JEREMIYA 4 - Sumi Naga CL (Re-edited) Bible (BSI)

¹ “Nono ideighini aye, O Israel, Ampeu no asheshu, no ye I lau ideighi masae. Ow aphikümqhüpu thimeqo nono I zülono ikhive no ithamo aye,

² eno kuchou, kuchou xakütha, ngo achipiu mikucho lono nono, ‘Ampeu xü ani,’ ipi tushoqhi aye Pa no shiyeqo kümghatsü nani, eno Pa gholono panongu jekipi shinani.”

³ Kughengu Judahmi ngo Jerusalemmi lau Ampeu no ishi piani: “Now chimove keu lu hokidelo, eno asahuli lo shosü kevilo.

⁴ Ampeu lau nongu phighüyiko ghalo, nongu mlo yiko ikhivelo, Judah ngo Jerusalem lo küami; tikumo aye no lhoksa ghenguno I loghu no ami toi khunomu ghapinhe mla kepushi piti nani.”

Ahuu no Amhekiqipu

⁵ Judah lo asheshu lo, eno Jerusalem lo pikülha lo, “Ayeghi kümtsü lo afuko ighalo, ighamku pilo, ‘Kumqolo, ningu aliwo kumto mishighüna lo iloni!’

⁶ Zion küdau amchipu peqhelo, süsho lunike ngomo no polulo, kughengu ahuu no I no amhekiqi, kütsakungo kije süghini cheni.

⁷ Abongshuu, shiye kükütsau ye pa kungoa ghasa lono ipevae; pa ye no yeghi pighive tsüni ke pa a lono ipevae; now mishighüna ye ixapinyi küghüna move nani.

⁸ Hi ghenguno yeqhiyephi pepulo, mlolo eno amlo kighishi shilo, kughengu Ampeu mlokighide ye ningu launo tsüghüsü womoae.”

⁹ “Tipau tsala lo, Ampeu no asheshu, kükamiqo eno kijemi ngo amlo kumtomi ghi ikiqive nani. Achinemi no thüghüive nani, eno tungkupmi no kichimamaive nani.”

¹⁰ Ikehu I no pi, “Ya, Ampeu Alhou, kuchou no Nono ishi pikeu lono timi hipaqo eno Jerusalem qhoi pishiqhivae, ‘Hi ye o ghenguno akivi shinani,’ ikemu azütakikihi no panongu shou ikughivae.”

¹¹ Tipa ghuloki lo timi hipaqo eno Jerusalem vilo pi nani, “Asayeqha lo agha itsümo keu toghi lono amülhü kushu Iw timi ilimiqo küdau fupuku, ti ye fule nike momu shikimthe nike kumo,

¹² ighono amülhü kümka I lau ighi ani. Itehi ye I no panongu shou atsa kükügha pipukuni.”

¹³ Julo, pa ye khüngküsü toi cheni; paw khurkuluqo no miyitsü toi; paw khurshiqo no alhuqu nguno mthüthei, ningu ye ahasapue, ningu ye pühavae!

¹⁴ O Jerusalem, o xalu pekepu shi o mlo lono alhoksa qhuvelo. Khitohi o lolo kixikila kükümsü pekütsü püani kea?

¹⁵ Dan lo asütsa lakhi asheshu ani, eno Ephraim naghuto lono aküküpna kütüghü ani.

¹⁶ Pa ye cheni pi Shiyeqo kütülo; Jerusalem lau asheshu lo, “Putou yeghi lono leni kemi cheni; panongu no Judah phughiqo shou aghüleku ani.

¹⁷ Li no I mjochile kehu panongu alu khemi toi li botha luvae, Ampeu no asheshu.

¹⁸ O laghiqo eno o kümlaqo no o shou hipau süghivae. Hi no o ghimepu tsala, hi ye khumtsai o mlo kutolo ilo chuxutsü ani.

Judah Küghüveni keu

¹⁹ I mlo ghime, I mlo ghime, ni ye aküsü lono ihi ani! O I mlo ghuju! I mlo no kukushi itha ani; ni ye inaqhoi ngolu amoe kughengu aghükishi kütüghü keu fuko ghügha chilu ani.

²⁰ Hephole keu shelo hephole; ayeghi kümtsü kütsalevae. I phikiqo ghi züleno kütsavae, paikhavi no I künhaphi kühavae.

²¹ Khitohi ni ye michiphi ithulu eno afuko ghügha chiluni kea?

²² “Kughengu Iw timiqo ye küghüzümi; panongu ye Ni ithi amoe; panongu ye akükümsü küha keu tianuliqoe; panongu ye vethakulu kühae. Panongu ye alhoksa kümla lo alotsüe! Ikemu kishino akivi mlani keno panongu ye ithimoe.”

²³ I no ayeghi jukelo ti ye kogheküghü kühano kümsae; eno atsütsü no aküvü kühae.

²⁴ I no naghutoqo jukelo tipaqo ye itha ae, eno atoghiqo no sükujokiji ae.

²⁵ I no jukelo timi khumu kühae, eno aghauqo kümtsü yeuve.

²⁶ Ampeu xukighide zülo, I no jukelo kinikülü yeghi no asayeqha shive, mishighüna kümtsü ixapinyive.

²⁷ Kughengu Ampeu no ishi piani, “Ayeghi kümtsü pighive niae, tishimu Ni ye qhoi kishekhave tsümo nani.

²⁸ “Hi ghenguno ayeghi no mlo nani, eno kunguu atsütsü no aküzü shive nani; kughengu I no piphevae; I no kughuvae; Ni ye kümsüchile monani, momu Ni ye ideighimo nani.”

²⁹ Khurshimi eno asüzü kipemi ghügha zülo mishighüna kümtsü no po nani; panongu no aghasa lo ilo nani, khami no atuqu lo mgho iku nani; mishighüna kümtsü qhive nani, eno khunomu tipaqo lo küghüna move nani.

³⁰ O no pighive keu, tsülabei keu nanu pepu eno ameshoyi nanu pepusü o nhethi kije shi nudapu akeu kiqi ye kiu kea? Adou lono o jukivipu shi ani. O lojilimi no o thaigha ani; panongu no o küxü phu ani.

³¹ Topumi no apunu küsü ghügha shi aketoi I no chilu; li no anga punu tüghülo ijuke toi Zion limi ye atuthu shekukuno qa ani, li u chhopuwu ani, “I hasapue! Ghikiqhimi zülo ni ye thiqhi ani.”