JEREMIYA 52 - Sumi Naga CL (Re-edited) Bible (BSI)

Jerusalem Ikiqive

¹ Zedekiah ye ampe muku lakhi shi akelono akükau shilu eno pa ye Jerusalem lo ampe chighiqhaqhi ayepe. Pa za ye Libnahmi Jeremiah nga Hamutal.

² Jehoiakim no shike toi pa ye Ampeu zülo kiu no alhoksa keno ti kümtsü shike.

³ Kughengu Ampeu mlo kighide ghenguno Pa no Jerusalem ngo Judah lo küami Pa zülono hapheve. Eno Zedekiah no Babylon kükau hebide thuve.

⁴ Zedekiah yepe mpe atokuu, aqhi achighiu, atsala achighiu lono Nebuchadnezzar no paw ghüshimi kümtsü sasü ighi no Jerusalem leighi no khasü luve. Panongu no aqoghe shipukuve.

⁵ Eno Zedekiah yepe mpe chighiaqhaqhiu kutolo aphughi khasüve.

⁶ Aqhi abidiu atsala atokuu lo aphughi lo püqümiye akumou shive no timiqo ye achuqupu kühave.

⁷ Tileno aliwo hepho iloghive, eno ghüshimi kümtsü no akükau ghutu phivilo khagho küdau atupikiye kini dolono ipeve no putho lono aphughi lono kuhakive Arabah küdau wuve. Eno Chaldeami no aphughi homxa luve.

⁸ Ikemu Chaldea ghüshimi no akükau hasü wuno Jericho lo aqa yeghi lono küghaluve, paw ghüshimi kümtsü apanagha pa launo pove.

⁹ Panongu no akükau küghape Hamath yeghi lo Riblah lo Babylon kükau lau saghi, tileno Zedekiah shou amakho beve.

¹⁰ Babylon kükau no Zedekiah nhethe lono pa nuliqo ghiqhi khavetsü eno Riblah lono Judah hiyampemi kümtsü pithive tsü.

¹¹ Tishino pa no Zedekiah nhethi chixejove tsüno ayikichhe no pa tshüpe Babylon lo sawuve, eno pa kithi tsala tomoke kutolo akughuki lo qhive.

Achineki Pitive

¹² Babylon kükau Nebuchadnezzar yepe mpe chighiatokuu, aqhi apunguu atsala achighiu lono aghukhemi shou kepten Nebuzaradan no Jerusalem lo iloghi.

¹³ Pa no Ampeu ki, kükaki eno Jerusalem lo aki kümtsü pitive tsü; aki kijeje thaqhü pa no pitive tsü.

¹⁴ Chaldea ghüshimi khunoqo kepten gholo chekeno, panongu no Jerusalem liwo kümtsü hephove tsü.

¹⁵ Nebuzaradan no kumlhomi, aphughi lo timi achili akeqo, Babylon kükau lau pove keqo, eno akümla kishimi küghape wuve.

¹⁶ Ikemu pa no aghakhu lo ighono kumlhomi khami atsailu ngo alu chi penike qhive.

¹⁷ Chaldeami no Ampeu kilo alazayi tsükucho, ghokepu khache, alazayi zübohuqo hephove tsü, eno alazayi ye Babylon lo pewove.

¹⁸ Panongu no achineki lo peitha chekeu kümtsü pewuve tsü: ali, sholepu, ami pinhe chekeu ayikuqho, müsüghüta khu, alazayi bohu,

¹⁹ abohu aghuloqo, amibo, chithakhu, ayeghi li, akulu kibepu, axokütsüngü kiptibo, atsaiji kümllagho khuqo. Kepten no kiu no ameshoyi no mla keno ameshoyi kiqi lono pewuve, eno ghükayi no ghükayi kiqi lono pewuve.

²⁰ Atsükucho kini, azübohu, amshitsü chighikini azübohu qholo akeu, eno ghokepu khache khikhi akükau Solomon no Ampeu kilo mlape qhikeno, alazayi thime hipaqo ye mighi khamlae.

²¹ Atsükucho ye akiqhelau auxakuchho tache, kuboho kelau no auxakuchho pungu tüxa, eno akishilau no aulotikipshe küthü qhemi, ti ye amta lo kubokhue.

²² Tipau kütsüqa lo alazayi no chopumloi shipe qhie. Chopumloi keu lakhi no akiqhelau auxakuchho kini tüxa eno qhemghai. Chopumloi keu homxape alazayi no ghoküna keu ngo alazayi no khaghatu xathi mla keqo ae. Atsükucho lakhiu ghi titoi ke.

²³ Tipau lo khaghatu lhotoku tsügho no homxa püae; khaghatu kümtsü küqha kelo aqhe eno tipaqo ye ghoküna püae.

Babylon lo Haphe Sawuve

²⁴ Aghukhemi shou kepten no achinetou Seraiah ngo achineu akiniu Zephaniah eno ahukikha khemi küthü sawuve;

²⁵ mishighüna lono pa no ghüshimi zatsüu ngo akükauw kijemi pano tsüni aphughi lo aghi keqo; ghüshimi zatsüu gholo akiyeu timiqo hekütsü chekeu, eno aphughi lo aghi keqo dolo timi lhotsügho sawuve.

²⁶ Nebuzaradan no panoqo küghape Riblah lo Babylon kükau lau saghi.

²⁷ Eno Babylon kükau no Hamath yeghi lo Riblah lono panongu heqhi pithive. Hitoi Judah ye pano yeghi lono haphe sawuve.

²⁸ Nebuchadnezzar no akughumi shi sawuve kemi kikihi: pa küka mpe akütsüniu lono Judah lo timi 3,023;

²⁹ ampe chighiakütacheu lono timi 832 Jerusalem lono sawuve;

³⁰ ampe muku aküthüu lono Nebuzaradan no Judah lo timi 745 sawuve tsü; kümtsü küqha kelo timi 4,600 sawuve tsüe.

Jehoiachin Khaqhiphe

³¹ Jehoiachin kügha sawuve keu mpe shighi akütsüniu, aqhi chighiakiniu, atsala muku akütsüniu lo Babylon kükau Evil-merodach no ka thuke lono Judah kükau Jehoiachin küpüqhiyi khaqhi pheve.

³² Pa no akivishi Jehoiachin pütsa eno Babylon lo kükami akeqo gholo alakhü akiqheu lo iqape.

³³ Ikehu Jehoiachin no akughumi phimini xaqhive, eno tinguno tilau pa ye tsalakipe akükau gholo chusho thuve,

³⁴ eno pa no xüake tivilo tsalakipe vehupu akükau no achipi lono pa tsüche.