JEREMIYA 5 - Sumi Naga CL (Re-edited) Bible (BSI)

Jerusalem no xaideni keu Milive

¹ Jerusalem laghila lo poipe poilo tsaqüi jukuto julo! Achipiu shi eno kuchou phuche kemi lakhimu phuluni mala liw kobidi-a lo phujulo, tishi aye I no li kipimi qhive tsüni.

² Panongu no, “Ampeu xü anike,” ipi anamu, akimki lono tushoqhi cheni.

³ O Ampeu, O nhethi ye kuchou ju cheni ke kumo? Nono panongu ghaqhi kemu panongu ye amloiju moe, Nono panongu chisheqhi keghi panongu ye shikithe moe. Panongu no pano gi pesü atuqu nguno akümkau shive; panongu no xaideni keu milive.

⁴ Ikehu I no pi, “Panongu ye kumlhomi; akükümsü kühae; kughengu panongu ye Ampeu pano Lhou achipiu laghi mthae.

⁵ I no kijemiqo lau wuni eno panongu vilo pini, kughengu panongu ye pano Lhou Ampeu laghi ithi ani.” Ikemu kümtsü no aphiphishi kuokhasü hephove; eno akütsüghaqo kuqhove ke.

⁶ Ikehu abongshuu no aghasü lono panoqo tsüve nani; tüngtügha no asayeqha lono panongu tsüve nani. Akhighiu ngushuu no panow mishighüna jukuto ani; tileno ipeghi kemi kümtsü sülatha pinyiveni cheni, kughengu pano xine ye kütsasae, panow hekibide ye kije ke.

⁷ “Ni ye kishino panongu kipimi qhitsüni kea? No tianuliqo no I kümsümavae eno alhou kumo keqo jeku ashoqhi shivae. I no pano ghakiqipu shi loji kelo panongu no shupu-salha eno küsalhami kilo kumqope ngoe.

⁸ Panongu ye akivishi loji keu ngosükümla khurshi toi, milakhi khino pa kisüghüu nipu jumine cheni.

⁹ Hipaqo ghenguno Ni ye panongu ghime moni keshea? ipi Ampeu no asheshu; eno Ni ye shiye hitoi keu shou I mkhü lumoni keshea?

¹⁰ “Li tsaibo ajoshi akeu lo wuno kütsaleve lo, ikemu kishekhave tsü kevilo; li lokaqo kixive lo, kughengu panongu ye AMPEUw kumoe.

¹¹ Israel eno Judah kibo ye akümzapu shi I pishiqhivae, ipi Ampeu no asheshu.

¹² Panongu no Ampeu zülo akimki tsa ishi pi, ‘Pa ye kiumu shimo nani; kütsakungo keu ni shou ikughimo nani, azütakikihi momu püqümiye ithulumo nani.

¹³ Tungkupmi ye alolo atsa kühake amülhü ilhouve nani. Titoi panongu lau shive nani!’”

Küghakütha Sheshu

¹⁴ Tighenguno Ampeu, aqokitikhi Lhou no sheshu: “Nono atsa hipau piqhive akehu, julo, I tsa huno o kichi lo ami kughulhove tsüni, eno timi hipaqo no asü shino ami no panongu pitiveni.

¹⁵ Julo, I no putou no shiye lakhi sasü o lenike ighini, O Israel kibo, ipi Ampeu no asheshu. Hi ye kutuukulu shiye; mulholo shiye, nongu ye shiye hipau tsa mtha momu pano no kiu pi keno nongu ye vethamla nani.

¹⁶ Pano piji bohu ye akumoki khaqhipe püa ketoi; panongu kümtsü aghütomi ke.

¹⁷ Panongu no nongu chuqupu chukhave tsü nani; no pu-angaqo kütsave tsü nani; no mishi eno ane chuve tsü nani; no tsaibo eno mubuthi chukhave tsü nani; nongu no pükhübe chekeu aliwo kumto phughiqo azütakikihi no kütsave tsü nani.”

¹⁸ “Ikemu tipau tsala lo ghi, Ampeu no asheshu, Ni ye qhoi o kütsavemo nani.

¹⁹ Kughou now timiqo no, ‘Kushiye Ampeu ni Lhou ye akümla hipaqo ni shou mla kea?’ ipini keno, no ye panongu vilo pilo, ‘Kughengu nongu no I kümsümave eno no yeghi lo inami lhou mllauve, ikehu nongu ye no yeghi kumo keu lo inaghami qeuve nani.’”

²⁰ Jacob kibo lo hipau sheshu lo; Judah lo hipau kütüghü lo:

²¹ “Hi inilo, O mbomzü eno akükümsü küha kemi, anhethi animu ithumla kemi, akini animu chimla kemi.

²² Nongu ye Ni msamo keshea? Ampeu no asheshu. Nongu ye I zülo khokhoshi chemo keshea? I no asaye pesü azüghi lughi shi, ti vechemla kepushi alhokuthu ghuthu shi; azü fukucho ighimu ti veche mla; mqhumza igha namu veche mlae.

²³ Ikemu timi hipaqo ye aghükha eno hekibide mlo ani; panongu ye ighosü itsü wuvae.

²⁴ Panongu ye pano mlo lono ishi pimoe, ‘Ningu MPEU ni Lhou sümsani, khuu no atusho ghuloki lo azü tsücheni, tixi lo eno tuqu lo azü tsücheni keno, Pa no ghile hulu kepu pinedo ni ghenguno kuto tsü cheni.’

²⁵ O kümla lhoksa no hipaqo tutsüghüsü wuvae, o xine ghenguno o launo akivi süwuvae.

²⁶ Kixikilami timiqo Iw timi gholono phulue; aghau lichhe shiche kemi toi, timi meluni ke ihozüpe ngokhe. Panongu no timi menike aküsü piqepe qhie.

²⁷ Aqhupu lo aghau chhitoi aketoi, panongu kilo pishikiqhi no chhitoi ani; tighenguno panongu ye kije eno kinimi shivae;

²⁸ panongu ye chhikhoi eno atha pubeivae. Panongu kümla lhoksa ye ashekha küha; pano ye mighimi chipiu süsho tsünike achipi lono xathatsü chemo, aveküsami chipiu süsho tsümoe.

²⁹ Hipaqo ghenguno Ni ye panoqo ghime moni keshea? ipi Ampeu no sheshu, eno shiye hitoi keu shou I mkhü lumoni keshea?”

³⁰ Akichiqhipu eno thüghüi kepu ayeghi lo shivae:

³¹ tungkupmi no akimki tungkuptsa pi, achinemi no pano gholau no ayepe; Iw timiqo no hipau ghola kimiye, ikemu ashekha tsala ighi kelo no ye kiu shinia?