JEREMIYA 44 - Sumi Naga CL (Re-edited) Bible (BSI)

Ajulho Ghenguno Küghakütha

¹ Egypt yeghi lo Migdol, Tahpanhes, Memphis, eno Pathros lo Judah timi akeqo ghenguno Jeremiah lau atsa ighi,

² “Aqokitikhi MPEU, Israel Lhou no ishi piani: Jerusalem ngo Judah lo mishighüna kümtsü I no kütsave keu nongu no ithuluvae. Julo, ishi tipaqo ye pighive no khumu tile ngo movae,

³ ti ye panongu no axine shive keu ghenguno ke. Panongu eno pano puasü nomu mtha keu lhouqo lau panongu no akümllagho tsüno huthu kelono I mlo shikighide tsüke.

⁴ Ikeghi I no nongu lau ishokibe I qemi tungkupmi puwu no pi, ‘O, I no mithi chekeu aphikümqhüpu hipaqo shi kevilo!’

⁵ Ikemu panongu no ini tsümo momu I lau amlo tsümono kütau lhouqo mlla tavemoe.

⁶ Tighenguno I loghu eno mlo kighide no Judah lo mishighünaqo shou eno Jerusalem laghila lo pukue, ikehu ishi kutolo ixapinyi eno pighivae.

⁷ Itehi aqokitikhi MPEU, Israel Lhou no ishi piani: Nongu ye kushiye no shou alhoksa kümla kije hipau shi ani kea? Kushiye Judah lo kiptimi, totimi, itimi, eno anga kughunuqo lakhimu ghülu pemono kütsale keu süghi ani kea?

⁸ Kushiye nongu no xüuve niye ighikeu Egypt yeghi lo nongu ye kütau lhouqo lau axokütsüngü pesü mlla eno au no ajulho mlano I mlo shikighide ani kea? Nongu ye nongu ampi kütsave ani eno müsüinive keu shive no ayeghi lo shiyeqo kümtsü no cheqhi kepu vehu shivae.

⁹ No puasüqo, Judah kükami ngo pano nipuqo, nongu eno nongu nipuqo no Jerusalem laghila lo eno Judah ghakhu lo kixikila kümla shikeu nongu ye kümsümave akeshea?

¹⁰ Ishi kutolo panongu ye pano kuchuni mphi, I sümsa mphi, eno I no nongu eno no puasüqo tsükeu yezah pape xüchemoe.

¹¹ “Tighenguno aqokitikhi MPEU, Israel Lhou no ishi piani: Julo, I no I xukighide nongu shou puku nani eno Judah kümtsü kütsave nani.

¹² Judah lo ghükulumi khunoqo Egypt lo wuno tilau xüuveni shi ani keno, kümtsü kütsave nani. Egypt yeghi lono panongu ye azütakikihi ngo püqümiye lono ikiqive nani. Kijemi kitilami kümtsü azütakikihi momu püqümiye lono thive nani, eno panongu je pesü akumou shoqhi lo peitha nani, pano jukichi nani, eno müsüini cheqhi nani.

¹³ I no azütakikihi, püqümiye, eno püsa pesü Jerusalem ghime ketoi Egypt lo xüuve kemi ghimeqhi nani,

¹⁴ tishianguno Judah lo ghükulumi khunoqo Egypt lo xüuve niye ighi keno milakhimu polu pemo momu Judah lo idewoni shi anamu wopemo nani. Kupokichemi khami kumo aye panoqo gholo milakhimu idewolu monani.”

¹⁵ Tile timi khijeno pano nipuqo no akümllagho pesü kütau lhouqo tsü chekeu ithi akeno, eno totimi puthugho akeqo ngo Egypt yeghi lo Pathros lo küxümi, aqo kije kuho kumqo akeqo kümtsü no Jeremiah khochile:

¹⁶ “Nono Ampeu je lono ni vilo kiu piani keno, ningu ye tipaqo inimoe.

¹⁷ Ikemu ningu ye nino tushoqhive keu shi nani, atsütsü kükaliu lau akümllagho tsü nani, eno Judah ngo Jerusalem laghila lo ningu eno ni puasüqo, niw kükami ngo hiyampemi no shiche ketoi atsaiji kümllagho pesü li tsü nani. Kughengu ningu ye achuqupu no kupukuno eno kinikülü shino aküpüna kiumu ithumlano acheke.

¹⁸ Ikemu atsütsü kükaliu lau akümllagho mlla move eno atsaiji kümllagho pesü li lau leqhitsü move keloye ningu ye kiumu kühavae eno azütakikihi ngo püqümiye lono thikhavae.”

¹⁹ Ikelo totimiqo ghi pi, “Nino atsütsü kükaliu lau akümllagho eno atsaiji kümllagho tsü kelo ningu ye ni kimiqo launo puloza lumono li ju kimihi lono asho kunupe li tsü eno atsaiji kümllagho pesü li tsü küghashi keshea?”

²⁰ Tileno Jeremiah no kiptimi, totimi, eno khokichile hipau pa tsükemi timi kümtsü vilo pi:

²¹ “Judah ngo Jerusalem laghila lo nongu eno no puasüqo, now kükami ngo hiyampemi, eno aghakhu lo timiqo no akümllagho tsükeqo Ampeu ye kümsülu tsüke kumo? Ti ye Pa kükümsü lo ighi move keshea?

²² Ampeu ye nongu xine eno aphikümqhüpu kümlaqo jupe kutuu mlave. Tighenguno ishi kutolo no ghakhu ye pighive no ixapinyi eno müsüinivae.

²³ Ishi kutolo nongu shou kütsakungo hipau ighi akeu ye, nongu no kütau lhouqo lau akümllagho tsüno Ampeu shou axine shive eno Pa yezahqo papemo keu ghenguno ke.”

²⁴ Jeremiah no itaghi timi kümtsü eno totimi akeqo kümtsü vilo pi, “Nongu Judahmi Egypt yeghi lo akeqo, Ampeu tsa inilo.

²⁵ Aqokitikhi MPEU, Israel Lhou no ishi piani: Nongu eno nongu nipuqo no shuphe no tishi mlave keu lono ishi pikeu shikupuvae, ‘Ningu ye mtsüqheino, atsütsü kükaliu lau akümllagho tsü nani eno li lau atsaiji kümllagho tsü nani.’ Ikehu nongu shoqhi shikupuve lo!

²⁶ Tighenguno Egypt lo Judahmi akeqo kümtsü AMPEU tsa inilo: Julo, I no I je kije pesü tushoqhi ani, hinguno hilauye nongu Judahmi Egypt lo akemi milakhi pelomu ashoqhi shikelo, ‘Ampeu Alhou no xüake toi,’ ipi püamoe.

²⁷ Julo, I no akivi kumono amhekiqi ghenguno panongu jukuto ani. Nongu Judahmi Egypt lo akemi kümtsü azütakikihi ngo püqümiye lono thive nani; ti ye nongu kümtsü kühave moke kutolo tishi nani.

²⁸ Ikemu nongu gholo kihikulu khami azütakikihi lono pokalu keqo no Egypt lono Judah lo ideighi nani. Tithiu no Judahmi ghükulumi khunoqo Egypt lo xünike ighi keno, tipaqo no I tsa no keo, pano tsa no kuchou keno ithi nani.

²⁹ Ampeu no sheshu ani, Hi no nongu lau amchipu shinani, I no hipa-a lono nongu ghime nani eno tishikeu lono I tsa ye mtsüqheino nongu ghüzani ke nongu shou ikughi nani:

³⁰ Ampeu no ishi piani, Julo, I no Egypt kükau Pharaoh Hophra pesü pa küxü phuche kemi pa ghümi u lo süvetsü nani; ti ye I no Judah kükau Zedekiah pesü Babylon kükau Nebuchadnezzar u lo süvetsü ketoi nani; pa ye Zedekiah ghümi shiche ke.”