JEREMIYA 37 - Sumi Naga CL (Re-edited) Bible (BSI)

Jeremiah no Zedekiah Ghutu

¹ Josiah nu Zedekiah khuu Babylon kükau Nebuchadnezzar no Judah yeghi lo akükau shipe keno pa no Jehoiakim nu Coniah theli lo ayepe.

² Ikemu pa na, paw kijemi momu ayeghi tipau lo timiqo namu tungkupu Jeremiah vecheo Ampeu tsa pikeu initsü moe.

³ Akükau Zedekiah no Shelemiah nu Jehucal, eno Maaseiah nu achineu Zephaniah pama tungkupu Jeremiah lau puwu no pipe, “Kimiyeno Ampeu ni Lhou lau ni ghenguno inikhu tsülo.”

⁴ Jeremiah ye ti kutolo timi gholo ipeilolu ae, kughengu pa küghape akughuki lo sümphike.

⁵ Pharaoh ghüshimi no Egypt lono ighive, eno Chaldeami no Jerusalem khasü akelono asütsa hipau chilu kelo panongu ye Jerusalem lono idewove.

⁶ Tileno Ampeu tsa Jeremiah lau ighi:

⁷ “Israel Lhou Ampeu no ishi piani: Judah kükau, khuu no I vehu ighiju penike I lau o puwu keno pa vilo pilo, ‘Julo, Pharaoh ghüshimi o kuphuni ke ighikeu ye pano yeghi Egypt lo idewo niye cheae.

⁸ Eno Chaldeami no idechile ighi no mishighüna hipau sasü aghüshi nani. Panongu no mishighüna khasüluve nani eno ami no pitive nani.

⁹ Ikehu Ampeu no ishi piani, Nongu ampi pishiqhi ishi pi kevilo, “Chaldeami ye ni launo wuve nani,” kughengu panongu ye wumo nani.

¹⁰ Nongu no Chaldeami ghüshimi no sasü aghüshi akemi qhoi leluve no izave kemi likhi aphiki lo qhive namu, panongu no ithughi no ami pesü mishighüna hipau pitive tsü nani.’”

Jeremiah pesü Akughu shive

¹¹ Kughou Pharaoh ghüshimi no kupunu ighive kehu Chaldeami ghüshimi ye Jerusalem lono shothive keno,

¹² Jeremiah no paw timiqo gholo pa mheghi ighini ke Benjamin yeghi lo wuniye Jerusalem lono ipeghi.

¹³ Pa no Benjamin Khagho lo ighi kelo Hananiah nu Shelemiah nu aghukheu Irijah no pa tsüqü luve no pi, “No ye hipa-a qhive no Chaldeami lau pocheae.”

¹⁴ Jeremiah no pi, “Ti ye akimki; Ni ye Chaldeami lau wu chemoe.” Ikemu Irijah no pa tsa ini tsümo, eno Jeremiah küghape hiyampemi lau ighi.

¹⁵ Hiyampemi no Jeremiah ju axuideve, eno pa heqhi no pa pesü akiyeu Jonathan kilo akughu shive, kughengu ti ye akughuki shi püake.

¹⁶ Kughou Jeremiah no zümoi keu kughuki lo wo atsala kutomo ngove keno,

¹⁷ Akükau Zedekiah no Jeremiah ghenguno timi puwu no pa saluve. Akükau no pa ki lono tuqhou shi pa vilo ighiju, “Ampeu launo atsa kiuala ani keshea?” Jeremiah no pi, “Iyei.” Tileno pa no pi, “No ye Babylon kükau u lo phesüve tsü nani.”

¹⁸ Itaghi Jeremiah no Akükau Zedekiah vilo pi, “Ni ye no eno o qemiqo lau momu timi hipaqo lau akumou kiu mlave keno I küghape akughuki lo süve kea?

¹⁹ Ow tungkupmi khunoqo no o vilo, ‘Babylon kükau ye no eno ayeghi hipau leighi monani’ ipi tungkuptsa piche keno, tipaqo ye khilave akea?

²⁰ Itehi kimiyeno inilo, O I mpeu akükau: I no aqhokigheu lono o qhüiniju akeu ye akiyeu Jonathan kilo I puwu kithe kevilo, tikumo aye ni ye tileno thiniae.”

²¹ Ikehu Akükau Zedekiah no azah tsüno Jeremiah pesü akhemi bokütha lo qhive. Tishino mishighüna lo asho kühave moke kutolo tsalakipetsü asho kümla laghila lono ashopa lakhi süwo pa tsüche. Ikehu Jeremiah ye akhemi bokütha lo ngove.