JEREMIYA 41 - Sumi Naga CL (Re-edited) Bible (BSI)

Gedaliah Ghiqhive

¹ Tipa mpe aqhi akütsüniu lo aküka kibo lono ighi kemi Elishama nu, Nethaniah nu Ishmael, akükauw kijemi atomi gholo lakhi no pa gholo timi chighi sasü Gedaliah pütsani ye Mizpah lo ighi. Panongu kümtsa aghulhu shiake lono,

² Nethaniah nu Ishmael ngo pa gholo timi chighi chekeqo no panoqo zütakikihi süjope Babylon kükau no süsü keu angh Gedaliah ghiqhive.

³ Ishmael no Mizpah lo Judah timi khije Gedaliah gholo aghi keno kümtsü ghiqhive eno Chaldeami ghüshimi tilehi akeqo ghi ghiqhi khave.

⁴ Gedaliah ghiqhiwo thoghiu, timi khumu mtha aphi lono,

⁵ Shechem, Shiloh, eno Samaria lono timi lhotache akichimhi miyeve, aphimini ixü, eno aphimpi kihelepe athi kümllagho ngo axokütsüngü pesü achineki lo Ampeu lau ighi.

⁶ Ikelo Nethaniah nu Ishmael no panoqo kushoni ye Mizpah lono qasü ipeghi no pi, “Ahikam nu Gedaliah lau ighilo.”

⁷ Panongu no aphughi alou iloghi kelo, Ishmael ngo paw timiqo no panoqo ghiqhive no asükumo pesü atughuko lo vesüve.

⁸ Ikemu tipaqo gholo timi chighi no Ishmael vilo pi, “Ni pithi kevilo, kughengu ningu ye ashothi, barleythi, thazü, eno akhingozü aluza lo küsü püani.” Ikehu pa no tipaqo pithi move.

⁹ Atughuko khile Ishmael no ghiqhive kemi sükumo Gedaliah gholono vesüve keno, ti ye Israel kükau Baasha no Akükau Asa leighi kelono chhukeu ke; Ishmael no asükumoqo tile vesüve.

¹⁰ Tishino Ishmael no Mizpah lo timi kümsü küghaluve, akükau ngaqo eno Mizpah lo ghükulumi kümtsü sawuve; hipaqo ye zatsüu Nebuzaradan no Ahikam nu Gedaliah qholo qhivetsü keqoke. Ishmael no hi kümtsü küghaluve no sasü Ammonmi küdau ikuve.

¹¹ Ikemu kughou Kareah nu Johanan ngo pa gholo ghüshimi shou sakiphemi akeqo kümtsü no Nethaniah nu Ishmael no timi ghiqhikeu chilu keno,

¹² panongu no timi kümtsü sasü Ishmael hawu eno Gibeon lo ayizükucho kije akeu lono halu.

¹³ Kughou Ishmael no küghape chekemi no Kareah nu Johanan ngo pa gholo ghüshimi ithulu keno, panongu no alokivi shive.

¹⁴ Ikehu Ishmael no Mizpah lono küghape wuve kemi kümtsü no idesü Johanan lau poighive.

¹⁵ Ikemu Ishmael ngo pa gholo pano tache ye Johanan launo pokasü Ammonmi ghakhu lo wuve.

¹⁶ Tithiu Johanan ngo pa gholo ghüshimi sakiphemi no ghüshimi, totimi, itimi, eno shokomi khunoqo Ishmael no Gedaliah ghiqhive kethiu Mizpah lono akughushi sasü chekeno panoqo hakholu no sachile sawove.

¹⁷ Panongu no Egypt lo wuve niye wo Bethlehem phivilo Geruth Chimham lo ngove,

¹⁸ kughengu panongu ye Chaldeami msave, ti ye Babylon kükau no angh shi penike süsü keu Ahikam nu Gedaliah, Ishmael no ghiqhive kehue.