JEREMIYA 38 - Sumi Naga CL (Re-edited) Bible (BSI)

Atughuko lo Jeremiah Süve

¹ Jeremiah no timiqo vilo ishi pi akeu tsa Mattan nu Shephatiah, Pashhur nu Gedaliah, Shelemiah nu Jucal, eno Malchiah nu Pashhur no chilu,

² “Ampeu no ishi piani: Khuu no mishighüna hipau lo ngo ani keno azütakikihi, püqümiye, eno püsa lono thive nani, ikemu khuu no Chaldeami lau wuni keno xünani. Pa ye aghüshi lono aküxü pükhalu nani.

³ Ampeu no ishi piani: Mishighüna hipau ye mtsümishei Babylon kükau ghüshimi u lo süve tsüno pa no luve nani.”

⁴ Tileno Hiyampemi no akükau vilo pi, “Timi hipau ye pithive kepue, kughengu pa no atsa hipaqo panongu lau pikeu lono mishighüna hipau lo ghüshimi akeqo shikimqeve ani eno timiqo ghüthi püsüve tsü ani. Kughengu pa ye timiqo kivipu kumono pano ghüzapu phu anie.”

⁵ Akükau Zedekiah no pi, “Julo, pa ye nongu u lo ani, kughengu akükau ye nongu külave mlae.”

⁶ Ikehu panongu no akükau nu Malkhiah tughuko, akhemi bokütha lo akeu lo akighi pesü Jeremiah kighiti süve. Atughuko tipau lo azü kühano aniba likhi, ikehu Jeremiah ye aniba lo ilove.

Atughuko lono Jeremiah Xaphe

⁷ Kughou Ethiopiami shoko Ebed-melekh, akükau kilo achekeu no Jeremiah ye atughuko lo vesüvae pi chilu keno, akükau no Benjamin Khagho lo iqa ake lono

⁸ Ebed-Melekh no akükau kilo wuno pa vilo pi,

⁹ “I mpeu akükau, panongu no tungkupu Jeremiah pesü atughuko lo vesüve keu ye alhoksa shivae, pa ye akhü lono thiniae kughengu mishighüna lo asho kühavae.”

¹⁰ Akükau no Ethiopiami Ebed-Melekh azah tsü, “Hileno timi shighi o gholo sawu no Jeremiah no thimphi lono atughuko lono pa ikhiphe luvelo.”

¹¹ Ikehu Ebed-Melekh no timiqo sasü akükau kilo anhemgha kiqhi-a lo wuno aphimini küixüqa pesü atughuko lo Jeremiah lau akighi lono kighiti piqitsü.

¹² Ebed-Melekh no Jeremiah vilo pi, “Aphiminiqa pesü o kichiqho lo tsaluvelo.” Jeremiah no tishive.

¹³ Tishino panongu no akighi pesü atughuko lono Jeremiah sünhephe luve. Jeremiah ye akhemi bokütha lo ngove.

Jeremiah no Zedekiah Ghutu

¹⁴ Akükau Zedekiah no timi puwu no Ampeu chineki ikulo la aküthüu lono Jeremiah salu. Akükau no Jeremiah vilo pi, “I no o vilo ighikuju lakhi inijuni; I zülo no kiumu küsü kevilo.”

¹⁵ Jeremiah no Zedekiah vilo pi, “I no o khochile kelo no ye kuchou no I pithivemo nima? I no o mijetsü namu nono I tsa inimo nani.”

¹⁶ Akükau Zedekiah no tuqhou shi Jeremiah lau ashoqhi shi, “Ampeu xü akeu no ningu ngulho lhoke, ni ye o pithimo momu o küghape o küxü phuche kemi u lo süvetsü monani.”

¹⁷ Ikehu Jeremiah no Zedekiah vilo pi, “Ampeu, aqokitikhi Lhou, Israel Lhou no ishi piani: Nono Babylon kükau hiyampemi lau no liqhipe tsüve aye, o küxü ghülu nani, eno mishighüna hipau ye ami no pitimo nani, no eno o kibo ye xülu nani.

¹⁸ Ikemu nono liqhipe tsümo aye, mishighüna hipau ye Chaldeami u lo süvetsü nani, panongu no ami pesü hipau pitive nani eno no ye panongu u lono polumo nani.”

¹⁹ Akükau Zedekiah no Jeremiah vilo pi, “Ni ye Jewmi Chaldeami lau wuve keqo msa ani, panongu no I pesü Chaldeami u lo süve tsüno I kijipüsa nosae.”

²⁰ Jeremiah no pi, “O pesü panongu tsümo nani, I no kiu o vilo pi ani keno itehi Ampeu tsa lulo, tishiaye o ghenguno akivipu shinani eno o küxü ghülu nani.

²¹ Ikemu nono liqhipe tsüni keu milive aye, Ampeu no kungunhetsü hipau I piye püani:

²² Julo, Judah kükau kilo akemi totimi kümtsü sasü Babylon kükauw hiyampemi lau ipeghi nani, panongu no ishi pi nani, “‘Nono pükhükulu küsami no o pishiqhive no o shou toluvae; itehi o pukhu ye aniba lo ilovae, panongu ye o launo wuvae.’

²³ Nongu nipu eno atianuli kümtsü Chaldeami lau sawuve nani, no ampi ghi panongu u lono pomla no Babylon kükau no küghaluve nani, eno mishighüna hipau ye ami no pitive nani.”

²⁴ Tile Zedekiah no Jeremiah vilo pi, “Timi khuu pelomu atsa hipaqo ithipe kevilo, eno no ye thimo nani.

²⁵ I no o pütsa keu hiyampemi no chiluve no o vilo, ‘Nono akükau vilo kiu pi eno akükau no kiu pi keno ni vilo pilo; kiumu ni launo küsü kevilo tishiaye ningu no o pithimo nani,’ ipi aye,

²⁶ panoqo vilo pilo, ‘Ni ye akükau vilo I pesü Jonathan kilo akiniu puwu no tilau no thivepe kevilo pi qhüinijue.’”

²⁷ Tileno hiyampemi kümtsü no Jeremiah lau ighi no pa vilo ighiju, pa no akükau no mijetsü ketoi panongu khochileve. Ikehu panongu no pa pütsa tave, kughengu akükau sasü küptsa keu tsa kiumu chilu moveke.

²⁸ Tishino Jeremiah ye Jerusalem leluve moke tsala kutolo akhemi bokütha lo ngove.