JEREMIYA 43 - Sumi Naga CL (Re-edited) Bible (BSI)

Jeremiah ye Egypt lo Sawuve

¹ Kughou Jeremiah no timiqo vilo Ampeu pano Lhou no panoqo vilo pi penike puwu keu kümtsü pitave keno,

² tile Hoshaiah nu Azariah ngo Kareah nu Johanan eno kütami aqheküzashi akemi kümtsü no Jeremiah vilo pi, “No ye miki ani. Ampeu ni Lhou ye ishi pi peniye o puwu püamoe, ‘Egypt lo küghüna nike wu kevilo.’

³ Ikemu Neriah nu Baruch no ningu pesü Chaldeami u lo süve tsüno panoqo pelo ni pithive momu Babylon lo kügha sawuve peniye o pelo ningu küla ani peke.”

⁴ Tishino Kareah nu Johanan ngo ghüshimi shou zatsümi eno timi kümtsü no Ampeu no Judah lo ngovelo pikeu tsa lumove.

⁵ Johanan ngo zatsümi kümtsü no Judah lo ghükulumi shiyeqo gholo haküghütsüve no Judah lo xüniye ideighi akeqo kümtsü sawuve—

⁶ kiptimi, totimi, itimi, kükalimi, eno timi khunoqo Nebuzaradan no Shaphan nu Ahikam nu Gedaliah yezah qholo qhitsü keno, kümtsü sasü wuve; eno tungkupu Jeremiah ngo Neriah nu Baruch pama ghi sawuve.

⁷ Panongu no Ampeu tsa lumono Egypt yeghi lo Tahpanhes lo ighive.

⁸ Ikelo Tahpanhes lono Ampeu tsa Jeremiah lau ighi:

⁹ “Judah timiqo zülono atuqu hami o u lono pesü Tahpanhes lo Pharaoh kükaki kulaghi lo atumuno pesü qha püakeu la lo qhovelo,

¹⁰ eno panoqo vilo pilo, ‘Aqokitikhi MPEU, Israel Lhou no ishi piani: Julo, I no I qeu Babylon kükau Nebuchadnezzar puwu no pa kükalakhü pesü I no atu qhopüa keu shou ghotsü nani, eno pa no atuquqo shou pa küka pushonha xakho nani.

¹¹ Pa no ighi no Egypt leluve nani, eno püsa no ghaveni kemi no püsa lono thive nani, akughu lono thini kemi no akughu, azütakikihi lono thini kemi no azütakikihi tsüve nani.

¹² I no Egypt lhouqo chineki lo ami süvetsü nani, Babylon kükau no pano lhouqo pitive tsüno tipaqo pewuve nani. Ambekheu no pa phimini lo axü shikimthe keshi pa no Egypt yeghi shikimtheve no iqüghai cheve nani.

¹³ Pa no Egypt ghakhu lo Heliopolis lo atu pesü kogheküghü shipüa keu kütsaleve nani eno Egypt lhouqo chineki pitileve nani.’”