JEREMIYA 40 - Sumi Naga CL (Re-edited) Bible (BSI)

Jeremiah ye Judah lo Ngove

¹ Jerusalem ngo Judah lono ayikichhe no tshüpe Babylon lo akughu shiwu chekeqo gholo Jeremiah ghi cheghi keu ithulu no Nebuzaradan no Ramah lono Jeremiah puwuve, tithiu Ampeu tsa Jeremiah lau ighi.

² Kepten no Jeremiah saluve no pa vilo pi, “Ampeu no Lhou no a-a hipau shou amhekiqi shuphe ke.

³ Ampeu no ti shikupu ani, Pa no pike toi shivae. Nongu no Ampeu lau axine shive no Pa tsa gholu move kehu nongu shou hipau ikughi ani.

⁴ Itehi julo, I no ishi tsala lono o u lo ayikichhe kuqhove tsü ani. Nono pulo aghi aye I gholono Babylon lo ighilo, I no akivishi o tucho nani, ikemu nono wunike pulomo aye, ighi kevilo. Julo, aghakhu kuchopu o zülo ani; khile khilemu o ghenguno akivi eno achipi shikeu lo wulo.

⁵ Nono ngove aye, Shaphan nu, Ahikam nu Gedaliah lau idewove lo, Babylon kükau no Judah mishighünaqo lo angh shi penike pa süsüve ake pa gholono timiqo gholo xülo. Tikumo mu nono khile puloni keno tilau wulo.” Ikehu kepten no achuqupu ngo agho lakhi pa tsüve no puwuve.

⁶ Jeremiah no Mizpah lo Ahikam nu Gedaliah lau wuve eno pa sasü Judah yeghi lo qhive kemi timiqo gholo xüuve.

⁷ Kughou aghakhu lo zatsümi eno panow timiqo no Babylon kükau no Ahikam nu Gedaliah pesü pano yeghi lo angh shi penike süsüve no Babylon kughu lo sawumo kemi kumlhomi jukütsü penike pichevae pi chilu keno,

⁸ panongu no Mizpah lo Gedaliah lau wu—timi hipaqo Nethaniah nu Ishmael, Kareah nu Johanan, Tanhumeth nu Seraiah, Netophahmi Ephai nuli, Maacathmi nu Jezaniah eno panow timiqo.

⁹ Shaphan nu, Ahikam nu Gedaliah no panongu lau tushoqhi pi, “Chaldeami huthuni keu msa kevilo. Aghakhu lo xüno Babylon kükau huthulo, tishiaye nongu ghenguno akivipu shinani.

¹⁰ Niu ye Mizpah lo ngono Chaldeami no ighi kelo nongu züqhushi panongu zülo puthugho nani. Ikemu nongu ye atsaiji, mütsü tusho xathiqo eno thazü pekütsüpe nongu bohu lo kikelo, eno nongu no akeu mishighünaqo lo xülo.”

¹¹ Titoi Jewmi Moab lo, Ammon lo, Edom lo, eno ayeghi kütau akeqo no Babylon kükau no Judah lo ghükulumi qhive no panoqo shou Gedaliah pesü angh shi penike süsüvae pi chilu kelo,

¹² panongu no ayeghi khile haküghütsüve keno ti kümtsü lono Judah yeghi lo Mizpah lo Gedaliah lau ideighive. Panongu no atsaiji ngo mütsü xathiqo kupukuno shi pekütsü lue.

¹³ Kareah nu Johanan eno aghakhu lo ghüshimi sakiphemi no Mizpah lo Gedaliah lau ighi,

¹⁴ eno pa vilo pi, “No ye Ammon kükau Baalis no o küxü luve tsünike Nethaniah nu Ishmael puwuve keu ithi anima?” Ikemu Ahikam nu Gedaliah no panongu tsa pülü tsümoe.

¹⁵ Ikehu Johanan no tuqhou no Mizpah lono Gedaliah pütsa, “Kimiyeno I pelo wuno Nethaniah nu Ishmael heqhive pelo eno khuu pelomu ithipe kevilo. Kushiye pa ye o küxü luve tsüno Jewmi o sümxape akeqo pelo apanaghave pe, eno Judah lo ghükulumi pelo pühave peniye ani kea?”

¹⁶ Ikemu Gedaliah no Johanan vilo pi, “No ye hikithipu shimoni, kughengu no ye kichileu shi Ishmael ghili piani.”