JEREMIYA 6 - Sumi Naga CL (Re-edited) Bible (BSI)

Jerusalem Mhekiqi cheni

¹ Itshükulupu shi polo, O Benjamin timiqo, Jerusalem lono polulo! Tekoa lo afuko küigha lo, Beth-haccherem lo amchipu peqhelo, kughengu ahuu no kütsakungo kije eno amhekiqi ghawo cheni.

² Zion limi jukivi eno müdüniyi lhokeu I no kütsave nani.

³ Ambekhemi no ambe loji mjochile ighi nani; li hokümxa lo panongu no aphikiqo tshü nani; panongu no pütüta-a lo achu mza nani.

⁴ “Li sasü aghü shinike kutolo; ithulo, ningu puchomta lono leni! Ni hasapuae, atsala ye ilo cheae, avela yekükhü ye kushuo shivae!

⁵ Ithulo, ningu putho lono leni eno li kükaki kütsaveni nolo!”

⁶ Kughengu aqokitikhi MPEU no ishi piani: “Jerusalem khasüni ke asüboqo yeqhi no li homxa amoqhe pukulo. Mishighüna hipau ghime masae; li lolo timi qhasü keu nguno alau kütau kiumu kühae.

⁷ Azükikhe no azü tsüghükhüi qhitsü keshi, li no li lhoksa xüthilei hekütsü cheni; li gholo ngukangugha ngo kütsakungo keu likhi chilu cheni; küsükini ngo azakuqo ye alhokuthu I zülo ani.

⁸ Kütü keu lulo, O Jerusalem, tikumo aye I no o launo tsüghüve nani, o küghape pighive no küghüna mokeu yeghi shive tsü nani.”

⁹ Aqokitikhi MPEU no ishi piani: “Panongu no atsaithi qhoi xoluve keshi Israelmi ghükulumi kümsa shivetsü nani; atsaithi kuxomi toi itaghi tipa lokaqo shou o u belo.”

¹⁰ Ni ye khuno vilo pini eno ghutuni kea? Khunono I tsa chilu tsüni kea? Julo, panongu kini ye ipovae, panongu ye chimla nani; pano ghenguno Ampeu tsa ye atichepu lakhie; pano ye tipau lo azüküvü kühae.

¹¹ Ikehu ni ye Ampeu loghu no chhitoi ani; ni ye ti süchile keu no lhovae. “Alaghila lo atianuliqo shou tipau lepuku lo, eno lhothemi kumqo akeqo shou ghi lepuku lo; akimi anipu gha, kichimi eno kitemi ghi, sasü wuve nani.

¹² Panongu ki-alu eno anipuqo ye qhoi kütamiw shive nani, I no ayeghi lo küxümi shou I u chhopuku nani,” ipi Ampeu no asheshu.

¹³ “Aghulou lono akijeu kutolo achipi kumo lono ala shicheni, tungkupu lono achineu kutolo, kümtsü no pishiqhi cheni.

¹⁴ Panongu no Iw timiqo zaku küthathai ikhilue, khilehimu külakishi kühamu ‘Külakishi, külakishi,’ ipi cheni.

¹⁵ Kuchhube kümla shive kelo panongu ye kujo keshea? Moe, panongu ye khilemu kujomoe; panongu ye kujoke ye mthae. Ikehu I no pano ghimeke tsala lo, panongu ye ikiqive kemi gholono ikiqive nani,” ipi Ampeu no pi.

¹⁶ Ampeu no ishi piani; “Alaghila lo puthugho no julo, khaghi laghiqo ighiju lo eno akivi la khila keno tila chewulo, eno nongu ngulho no akulho qhilu nani. Ikemu panongu no pi, ‘Ningu ye tipa la lo chewu moe.’

¹⁷ I no o shou ghukhemi qhino pi, ‘Tsaqüi afuko ghügha inilo!’ Ikemu panongu no pi, ‘Ningu ye amlo tsümo nani.’

¹⁸ Tighenguno inilo, O shiyeqo, O thopimi, panongu lau kiu shive nani keno ithilo.

¹⁹ O ayeghi, inilo, I no timi hipaqo shou pano mqü lhoksa xathi ghenguno amhekiqi süghini cheni, kughengu panongu no I tsa lo amlo tsümove eno I yezah milive ke.

²⁰ Sheba lono müsüghüta, momu ayeghi putou no axo kivi ighi keu ye I ghenguno kiu avehupu ani kea? O kipti kümllagho ye ikhikümlapu, momu o ghakishi ye I lopu shimlae.

²¹ Ikehu Ampeu no ishi piani: ‘Julo, timiqo pelo küpxalu penike I no apukhu küpsüpu qhitsüni; apu-anu kümtsa, akisüghümi eno akümsami kümtsü pühave nani.’”

²² Ampeu no ishi piani: “Julo, ahuu ghakhu lono timi mqo lakhi cheni, ayeghi sheshu lono shiye kije lakhi xukutho puthu ani.

²³ Panongu no shexilika eno angu kuto ani; panongu ye ayiküsa eno kimiyekini kühae; pano sütsa ye azüghi ghügha toi; O Zion limi, panongu no aghü shiniye kujojo ngoluve keshi khurshi sasü o leniye cheae!”

²⁴ Nino tipau sütsa chiluvae; ningu u ye miqemleivae, totimi no apunu küsü sü akeshi amlo ghime no ni tsüqü luvae.

²⁵ Alulo hu kevi momu alaghila lo cheche kevilo, kughengu ghüshimi u lo azütakikihi ani; aqha kümtsü lo akümsapu ani.

²⁶ O Iw timi ngaqo, yeqhiyephi pepu no ayevu lo ihilo; anu lakhi likhi keu ghenguno mlo ketoi, kukhukimji shi mloqa lo, kughengu züleno hekiqhimi no ningu shou ikughuni cheni.

²⁷ “I no o pelo Iw timiqo ithi no pano laghiqo peju peniye ayi pitiju chekemi toi shivae.

²⁸ Panongu kümtsü kuthovi ghi hebide chekemi, kühakügha shi itsü cheni, panongu ye alazayi eno ayi; kümtsü küsakügha shikemi.

²⁹ Amülhübo no mkamghai fue; ami no aküsayi piti kümlave; ikemu kixikilami ghukimthe mla kehu piti akeu ye adou shive.

³⁰ Panongu pesü kileve keu ghükayi ipi kue; kughengu Ampeu no pano milive ke.”