JEREMIYA 50 - Sumi Naga CL (Re-edited) Bible (BSI)

Babylon shou Küghakütha

¹ Ampeu tsa Babylon lo Chaldeami ghenguno Jeremiah lau ighi:

² “Shiyeqo gholo sheshulo, michiphi süqhe no pikülhalo, küsüpe qhikevi no veküphalo: ‘Babylon ye leluvae, Bel ye shikujovae, Merodach ye aghüthi süvae. Li julhoqo ye shikujovae, Li julhoqo ye aghüthi süvae.’

³ “Ahuu no shiye lakhi Babylon lenike ighi ani, tino li pesü küghüve tsü nani, eno khunomu tile küghüna move nani; timi ngo lhoxü kümtsü pove nani.

⁴ “Ampeu no sheshu, tipa ghuloki ighi kelo Israel ngo Judah timi no mloqasü ighi no Ampeu Alhou phu nani.

⁵ Panongu no Zion küdau wukeu la ighiju püzü tilau wu nani. Panongu no pi nani, ‘Ighilo, ningu Ampeu sasü khilemu kümsümave moni keu lhokta puloshoqhi shini.’

⁶ “Iw timiqo ye pühave keu mbeqo toivae. Pano khemi no pano saküghüzüvae eno naghutoqo lo pühave peke. Naghuto lono atoghi lo itsüsü wuve, eno panongu ye pano loji kümsümavae.

⁷ Panoqo ju ithulu kemi kümtsü no panongu kütsakungo eno pano ghümiqo no ishi pi, ‘Panongu ye Ampeu zülo axine shivae, ikehu ningu no panoqo shou kiukiu shinamu akipimi kumoe. Ampeu ye pano puasüqow lajupu eno panongu ghi Pa lau amikucho shi kepushi ake.’

⁸ “Babylon lono povelo, Chaldeami ghakhu lono ipevelo, eno anetsü no aloji zülo ngoke toi shilo.

⁹ Kughengu julo, I no ahuu no akumto shiyeqo hekütsü no Babylon leighi peni. Panongu no Babylon sasü aghü shinike ajoshi kutope ngo nani eno tileno Babylon ye leluve nani. Pano pijiqo ye aghütomi toi eno kapuwu kelo khilemu kümsa ideighi moe.

¹⁰ Chaldea ye xüleve nani; khunono tipau xüleni keno panongu ye aghapiqilu nani, ipi Ampeu no sheshu.

¹¹ “O I mheghi xüpuwuve keqo, nongu no alovi amloqi anamu, amshiti no aluza lo ilhe akeshi, khurshitsü no igha keshi anamu,

¹² shishe o za shikujove nani, li o punuu hu thaighave nani. Julo, Babylon ye shiyeqo gholo ashekhau shive nani, yenguyi, qhaighoi, eno asayeqha ilhouve nani.

¹³ Ampeu loghu ghenguno tile küghüna move nani ikemu ixapinyi qhive nani; ti kathawu kemi no thüghüi eno aghüzaku jukünatha nani.

¹⁴ “Asüzü piqepe akeqo, Babylon lenike homxape ngoluve lo; li kaqhilo eno apiji qhive kevilo, kughengu li ye Ampeu shou axine shivae.

¹⁵ Li sümxape aghüle kulo; Babylon ye qhoi liqhivae; li qoghekiqo ye ikiqivae; liw aliwoqo ye hepholevae. Kughengu hi ye AMPEUw amkhükulue: li shou amkhü lulo, li no shike toi li peitha lo.

¹⁶ Babylon launo apiti kivemi eno ghile lo ayevü kipemi lakhavelo; qhaküsümi zütakikihi msa kelauno kümtsü no pütüta laghami lau eno pütüta ghakhu lo pove nani.

¹⁷ “Israel ye abongshuu no haleve keu mbe toivae. Atüghüshi Assyria kükau no Israel kütsave, eno itehi Babylon kükau Nebuchadnezzar no panoqo saghi tsachheve tsüae.

¹⁸ Tighenguno, aqokitikhi MPEU, Israel Lhou no ishi piani: Julo, I no Assyria kükau ghimeqhi ketoi Babylon kükau Nebuchadnezzar ngo pa ghakhumi ghimeni cheni.

¹⁹ I no atsüni kümtsha-a pesü Israel tsüchile nani, panongu no Carmel ngo Bashan lo pekighi chuqupu chu nani eno panongu no chunishi ke thaqhü Ephraim ngo Gilead lono chulu nani.

²⁰ Tipa ghuloki lo Israel lo kiu xinemu phumla nani eno Judah lo kiu lhoksamu küha nani, kughengu I no khunoqo ghüpe qhive keno, tipaqo xine pevetsü nani.

²¹ “Merathaim ngo Pekod lo akemi le wulo. Panoqo pithi khave eno kütsaleve lo, ipi Ampeu no sheshu, I no azah tsükeu kümtsü shilo.

²² Aghakhu lo aghükishi sütsa eno kütsa keu ghügha ighivae!

²³ Ayeghi yihesü ye kishita ikiqive no kuboleve kelae! Babylon ye kishi shiyeqo zülo jukümsapu shive akelae!

²⁴ O Babylon, I no o ghenguno alichhe shipe o kitime kemu no ye ithimoe; o phuluve eno küghaluvae, kughengu nono Ampeu mjoke.

²⁵ Ampeu no Pa ghünanu ki khaqhi no Pa loghu ghünanu ikhiphevae, kughengu Ampeu aqokitikhi Lhou ye Babylon yeghi lo akümla shikepu ipeghivae.

²⁶ Aqha kümtsü lono li leighilo; eno li biale hepho ilolo; li pesü athi toi xukumqo pe amoqhe no kütsale lo; kiumu qhitsü kevilo.

²⁷ Li mishitsü kümtsü pithivelo; ghikiqhi kilo tipaqo saiqilo. Babylonmi hasapue, kughengu pano ghime ghuloki ighivae.

²⁸ “Asütsa lakhi! Ampeu ni Lhou no Pa chineki ghenguno amkhü luniye akeu Zion lono sheshu nike panongu no Babylon lono pokasü wuvae.

²⁹ “Babylon lenike asüzü kipemi, shexilika piqepe akemi kümtsü kulo. Li sümxape aghazü shilo. Li kümla kiqi lono lochilelo; li no shike toi li lau shilo. Kughengu li no aqheküza shi Ampeu Israel Lhou Akimtheu hebide ke.

³⁰ Ikehu liw apumiqo ye alaghila lono pithive nani eno tipa tsala lo liw ghüshimi kümtsü kütsaleve nani, ipi Ampeu no sheshu.

³¹ “O aqheküzau, I no o le nani; Ampeu aqokitikhi Lhou no piani, o ghimeni keu ghuloki ighivae.

³² Aqheküzami ye küpxape ikiqive nani eno pa sünheqheni kemi küha nani. I no paw mishighünaqo lo ami süvetsü nani, eno tino pa sümxape akeu kümtsü kütsaleve nani.

³³ “Aqokitikhi MPEU no ishi piani: Israel ngo Judah timi ye qodaqhi ani. Pano küghape wu kemi no pano khekuto pe phepuwo chemoe.

³⁴ Ikemu pano Xachilekuluu ye akumtoe; Pa je ye Aqokitikhi MPEU. Mtsüqheino Pa no pano ghenguno pitsü nani; tishikeu lono Pa no ayeghi lo akulhokiqhi süghi nani, ikemu Babylon lau ye aküpüna süghi nani.

³⁵ “Ampeu no sheshu, Babylonmi lo küxümi, liw hiyampemi ngo alokütsümi, Chaldeami shou I no azütakikihi süghi nani!

³⁶ Tumumi shou azütakikihi puku nani, eno panongu ye küghüzümi shive nani! ghüshimi shou azütakikihi puku nani, eno panongu kütsave nani!

³⁷ Khurshi ngo khurkuluqo, eno inaghami ghüshimi li gholo akeqo shou azütakikihi puku nani, eno panongu ye totimi toive nani!

³⁸ Li züghi ye chethovepe nani! Kughengu aghakhu ye ajulho yeghi shivae eno panongu ye ajulho no shiküghüzü auvae.

³⁹ “Tighenguno tüghashi ngo atine eno ostrich no Babylon lo auve nani. Tiqheli kupuju lo tile timi khilemu küghüna move nani.

⁴⁰ Alhou no Sodom ngo Gomorrah eno tipa sükümxa lo mishighünaqo kütsaleve kelo toi milakhimu tile küghüna kithemo nani, ipi Ampeu no sheshu.

⁴¹ “Julo, ahuu no ashiaye cheni; aghacheu no akumto shiye eno kükami kutomo akemi cheni.

⁴² Panongu no shexilika ngo apiji pecheni; panongu ye ayiküsa eno kimiyekini kühae. Pano ghügha ye azüghi toi igha, panongu ye khurshi sacheni, aghüshi kikithi lono kutope o lau cheae, O Babylon limi!

⁴³ “Babylon kükau no tipaqo sütsa chiluvae, pa phiau thizümüivae; amlo ghuju no pa tshüluve no totimi no apunu küsü lo ake toivae.

⁴⁴ “Julo, abongshuu lakhi no Jordan ghasa lono atsüni kümtsha-a lo ipeghi ketoi I no Babylonmi pelo züleno pano yeghi lono povepe nani. Tithiu no I no kishelu keu pelo tipau shou ayepe penani. Kughengu I toike khuu ani kea? Khuu no I khülu nani kea? Ambekheu khuu no I mjolu nani kea?

⁴⁵ Tighenguno Ampeu no Babylon lo küamiqo shou kughu püakeu eno Chaldea lo akemi pesü kiu shiniye kümsüpu ani keno inilo. Pano tianuli kutolo sünhe sawuve nani. Mtsüqheino panongu kümtsü küsakusho lono thüghüive nani.

⁴⁶ Babylon ikiqi keu sütsa chilu kemtsa, ayeghi kümtsü itha nani eno pano küqa no shiye kümtsü no chilu nani.”