JEREMIYA 39 - Sumi Naga CL (Re-edited) Bible (BSI)

Jerusalem Ikiqive

¹ Judah kükau Zedekiah yepe mpe atokuu aqhi achighiu lo Nebuchadnezzar ngo paw ghüshimi kümtsü no Jerusalem leighi no khasü luve.

² Zedekiah yepe mpe chighiaqhaqhiu, aqhi abidiu atsala atokuu shiake lono aliwo hepho iloghive.

³ Tile Babylon kükauw hiyampemi no ighi no khagho mta lo iqa: Samgarmi Nergal-sar-ezer, kijemi tou Nebu-sar-sekim, aqhi ayepu kiphimi Nergal-sar-ezer, eno Babylon kükauw hiyampemi kümtsü.

⁴ Kughou Judah kükau Zedekiah ghüshimi no ti ithulu keno panongu ye pove, akükau ghutu lo atupikiye kini dolono khagho vechesü panongu ye Arabah küdau wuve.

⁵ Ikemu Chaldeami ghüshimi panongu hawuno Jericho qa lono Zedekiah haluve. Panongu no pa küghape Hamath yeghi Riblah lo Babylon kükau Nebuchadnezzar lau saghi, pa ghimeni keu za tsüve.

⁶ Babylon kükau no Riblah lono Zedekiah nuliqo pa nhethe lono ghiqhive tsü, eno Judah lo ghenimi kümtsü ghiqhive tsü.

⁷ Pa no Zedekiah nhethi lejove tsü, pa nhethi khave tsüno sasü Babylon lo wuve.

⁸ Chaldeami no akükau ki eno timiqo ki pitive tsü, eno Jerusalem tupikiye ghi hepholeve tsü.

⁹ Tishino kepten Nebuzaradan no mishighüna lo timi achili akeqo, pa lau po ighive keqo, kümtsü kughu sasü Babylon lo wuve.

¹⁰ Kepten Nebuzaradan no tipa ghuloki lo kumlhomi khami kiumu küha kemi Judah yeghi lo panoqo pelo atsailu eno alu chilu penike qhive.

Ampeu no Jeremiah Xaphelu

¹¹ Babylon kükau Nebuchadnezzar no Jeremiah ghenguno ishi Nebuzaradan azah tsü,

¹² “Pa salu no akivishi jukuto lo, pa ghime kevi, ikemu pa no o vilo pike toi pa peitha lo.”

¹³ Ikehu Nebuzaradan, kijemi atomi Nebushazban ngo Nergal-sar-ezer, eno Babylon kükauw hiyampemi atomi no

¹⁴ timi puwu no akhemi bokütha lono Jeremiah saluve. Panongu no Jeremiah pesü Shaphan nu, Ahikam nu Gedaliah pelo pa ki lono tucho penike tsüve. Ikehu pa ye timiqo gholo xülue.

¹⁵ Akhemi bokütha lo Jeremiah khatha püake lono pa lau Ampeu tsa ighi:

¹⁶ “Ebed-Melekh Ethiopiami lau wuno pilo, ‘Israel Lhou, aqokitikhi MPEU no ishi piani: I no mishighüna hipau shou akivipu kumono aküsapu pipuku keu tsa shikupu nani, eno ti ye tipa tsala lo o zülono shikupu nani.

¹⁷ Ikemu tipau tsala lo I no o xaphelu nani, ipi Ampeu no sheshu ani, o pesü nono msa akemi u lo süvetsü monani.

¹⁸ Kughengu I no kuchou no o xalu nani, no ye ghüyi lono womo nani, ikemu aghüshi lono aküxü pükhalu nani, kughengu nono I shou pükhübe ke, ipi Ampeu no sheshu.’”