JEREMIYA 46 - Sumi Naga CL (Re-edited) Bible (BSI)

Egypt shou Küghakütha

¹ Ampeu tsa Jeremiah lau shiyeqo ghenguno ighi.

² Egypt ghenguno: Egypt kükau Pharaoh Necow ghüshimi Carchemish lo Euphrates ghoki phivilo ngo akemi khunoqo Babylon kükau Nebuchadnezzar no Josiah nu, Judah kükau Jehoiakim yepe mpe abidiu shiake lono leve keno tipaqo ghenguno:

³ “Süshoyi ngo azüto kutolo, eno aghü shinike ighilo!

⁴ Khurshiqo kutolo; O khurshimiqo, ikuvelo! Nongu yikütsükuqho puvelo, nongu ngupa süphelo, aghü nanuqo pepuve lo!

⁵ Ni ye kiu ithulu ani kea? Panongu ye aghüthi süvae eno athiu idewovae. Panow ghüshimi ye thiqhivae eno kuhakive pokhavae; panongu ye athiu jupuwo amoe kümsapu no homxape anie! ipi Ampeu no sheshu.

⁶ “Akümthümi no pomlavae, aghütomi ghi pojo mlavae; ahuu Euphrates ghoki lono panongu ye küpxape ikiqivae.

⁷ “Nile züghi fukukucho toi ithu chekeu ye khuu kea?

⁸ Egypt no Nile toi ithu cheni, azü fukukucho toi ithughi ani. Pa no pi, ‘I no ithughi no ayeghi khonha luve nani, I no mishighüna eno tipaqo lo küxümi kütsave nani.’

⁹ O khurshiqo, azüu wulo, O khurkuluqo, mqhumzalo! Cushmi eno Putmi azüto kipemi, Ludmi asüzü pekithimi, hi aghütomiqo azüu puwulo.

¹⁰ Tipa tsalani ye aqokitikhi MPEU tsala, Pa ghümi shou amkhü luni keu, amkhükulu tsala ke. Azütakikihi no aghaqilu moke kutolo aji pele eno tsüye nani. Kughengu ahuu Euphrates ghoki lono aqokitikhi MPEU no aghakishi shiani.

¹¹ O Egypt limiqo, Gilead lo iqho no nukümtshau lulo! Nongu ye adou lono küsüvi kutomo peithavae, nongu ghenguno shikipivi kühae.

¹² Shiyeqo no nongu kukujo chiluvae, no ghügha no ayeghiqha chhitoivae; kughengu ghüshimi no ghüshimi shou küpxa ikue; eno pama kinikujo ikiqike.”

¹³ Babylon kükau Nebuchadnezzar no Egypt kütsani ke chekeu vehu, Ampeu no tungkupu Jeremiah vilo pi:

¹⁴ “Egypt eno Migdol lo sheshulo; Memphis ngo Tahpanhes lo sheshulo; pilo, ‘Puthugho no kutope khelo, kughengu azütakikihi no nongu homxa kütsa nani.’

¹⁵ Kushiye no ghütomi ye agi pishiqhope ani kea? Ampeu no panoqo hekuluve kehu panoqo ye puthugho amoe.

¹⁶ Pa no kutomo küpxa kuluve, panongu lakhino lakhi vilo pi, ‘Ithulo, ningu niw timiqo lau idewoveni nolo, qhaküsümi zütakikihi lono ni punugha lo woveni.’

¹⁷ Egypt kükau Pharaoh je kulo, ‘Yeyeshi igha chekeu pa dokivi ye wovae.’

¹⁸ “Akükau khuu je aqokitikhi MPEU keno xüküau no sheshu, naghutoqo gholo Tabor toi, eno azüghi phivilo Carmel toi milakhi ighi nani.

¹⁹ Akughu lo wu kepushi aghili kutolo O Egypt lo küxümiqo! Kughengu Memphis ye kütsave no ixapinyi küghüna moae.

²⁰ “Egypt ye amshiti jukivi lakhi, ikemu ahuu no khaumiyi no pa shou ikughivae.

²¹ Li no piqe kemi ghüshimiu ye athakupu mishiti toivae; iyei, panongu ye mjochile mono tsüghüsü kümtsa povae, kughengu küsakusho eno aghime tsala panongu shou ikughivae.

²² “Apighi no poche keshi Egypt no süsüshi igha nani; kughengu li ghümi no kütsasa ighi no asü buqhi chekemi toi li shou amüghüqo peighi.

²³ Panongu no li ghasü thaqhive tsü nani, ipi Ampeu no sheshu, aghasü shoxü ilo kümlapu shi anamu buqhive tsü, kughengu panongu ye tülhaqu nguno akichiu ke; panongu ye kihikha kümlae.

²⁴ Egypt ngaqo ye shikujove nani; Li ye ahuu no ighi kemi u lo phesüve tsü nani.”

²⁵ Aqokitikhi MPEU, Israel Lhou no pi: “Julo, I no Thebesmi lhou Amon, Pharaoh ngo Egypt, pano kükami ngo alhouqo, eno Pharaoh pükhübe chekeqo shou aghime süghi nani.

²⁶ I no pano küxü phuche kemi, ti ye Babylon kükau Nebuchadnezzar ngo paw kijemiqo u lo panongu süvetsü nani. Tithiu Egypt ye wovekeu ghuloki lo toi itaghi timi küghünauve nani, ipi Ampeu no sheshu.

²⁷ “Ikemu O I qeu Jacob, msa kevilo, O Israel, aghüthisü kevilo, kughengu nongu no aghacheu akughu shi ake lono, I no nongu eno nongu polo kiqimi xaphelu nani. Jacob ye ideighi no iqünhei eno ililai xünani, eno khumu pa shikümsa monani.

²⁸ O I qeu Jacob, msa kevilo, ipi Ampeu no sheshu, kughengu Ni ye o gholo ani. I no khile o hale puwuve keno, shiye ti kümtsü kütsave nani, ikemu nou ye qhoi kütsamoe. Ni ye kiu gholau nomu o ghime mono qhivemo nani, I no aghibiu lono o sakiyi nani.”