, eno kuchhube kümla hipaqo shi aniye, ‘Ningu ye xaphe luvae’ ipi cheni keshea?

¹¹ I je lono kukeu ki hipau ye nongu nhethe lo küpkami küghütshü-a shiveni keo? Julo, Ni ampi no hi ithuluvae pi Ampeu no asheshu.

¹² Itehi I no atüghü lo I kungoa shikeu Shiloh lo wulo, tile Iw Israelmi kümla lhoksa ghenguno I no kiu shikeno julo.

¹³ Itehi ye, nongu no hi kümtsü shive kehu, Ampeu no asheshu, I no tamo mithe nongu vilo pi kemu nongu no ini tsümoe, eno nongu ku kemu nongu no khochile moe,

¹⁴ tighenguno I no Shiloh lo mlake toi, nongu no pükhübe chekeu, I je lono kukeu kibo shou eno no puasüqo tsükeu yeghi shou ghi titoi shinani.

¹⁵ I nhethe lono I no Ephraim kughuko kümtsü haphe keshi, no laghami kümtsü haphe nani.

¹⁶ “No ye timi hipaqo ghenguno inikhu kevi, momu ighamku pano züqhushi qhüiniju kevilo, kughengu Ni ye o kighini chilu tsümo nani.

¹⁷ No ye panongu no Judah mishighünaqo lo eno Jerusalem laghila lo kiu shi ani keno ithulu anima?

¹⁸ Atianuliqo no asü kiche cheni, apu noqo no ami shi ani, eno topumiqo no asho kunu ani, atsütsü kükaliu ghenguno mülüike sho mla ani. Panongu no I mlo shikighide tsüniye kütau lhouqo lau atsaizü kümllagho lephe ani.

¹⁹ Panongu ye I xukutho ani keo? ipi Ampeu no asheshu. Hi ye panongu ampi kukujopu shi anike kumo?

²⁰ Tighenguno Ampeu Alhou no ishi piani: I loghu ye a-a hipau lono panongu shou, timi eno tüghashiqo shou, aluza lo asübo eno axathiqo shou lepuku no pitive nani eno khilemu ghapinhe mla nani.”

²¹ Aqokitikhi MPEU, Israel Lhou no ishi piani: “No ghakishi gholo akipti kümllagho süküqha no ashi chulo.

²² I no Egypt yeghi lono panongu saipeghi ke tsala lono Ni ye no puasüqo vilo akipti kümllagho eno aghakishiqo ghili pimo momu azah tsümoe.

²³ Ikemu azakütsü hipau I no panongu tsüe: ‘I sütsa gholulo, tishiaye I no nongu Lhou shinani, eno nongu no Iw timi shinani. I no nongu azah tsükeu la lo chechelo, tishiaye nongu kivipu shinani.’

²⁴ Ikemu panongu ye agholu moe eno akini mu kughopuwo mono alhoksa mlo xapu kuthovi ghi pano gho-apulou lono chewuve, eno azüu chewu mono athiu idewove.

²⁵ No puasüqo no Egypt yeghi lono ipeghike tsala lono ishi kutolo tamo mithe I no tsalakipe I qemi tungkupmi puwue.

²⁶ Ikemu I tsa chiluke kumono panongu kinimu kughopuwo moe, panongu kuo mkamghai kitheve. Panongu ye pano puasüqo nguno alhoksau shive.

²⁷ “Ikehu no ye atsa hi kümtsü panongu vilo pilo, ikemu panongu ye o tsa inimo nani. Nono panongu kunani, ikemu o khochilemo nani.

²⁸ Nono panongu vilo pi nani, ‘Shiye hipau ye pano MPEU Alhou gholu move, eno sakiyi keu ikhilutsü move; kuchou hu pühave; ti ye panongu mütsü lono ikhive.

²⁹ “‘O sa tsave no pevelo; atoghi lono mloqa lo, kughengu Ampeu no Pa loghu lono hipa tiqheli milive no phevae.’

Ghikiqhi Khila

³⁰ “Judah nuliqo no I zülo alhoksa kümla shivae, Ampeu no asheshu. Panongu no I je lono kukeu ki shipixive tsünike kuchhube keu thimeqo ghope qhie.

³¹ Panongu no pano pu-angaqo piti nike I no azah tsümo keu momu I kükümsü lomu küha keu Hinnom Nu Khila Topheth lo qhemghai ke-a mlae.

³² Tighenguno Ampeu no asheshu, atsala cheni, tipa ghuloki lo Topheth, momu Hinnom Nu Khila ipi kumove no Ghikiqhi Khila ipi kunani, kughengu khilehimu a-a kühave keu lono panongu no Topheth lo kithimi shiqho nani.

³³ Timi hipaqo kithi kumo ye aghau chuqupu shinani, eno ayeghi lo tüghashiqo chuqupu shinani, khunomu panongu kichi hapupomo nani.

³⁴ Judah mishighünaqo lo ngo Jerusalem laghila lo akighilhe eno alokivi sütsa, külapuu eno külaliu lokivi sütsa kishekhave tsü nani, kughengu ayeghi ye pighiveni ake.