JEREMIYA 49 - Sumi Naga CL (Re-edited) Bible (BSI)

Ammon shou Küghakütha

¹ Ammonmi ghenguno. Ampeu no ishi piani: “Israel ye anu kühave akeshea? Pa mheghi kiyighiu kühave akeshea? Imaye kishino Milcom ye Gad leve no paw timiqo pesü tile xüsüvepe kea?

² Ikehu Ampeu no sheshu, julo, I no Ammonmiw Rabbah shou aghüle kuni keu tsala cheni; ti ye kütsalepe amoqheve nani; tile aphuqo ye pitileve nani; tithiu Israel no khunono pano le keno tipaqo leluve nani, ipi Ampeu no piani.

³ “O Heshbon, mloqa lo, kughengu Ai ye pighivae! O Rabbah limiqo, ighamkulo! Yeqhiyephi pepuno aveghüzü shi poiqho poiqi mloqa lo! Kughengu Milcom ye pa chinemi ngo hiyampemi gholono haphe sawuve nani.

⁴ O aküpülü kükühau totimi, no ye kushiye o khilaqo pükhüpe qheza cheni kea? Nono o küakini pükhüpe picheni, ‘Khuu no I leighi luni kea?’

⁵ Ampeu no sheshu ani, I no o homxape akemi launo o shou kümsapu süghi nani, timi kümtsü haleve no khunomu poche kemi hekütsü mlave nani.

⁶ “Ikemu hithiu no I no Ammonmi kinigha athoputho tsü nani, ipi　　 Ampeu no sheshu.”

Edom shou Küghakütha

⁷ Edom ghenguno. Aqokitikhi MPEU no ishi piani: “Teman lo alokütsü kühave akeo? Alokütsümi launo mijekütsü kühave akeshea? Pano lokütsü hauve akeshea?

⁸ O Dedan lo küami, tsüghüsü povelo, akuthoku lo xüuve lo! I no pa ghimeke ghuloki lo Esau mhekiqi pa shou puku nani.

⁹ Atsaithi xokemi no ighi kelo, panongu ye atsaithi hami qhivetsü moni keshea? Putho lo küpkami no ighi kelo panongu no lunishi keu likhi pewuve chemo keshea?

¹⁰ Ikemu I no Esau phimini xave tsüae; pa küghütshü-a lhave tsüae, ikehu pa ye itshü mlavae. Pa tianuli, pa thiküzümi, eno pa kisüghümi ye kütsalevae, eno pa ghi püghavae.

¹¹ Now mighimghaqo qhivelo, I no panoqo hiju luve nani; Now chimemi pelo I shou pükhübe luve pelo.

¹² Kughengu Ampeu no ishi piani: “Tsala aghime jukhu shoküzüpu kumo keqo no shove cheghi aye, nongu ye ghimeqhi mono puwuve nani keshea? Nongu ye sho masa nani.

¹³ Kughengu Ampeu no sheshu, Ni ampi no tushoqhi anike Bozrah ye akümsapu, atichepu, küghüküghai, eno ghukushopu shive nani, eno tile mishighüna kümtsü alholo ixapinyive nani.”

¹⁴ Ni ye Ampeu launo atsape lakhi chiluvae, shiyeqo lau lachemi puwuvae: “Nongu hekumqope Edom mjolo, aghü shinike ithulo!

¹⁵ Julo, shiyeqo dolo I no o pesü aghulo shive tsüni, timi kümtsü no thogha peni.

¹⁶ No atuxu lo küxüu, atoghi kütsüqa pükhape achekeu, nono kichi kümsa eno qheza chekeu huno o pishiqhivae. Nono alhuqu toi qhemghai keu lo o püsü mla püaghi namu, I no tilano o sünheqhive nani, ipi Ampeu no sheshu.

¹⁷ “Edom ye akümsapu shive nani. Khukhumu ti kathawu keu ye shithüghüive nani eno aghüzaku jukünatha nani.

¹⁸ Sodom ngo Gomorrah eno tipa cheaxü lo mishighünaqo kütsale kelo toi khunomu tile küghüna kithe move nani, Ampeu no pi ani.

¹⁹ Julo, abongshuu lakhi no Jordan ghasa lono atsüni kümtsha-a lo ipeghi ketoi I no Edommi pelo züleno pano yeghi lono povepe nani. Tithiu no I no kishelu keu pelo tipau shou ayepe penani. Kughengu I toike khuu ani kea? Khuu no I khülu nani kea? Ambekheu khuu no I mjolu nani kea?

²⁰ Tighenguno Ampeu no Edom lo küamiqo shou kughu püakeu eno Teman lo akemi pesü kiu shiniye kümsüpu ani keno inilo. Pano tianuli kutolo sünhe sawuve nani. Mtsüqheino panongu kümtsü küsakusho lono thüghüive nani.

²¹ Edom ikiqi keu sütsa chilu kemtsa, ayeghi kümtsü itha nani eno pano küqa no Akuhu Züghi kutolo chilu nani.

²² Alhuqu no achishibo sükhope yeiqighi keshi aghümi no Bozrah leighi nani. Tipa tsala lo Edom ghütomi mlo ye apunu küsü lo akeu totimi mlo toive nani.”

Damascus shou Küghakütha

²³ Damascus ghenguno: “Hamath ngo Arpad ye avesavae, kughengu panongu ye asütsa lhoksa chiluvae; akümsa no kütakihivae, azüghi no qümüi mla ketoi auvae.

²⁴ Damascus ye miqemleive no tsüghüsü povae, shithüghüi keu no tshü luvae; totimi no apunu küsü lo aketoi, aküsü aghime no tsüghavae.

²⁵ Alokivi, ajekipi mishighüna ye kishino pighive mphi kea?

²⁶ Ikehu tipa tsala lo aphughi lo lhothemi ye alaghila lono pithive nani eno ghüshimi kümtsü kütsave nani, ipi aqokitikhi MPEU no sheshu.

²⁷ I no Damascus liwo lo ami süvetsü nani, tino Ben-Hadad liwo kumto pitileve tsü nani.”

Kedar ngo Hazor shou Küghakütha

²⁸ Kedar ngo Hazor kükaqha Babylon kükau Nebuchadnezzar no leluve keqo ghenguno. Ampeu no ishi piani: “Ithulo, Kedar leluve lo! Kipelau timiqo kütsave lo!

²⁹ Pano phiki ngo atsüaqu loji tshü sawuve tsü nani, panow nhaqhiphi ngo tinhemgha kivi qhoi luve nani; sayeshiqo sawuve tsü nani, timiqo no ighamku pi nani: ‘Akümsapu no süho luvae!’

³⁰ O Hazormiqo, povelo, kushuo lo povelo, akuthoku lo küghüna wuvelo! ipi Ampeu no sheshu. Kughengu Babylon kükau Nebuchadnezzar ye nongu pithiveni ke kughu ani.

³¹ “Ithulo, sükusho qholo ililai akeu shiye lenike wulo, ipi Ampeu no sheshu, ti ye khagho momu akhadu kühano lomoshi küghüna ani.

³² Panow sayeshiqo ngo pichepighi hakholuve tsülo. Asa ikhonhei ghove keqo sa I no amülhüwo lo küza puwuve nani, I no ako kümtsü lono panoqo amhekiqi süghi nani, ipi Ampeu no sheshu.

³³ Hazor ye tüngtügha kungo-a shive nani, ti ye alholo ixapinyive nani; khunomu tile küghünamo nani; eno khunomu ti kathamae.

Elam shou Küghakütha

³⁴ Judah kükau Zedekiah yepe mpe hukuthu lo, Ampeu tsa Elam ghenguno Jeremiah lau ighi.

³⁵ Aqokitikhi MPEU no ishi piani: “Julo, I no Elam süzü kipemi khunono Elam püxüpe acheni keno tipaqo pithi khave nani.

³⁶ I no atsütsü lo ako bidi lono amülhü Elam shou fupuku nani, eno panoqo fupe aqha kümtsü lo puwuve nani. Panongu ye khuno kükaqha lomu ilomo keu kühave nani.

³⁷ Elammi mjoche kemi eno pano küxü phuche kemi zülono I no panoqo kütsaqhi nani. I xukighide lono I no Elammi kütsale nani eno panoqo pühave moke kutolo panoqo shou azütakikihi puwu nani.

³⁸ I no Elam lo I kükalakhü qhinani eno pano kükau ngo hiyampemi kütsaleve nani, ipi Ampeu no sheshu.

³⁹ “Ikemu hithiu ye I no Elam ngukümgha tsüchile nani, ipi Ampeu no sheshu.”