JEREMIYA 42 - Sumi Naga CL (Re-edited) Bible (BSI)

Egypt lo Wupemo nike Kütü

¹ Tileno ghüshimi shou zatsümi, Kareah nu Johanan ngo Hoshaiah nu Jezaniah, eno timi kijemi kitilami kümtsü no hekütsüpe ighi no,

² Jeremiah vilo pi, “Ni kimiye tsü penike o lau ighi ani, hi ghükulumi ghenguno O Lhou Ampeu lau inikhu tsülo. Kughengu o nhethi no ithulu anike, ningu ye aghulo likhivae,

³ tishikeu lono Ampeu o Lhou no ningu ye khila wukepu keno alaghi ni piye peni eno ningu ye kiu shikepu keno ni vilo pitsü peni.”

⁴ Tungkupu Jeremiah no panongu khochile, “Nongu no pi akeu I no chiluvae. Julo, nongu no qhüiniju aketoi, I no Ampeu nongu Lhou vilo inikhuni eno Pa no kiu pini keno I no nongu vilo pitsüni. Ni ye nongu launo kiumu süchilemoe.”

⁵ Panongu no Jeremiah vilo pi, “Ampeu no o vecheo azah ni tsükeu kümtsü ningu no papemo aye, Ampeu no ni shou kuchou eno pükhükulupu thopiu shi peniu.

⁶ Akivi na aküsa namu, Ampeu ni Lhou khuu lau inikhu tsü penike nino o puwu ani keno, nino Pa gholuni.”

⁷ Atsala chighi thiu Ampeu tsa Jeremiah lau ighi.

⁸ Ikehu pa no Johanan ngo ghüshimi sakiphemi eno kijemi kitilami kümtsü kukumqo,

⁹ eno panoqo vilo pi, “Ampeu Israel Lhou, khuu lau nongu no I pelo qhüiniju pekeno Pa no ishi piani:

¹⁰ Nongu no aghakhu hipau lo xüaye, I no nongu sünheqhi mono xaqhe pukuni; I no nongu nhüve mono shosüni; kughengu I no nongu shou kütsakungo süghi keu lo Ni ye amlo ijuvae.

¹¹ Nongu no msa akeu Babylon kükau jupe ighü kevilo, Ampeu no sheshu, kughengu I no nongu gholo ani, eno pa u lono nongu xaphe luve nani.

¹² I no nongu kimiyeqhiyi nani tishianguno pa pelo nongu kimiyepe eno no ghakhu lo küghüna lupe nani.

¹³ Ikemu nongu no Ampeu Alhou tsa hebideve ghi, ‘Ningu ye aghakhu hipau lo ngomoe,’

¹⁴ eno, ‘Moe, ningu ye Egypt yeghi lo wuveni kughengu tilau ningu ye aghükishi ithumla nani, afuko ghügha chimla momu achuqupu kühano müzüthimo nani, ningu ye tilau küghüna auveni,’ ipi aye,

¹⁵ O Judah lo ghükulumi, AMPEU tsa inilo. Aqokitikhi MPEU, Israel Lhou no ishi piani: Nongu no Egypt lo wunike eno tilau xüuve niye agi kughopuwo aghi aye,

¹⁶ nongu no azütakikihi msa akeu huno nongu haluve nani, eno nongu no püqümiye jupe ighü akeu huno Egypt lo nongu pape ighive nani, eno nongu ye tilau no thive nani.

¹⁷ Khunoqo no Egypt lo wuno xüniye tilau agi kugho puwoni keno kümtsü azütakikihi, püqümiye, eno püsa lono ikiqive nani. I no panoqo shou kütsakungo süghi niye akeu lono milakhi mu ghülumo nani.

¹⁸ “Kughengu aqokitikhi MPEU, Israel Lhou no ishi piani: I no Jerusalem lo küami shou I loghu puku ketoi nongu Egypt lo wuve kemi shou ghi puku nani. Nongu ye ghukushopu, aküighüpu, thoküghapu shive no a-a hipau khilemu ithumlave nani.

¹⁹ O Judah lo ghükulumi, Ampeu no nongu vilo pivae, ‘Egypt lo wu kevilo.’ Ishi tsala lono I no mtsüqheino nongu kütüve ake

²⁰ nongu ye no küxü pesü ala ghüzü qhüluvae. Kughengu nongu no Ampeu no Lhou lau I puwu no ishi pitsülo pike, ‘Ampeu ni Lhou lau ni ghenguno inikhu tsülo, eno Pa no kiukiu pinamu ni vilo pitsülo, ningu no tishini.’

²¹ Ikehu I no ishi tsala lono nongu vilo pive tsüae, ikemu nongu no Ampeu nongu Lhou no I vecheo nongu vilo pikeu tsa lumovae.

²² Tighenguno mtsüqheino ithilo, nongu no khuno ghakhu lo wunishi ani keno, tilau no azütakikihi, püqümiye, eno püsa lono thive nani.”