JEREMIYA 51 - Sumi Naga CL (Re-edited) Bible (BSI)

Babylon Kütsakungo

¹ Ampeu no ishi piani: “Julo, I no ghikiqhiu ghungu xukuthope Babylon ngo Leb-kamaimi shou puku nani,

² I no Babylon lo amuu fuleche kemi puwu no fuleve nani, küsakusho tsala lo panongu no ako kümtsü lono ighi no li küghüküghaleive tsü nani.

³ Asüzü kipemi pelo apiji kapuwulu kepu do tsü kevilo, aghünanu pepulu kepu do tsü kevilo. Lhothemi püxü kevilo; ghüshimi kümtsü kütsavelo.

⁴ Panongu ye pano yeghi lono, alaghila lo izapusü ikiqive nani.

⁵ Kughengu Alhou, aqokitikhi MPEU ye Israel ngo Judah pheve mphie, ikemu Chaldeami ghakhu ye Israelmiw Akimtheu zülo akipimi likhi ani.

⁶ “Babylon lono povelo; pütüta küxü ghenguno polulo! Babylon xine ghenguno nongu pithive ape kevilo, kughengu hi ye Ampeu mkhükulu süchedo, eno Pa no li lochile anike.

⁷ Babylon ye Ampeu u lo ameshoyi jukhu shiche, tino ayeghiqha kümtsü shomzüve peche; shiyeqo no li tsaiji shomzü; eno küghüzümi toi khavae.

⁸ Babylon ye züleno ikiqive no kütsalevae, li kümsü qalo! Li küsü ghenguno nukümtshau lulo, tinomu li shipivi luvie.

⁹ Ningu no li shipivi niye shie, ikemu li shipivi mlave. Li qhivelo, eno ningu pütüta ghakhu lo wuveni nolo, kughengu li shou küghakütha bekeu ye kungugha tovae.

¹⁰ Ampeu no ni chipiu piye tsüe; ighilo, ningu Zion lono Ampeu ni Lhou kümla sheshuni.

¹¹ “Apijiqo chighilo! Azütoqo ikhilulo! Ampeu no Medes kükamiqo kükümsü xukuthove tsüae, kughengu Pa kimji ye Babylon kütsaveni keue, ti ye Pa chineki ghenguno amkhükulu ke.

¹² “Babylon liwo shou michiphi süqhelo, aghukhe alau iqhikumto lo; aghukhemi süsülo; aghüthepe khe lo; kughengu Ampeu no Babylon ghenguno pi püakeu shi anie.

¹³ O nongu azüghi phivilo kinikülü shi xüche keqo, nongu shekuho ye ighivae; no küxü kighi ye ghithavae.

¹⁴ Aqokitikhi MPEU ampi no ishi ashoqhi shivae: Mtsüqheino I no tülhaqu jehi timi kutomo o lau saghi nani, panongu no nongu shou tokulu ghügha sheshu nani.

¹⁵ “Ampeu no Pa küka lono ayeghi lhoe, Pa lokütsü lono ayeghiqha lhoqhie, eno Paw vethakulu lono kungugha xachhope qhike.

¹⁶ Pa no atsa pi aye, atsütsü lo azü no mqhu ipeghi cheni, Pa no ayeghi shekha no atsüzü ipeghipe cheni. Pa no tsütsüghu ghenguno tsütsüpha mla cheni; Pa no hekütsü püakeu ki lono amülhü süghi cheni.

¹⁷ Timi ye kümtsü anikha eno akighithi kühae; ameshoyi kiyiqiu ye pa julho no shikujove cheni, kughengu pa julhoqo ye kichile eno aküxü kühae.

¹⁸ Tipaqo ye ame küha eno atichepu kümlae; pano ghimeke ghuloki lo panongu ye pühave nani.

¹⁹ Jacob Lhou ye tipaqo toimoe, kughengu Pa no thokha lhoe, Israel ye Pa mheghi shiaye ke, Pa je ye aqokitikhi MPEU.

²⁰ “No ye I yihesü eno I ghünanu, o pesü I no shiyeqo hepho cheni; kükaqhaqo kütsakungo cheni;

²¹ o pesü I no khurshi ngo ti sakicheu hekulu cheni; khurkulu ngo ti sakicheu hephole cheni;

²² o pesü I no kiptimi totimi, kitemi lhothemi, eno apumi ilimi ghitha pinyi cheni;

²³ o pesü I no ambekheu ngo ambe loji, alu kichiu ngo pa lojimi, angh ngo zatsümiqo ghitha pinyi cheni.

²⁴ “Babylon ngo Chaldea lo küami no Zion lo alhoksa shike ghenguno I no nongu nhethe lono lochile nani, Ampeu no sheshu.

²⁵ “O kütsale chekeu naghuto, Ni ye o küla ani, ipi Ampeu no sheshu, nono ayeghi kütsale ke; I no o shou I u chhopuku nani, atuxu lono o kulu piqi nani; eno o pesü pitileve keu naghuto shive tsü nani.

²⁶ Acheku tuqu eno aboqha tuqu lakhimu o launo lumo nani, eno no ye alholo pighive nani ipi Ampeu no sheshu.

²⁷ “Ayeghi lo michiphi süqhelo; shiyeqo dolo afuko küighalo; Babylon lenike shiyeqo kutolo; Ararat, Minni, eno Ashkenaz kükaqhaqo kukütsü lo; sakipheu kishelo eno tülhaqu loji toi khurshiqo saghi lo.

²⁸ Medes kükami, hiyampemi, angh, eno pano qholo akemi kümtsü no le wunike kutolo.

²⁹ Ayeghi no khokhoshi eno aküsü lono ihi ani, kughengu Ampeu kimji Babylon yeghi pesü timi kühano küghüve tsünikeu ye shi ayae.

³⁰ Babylon ghüshimi ye aghü shimono ngovae; panongu ye pano liwo lo ani; pano küka ye hauvae; panongu ye totimi ilhouvae; pano phughi ye ami no piti ani; pano khaduqo ye kubolevae.

³¹ Babylon kükau vilo pa phughi ye ako kümtsü lono leluvae piniye aghinimi lakhi no lakhi lau, atsapemi lakhi no lakhi lau wue;

³² aghoki kakütha-a leluvae, aliwo qogheqo ami no piti ani, eno ghüshimi ye izüvuivae.

³³ Kughengu aqokitikhi MPEU, Israel Lhou no ishi piani: Babylon limi qodaqhi kelo li ye aniqa toive; ikemu ado kitila aghi no li shou ghile hukepu do ighive nani.”

³⁴ “Nebuchadnezzar Babylon kükau no I tsüchuvae; pa no I chunudaqhi; I pesü azühu kümsa akeu toive tsü; eno aghawu toi ni munove; pa no I chuqupu kivi pesü pa po sünhei luve no I puquleve.

³⁵ Zion lo küami no pilo, Ni eno I laghami heqhikeu makho ye Babylon no pu pelo.” Jerusalem no pilo, “Ni ghime ji ye Chaldeami shou iku pelo.”

³⁶ Ikehu Ampeu no ishi piani: “Julo, I no nongu tsa küghatsü eno nongu mkhü lutsüni. I no Babylon züghi eno li züpukiqo qhaive tsüni,

³⁷ Babylon ye atachu shi kütsaleve nani, tüngtügha kungo-a shinani, akümsapu eno thoküghapu-a shino timi küghüna move nani.

³⁸ “Babylon no abongshuu toi, abongshuu tiqo toi igha nani.

³⁹ Panongu no mqhu akelono I no pano ghulhu kutotsü no shokümzüpe alopivi tsü nani, eno alholo küzü zühuvepe nani.

⁴⁰ Ambeti, anetsü eno ambetsü sasü ghikiqhi kilo wuke toi I no panongu pithive nani.

⁴¹ “Ayeghiqha no sheqhe chekeu Babylon ye kishi leve akelae! Shiyeqo zülo Babylon ye akümsa aküighüpu shivae!

⁴² Azüghi fukukucho no Babylon küzüpho luvae.

⁴³ Li phughiqo ye kümsapu, züha eno asayeqha yeghi shivae, khunomu küghüna movae, eno khunomu kathawu movae.

⁴⁴ I no Babylon lhou Bel ghime nani, pa no munove keu ikhipheve tsü nani. Shiyeqo ye pa lau wumoae; Babylon liwo ye ikiqivae.

⁴⁵ “Iw timiqo, tileno ipeve lo! Ampeu loghu lono kümtsü no pütüta küxü xalulo!

⁴⁶ Aghakhu lo uyeu tsa chilu kelo, hipa mpe lo küta tokuu küta chilu kelo, heqhi buqhi keu, yepemi lakhino lakhi sasü aghü shikeu tsa chilu kelo o mlo hauve kevi momu msa kevilo.

⁴⁷ “Julo, I no ajulho kümlla ghimeni keu tsala wocheni; li ghakhu kümtsü shikukujo nani, tile akeqo kümtsü no ikiqi thikhave nani.

⁴⁸ Tileno atsütsü ayeghi eno tile xüküami kümtsü no Babylon ghenguno alovi ale phe nani, kughengu pano kütsaleni kemi ye ahuu no ighi nani, ipi Ampeu no sheshu.

⁴⁹ Babylon ghenguno ayeghiqha no ikiqive ketoi, Babylon ye Israelmi pithi ke ghenguno ikiqive masae;

⁵⁰ “Nongu azütakikihi lono pokalu keqo, povelo, inaqhoi puthughove kevilo! Putou no Ampeu kümsülu lo, eno Jerusalem kümsülu lo:

⁵¹ ‘Ni thogha ke ghenguno ningu ye kujovae; akukujo no ni gi küzü luvae, kughengu inaghami no Ampeu ki alou akimthe-a lo iloghivae.’

⁵² “Ikehu, Ampeu no sheshu, I no li julho shou küghathani keu tsala cheni, li ghakhu kümtsü lo izave kemi no aküsü xapu igha nani.

⁵³ Babylon no atsütsü kutolo iku eno aliwo qoghe shi püaghimu, I no kütsani kemi li lau puwu nani, ipi Ampeu no sheshu.

⁵⁴ “Asütsa lakhi! Babylon lono ighamku ani! Chaldeami yeghi lono kütsale keu ghügha kije ighi ani!

⁵⁵ Kughengu Ampeu no Babylon kütsave ani eno li sütsa kuloghi ghüsüve ani. Pano kumqhu no azüghi toi, eno pano sütsa süqhe ani,

⁵⁶ kughengu ghikiqhiu ye Babylon shou ikughivae; li ghüshimiqo ye leluvae, pano süzüqo hechhe pinyivae, kughengu Ampeu ye lochile chekeu Lhoue, Pa ye mtsüqheino lochile nani.

⁵⁷ I no liw hiyampemi ngo alokütsümi, angh, zatsümi eno ghüshimi shokümzü nani; panongu ye alholo küzü züve no idathughi move nani, Akükau khuu je aqokitikhi MPEU keno Pa no sheshu.

⁵⁸ “Aqokitikhi MPEU no piani: Babylon liwo shishoi keu ye ayeghi lo xaleqhive tsü nani, li khagho qhemghai keqo ye ami no pitile qhive tsü nani. Ashiayeqo no mla chekeu ye adou shive nani, shiyeqo no ime chekeu ye ami no pitive nani.”

⁵⁹ Judah kükau Zedekiah yepe mpe abidiu lo Mahseiah nu Neriah nu Seraiah no Zedekiah sasü Babylon lo wuke lono, tungkupu Jeremiah no Seraiah azah tsükeu tsa, Seraiah ye akükau kilo kijemi.

⁶⁰ Jeremiah no Babylon shou kütsakungo ighi niye akeu kümtsü kaku lo yesüve, atsa hi kümtsü Babylon ghenguno ke.

⁶¹ Pa no Seraiah vilo pi, “Kughou nono Babylon tove keno atsa hi kümtsü phiphe lo,

⁶² eno pilo, ‘O Ampeu, Nono a-a hipau ye kütsave nani, hile timi na lhoxü namu kühave nani, eno alholo küghüve nanie pike.’

⁶³ Kughou nono kaku hipa phiqhiveni keno, atu pesü hipau lo tshü pukuve no Euphrates ghoki lo vesüve lo,

⁶⁴ eno ishi pilo, ‘Babylon ye hitoi pütsüqhive nani, I no li shou kütsakungo süghi niye akeu ghenguno eno ithughi move nani eno panongu kümtsü püghave nani.’” Jeremiah tsa hileno kishekhave ani.