JEREMIYA 48 - Sumi Naga CL (Re-edited) Bible (BSI)

Moab shou Küghakütha

¹ Moab ghenguno. Aqokitikhi MPEU, Israel Lhou no ishi piani: “Nebo ye ahasapue, kughengu ti ye kütsalevae! Kiriathaim ye akukujopu shivae eno leluvae; aliwo tulaqhive no shikujovae;

² Moab jekipi ye kühavae. Aghümi no Heshbon lono Moab kütsave nike kuchughue: ‘Ighilo, ningu shiye hupau kishekhave tsüni!’ O Madmenmi, nongu ghi inaqhoivepe nani; azütakikihi no nongu leighi nani.

³ “Asütsa lakhi! Horonaim lono ighamku ani, ‘Küghüküghai eno kütsakungo kije!’

⁴ Moab ye kütsalevae; li tianuliqo no ighaqa ani.

⁵ Kughengu Luhith ikuqhola lo panongu no qasü iqho cheni, Horonaim lo ikiqila lo panongu no amloksa küqa chilu ani.

⁶ Povelo! Nongu ampi xalulo! Nongu ye asayeqha lo asüminipho toi nani!

⁷ Kughengu nono o kümla ngo o kinikülü shou pükhübe kehu no ghi leluve nani; Chemosh ye haphe sawuve nani achinemi ngo hiyampemi ghi sawuve nani.

⁸ Ghikiqhiu no aphughi kümtsü shou ighi nani, eno lakhimu pokamla nani. Akhila ye püghave nani eno aqa yeghi ghi püghave nani; Ampeu no pivae.

⁹ “Achishibo pesü Moab tsülo, kughengu li ye yewuve niae; li phughiqo ye küghüve no tile küghünani kemi kühave nani.

¹⁰ “Amlo tsüqhiyi Ampeu kümla shimo keu ye müsüinivae, eno azütakikihi süchileve keu ye müsüinivae.

¹¹ “Moab ye alhothe lono iqüghai acheni eno süküghütha jumphi; pa ye abohu lakhi lono lakhiu lo lekiqeve mphi, momu haphe sawuve jumphie; ikehu paw chukivi ye atho aphi eno pa xo ye kilive mphie.

¹² “Tighenguno julo, I no timiqo puwu no pa lepheve, eno pa bohuqo kümsa shi peleve tsüno kubole pinyive tsüni keu tsala cheni.

¹³ Tishino Israelmi no Bethel lhou shou pükhübe chekeu jupe kujove ketoi Moab ye Chemosh jupe kujove nani.

¹⁴ “Nongu ye kishino ‘Ningu ye aghütomi eno aghükivimi’ ipi cheni kea?

¹⁵ Moab ngo paw mishighünaqo ghikiqhiu ye ighivae, eno tile lhothemi kishekiphe likhi ghiqhilevae, ipi Akükau, aqokitikhi MPEU no sheshu.

¹⁶ Moab mhekiqi ye kupunuvae, eno pa ghime ye mtazü cheni.

¹⁷ Nongu pa phivilo küami eno pa je ithi akemi kümtsü no pa ghenguno mloqa pilo, ‘Kishino akumto eno ajekipi kükaküsü ye icheve akea?’

¹⁸ “O, Dibon lo küamiqo, nongu gigihupu-a lono iqighi no ayeghimkhu lo iqavelo! Kughengu Moab ghikiqhiu ye nongu shou ighivae; pa no nongu liwo kumto kütsave tsüae.

¹⁹ O Aroer lo küxümiqo, alaphe lo puthugho no julo! Poche keu timi eno pokalu keu totimi vilo inijulo, ‘Kiu shive kea?’

²⁰ ‘Moab thoghavae, ti ye ikiqivae; ighamku qalo! Arnon ghoki lono Moab pighive keu pesü sheshulo!’

²¹ “Ayeghi hipaqo shou küghakütha ighivae: atoqa yeghi, Holon, Jahzah, Mephaath,

²² Dibon, Nebo, Beth-diblathaim,

²³ Kiriathaim, Beth-gamul, Beth-meon,

²⁴ Kerioth, Bozrah, eno Moab lo mishighüna aghacheu eno akupunu lo akeqo kümtsü.

²⁵ Moab kibo ye ghithave tsüae eno pa u hechheve tsüae, ipi Ampeu no sheshu.

²⁶ “Moab shokümzü lo, kughengu pa no Ampeu lachile ghi pa ampi sheqhe, ikehu pa ye pa kumghu lo ihi nani eno pau ghi timi no junu nani.

²⁷ No ye Israel cheqhi cheke kumo? Israel ye küpkami kesheno nono pa ghili pi aye, o kütsü küngü thaigha che kea?

²⁸ “O Moabmiqo, aphughiqo qhive no atuqu dolo xüuve lo! Miqhedu no anhepho lo apüsü shiche ketoi no ghi tishilo.

²⁹ Nino Moab qheküza chiluvae pa ye aqheküza küsae, paw tsütsüngoju, akuchhoma, akülaki eno pa mlo lono pa kümsü pivi chekeu kümtsü chiluvae.

³⁰ I no paw mkamihi keu ithi ani, Ampeu no sheshu; pa qheküza tsapi ye kichile, pa kümla ye kuchou kumoe.

³¹ Ikehu I no Moab ghenguno mloqa ani; Moabmi kümtsü ghenguno mloqa ani; Kir-hareseth ghenguno mloqa ani.

³² O Sibmah lo atsaibo, Jazer lo akemi nguno alaushi o ghenguno mloqa ani! O lokaqo ye azüghi shou no Jazer Züghi kutolo qüwuche; ikemu itehi ye ow mütsü tusho xathi ngo atsaithi shou, ghikiqhiu hu ikughivae.

³³ Moab ghüma yeghi kivi lono, alokughuno ngo alokivi ye ikhipe wuvae; Atsaithi kütsüghü-a lono I no atsaizü lakhavae; khunomu alokivi lono atsaizü tsüghüphe movae; igha akeu ye alokivi ghügha kumoe.

³⁴ “Heshbon lono ighamku akeu no Elealeh eno Jahaz kutolo chilu; Zoar lono Horonaim ngo Eglath-shelishiyah kutolo chilue. Kughengu Nimrim ghoki ghi qhaivae.

³⁵ Moabmi khunoqo no qhemghaike-a lo aghakishi kümlla tsü cheni eno akümllagho alhouqo tsü cheni keno, tipaqo ye I no püghave nani.

³⁶ Ikehu I mlo ye Moab ngo Kir-hareseth ghenguno fulili igha aketoi mloqa ani. Kughengu pano kinikülü ye pühavae.

³⁷ “Kughengu panongu kümtsü akütsüsa miyevae eno pano kichimhi tsalevae. Panongu kümtsü u lo azaku puvae eno kümtsü no yeqhiyephi no achita khapu anie.

³⁸ Moab lo aki kütsüqa eno alaghila kümtsü lo akumlo likhivae kughengu khunomu lunishimo keu yeghi li lakhi toi I no Moab kubolevae, Ampeu no sheshu.

³⁹ Kishita kuboleve akelae! Panongu no kishita mloqa ani kelae! Moab ye thoghavae! Ti ye pa sümxape akeqo zülo aküighüpu eno akümsapu shivae.”

⁴⁰ Kughengu Ampeu no ishi piani: “Julo, alhuqu no pa chishibo sükhope yeiqiche keshi, shiye lakhi no Moab küzüluve niye ani;

⁴¹ mishighünaqo leluve, aliwo kumtoqo ye khasü luve nani. Tipani Moab ghütomi mlo ye totimi apunu küsü lo akemi toive nani;

⁴² Moab ye kütsaleve eno ashiaye achekeu kühavae nani, kughengu pa no Ampeu hebide ghi pa sheqhe ke.

⁴³ Aküighüpu, aqo, eno alichhe no o zülo ani, O Moab lo küami! ipi Ampeu no sheshu.

⁴⁴ Aküighüpu lono pove keu no aqo lo ikiqi ilove nani, eno aqo lono ipeghilu keu no alichhe lono meluve nani. Kughengu I no Moab ghimeke mpe lo hipaqo süghi nani, ipi Ampeu no sheshu.

⁴⁵ “Heshbon kicheqho lo akemi kupokichemi no aküka kühave, kughengu Heshbon lo ami ipeghi, Sihon ki lono ami iqü ipeghive; tino Moab kishe pitive tsü; qheza chekemi kütsüqa ghuleve tsüe.

⁴⁶ O Moab, o hasapuae! Chemosh timiqo ye kütsalevae, kughengu no tianuliqo ye kügha luve no akughu lo sawuvae.

⁴⁷ Ikeghi hithiu tsala lo I no Moab ngukümgha tsüchile nani, ipi Ampeu no sheshu,” Hi no Moab shou küghakütha ke.