JEREMIYA 36 - Sumi Naga CL (Re-edited) Bible (BSI)

Liküküzü Kaku Pitive tsü

¹ Josiah nu Jehoiakim, Judah kükau yepe mpe abidiu lo Ampeu tsa Jeremiah lau ighi:

² “Liküküzü kaku lakhi pesü I no Josiah ghuloki lono ishi kutolo Israel ngo Judah eno shiye kümtsü küla keu tsa o vilo pive keu kümtsü yepe qhilo.

³ Ishiake Judah lagha ye I no pano shou kütsakungo nike kughu akeu chilu no kümtsü no pano lhoksa lono tsüghü ighi luvi, tishianguno I no pano kipimi xine qhitsü nani.”

⁴ Tile Jeremiah no Neriah nu Baruch ku, eno Ampeu no pikeu tsa kümtsü Jeremiah no Baruch vilo shetsü kelo Baruch no liküküzü kaku lo yesüve.

⁵ Jeremiah no ishi Baruch azah tsü, “Ni ye Ampeu kilo wuni keu lakhavae,

⁶ tighenguno nono wuni, eno kümvü ake tsalani Ampeu ki lono timi kümtsü no chikulupu shi Ampeu tsa I no mije tsükeu liküküzü kaku lono phisüni. No ye Judah lo mishighünaqo lono ighi kemi no chikulupu shi phisüni.

⁷ Ishiake panongu no kimiye tsü penike Ampeu zülo qhüiniju luvi, eno kümtsü no Ampeu mlokighide eno aloghu panongu shou shuphe püakeu no kije kehu pano kümla lhoksa lono tsüghü ighi luvike.”

⁸ Jeremiah no azah tsüke toi Neriah nu Baruch no Ampeu kilo liküküzü kaku lono Ampeu tsa phisüve.

⁹ Josiah nu Judah kükau Jehoiakim yepe mpe apunguu aqhi atokuu lo Judah mishighünaqo lono Jerusalem lo ighi kemi kümtsü no Ampeu zülo kümvü nike kütüghü.

¹⁰ Tileno timi kümtsü no chikulupu shi Baruch no Jeremiah tsaqo liküküzü kaku lono Ampeu kilo, Shaphan nu akiyeu Gemariah chebo lono phisü, ti ye Ampeu ki Khagho Akitheu ikulo laghi kunguu lo ani.

¹¹ Kughou Shaphan nu Gemariah nu Micaiah no liküküzü kaku lono Ampeu tsa chilu keno,

¹² pa no akükau kilo akiyeu chebo lo ilo, tile hiyampemi kümtsü iqa aghi: akiyeu Elishama, Shemaiah nu Delaiah, Achbor nu Elnathan, Shaphan nu Gemariah, Hananiah nu Zedekiah, eno kijemi kümtsü.

¹³ Baruch no timiqo no chikulupu shi liküküzü kaku lono phisü keu Micaiah no chilupe panongu vilo qhoi pi.

¹⁴ Tile hiyampemi no Cushi nu, Shelemiah nu, Nethaniah nu Jehudi pelo Baruch vilo pi penike puwu, “Timiqo no chikulupu shi phisü keu liküküzü o u lono peighilo.” Ikehu Baruch no liküküzü kaku pa u lono pesü panongu lau ighi.

¹⁵ Panongu no pi, “Iqa no ti phisülo.” Ikehu Baruch no panongu lau phisü tsü.

¹⁶ Kughou panongu no atsaqo chilu keno akümsa launo tsüghüwo lakhino lakhi kujukile. Panongu no Baruch vilo pi, “Ningu ye atsa hi kümtsü pesü akükau lau pithi masae.”

¹⁷ Tishino panongu no pi, “No ye kishino atsa hipaqo yelu keno ni vilo pitsü nima? Hi ye Jeremiah no shetsü keo?”

¹⁸ Baruch no khochile, “Pa no atsa hi kümtsü I lau shetsü eno I no kiyezü pesü liküküzü kaku lo yesüe.”

¹⁹ Hiyampemi no Baruch vilo pi, “Wulo eno Jeremiah nokujo ye itshüve lo, timi khuu pelomu nokujo khile ani keno ithipe kevilo.”

²⁰ Tishino panongu no akükau kilo wuno liküküzü kaku pesü akiyeu Elishama chebo lo qhive, eno panongu no atsa kümtsü pesü akükau pithi.

²¹ Akükau no liküküzü süghi penike Jehudi puwu, pa no akiyeu Elishama chebo lono liküküzü kaku pesü akükau eno pa phivilo puthugho akemi kijemi lau phisütsü.

²² Ti ye aqhi atokuu shia, akükau ye süsü kilo iqa ae, pa zülo amibo lo ami iqüae.

²³ Jehudi no kokütha do küthü eno bidi phi aphi lono akükau no azütachi ikhilu no tipaqo ghitha pe qhoi piti khave moke kutolo amibo lo vesüve.

²⁴ Ikeghi akükau na paw kijemi atsa chilu kemi namu khunomu msamoe, momu pano phimini süxümoe.

²⁵ Elnathan, Delaiah eno Gemariah no akükau pelo liküküzü kaku pitipe monike qhüiniju kemu akükau no panongu tsa ini tsümo.

²⁶ Akükau no kükapuu Jerahmeel, Azriel nu Seraiah, eno Abdeel nu Shelemiah pelo akiyeu Baruch eno tungkupu Jeremiah küghaluve penike azah tsü, ikemu Ampeu no pama küsüve.

²⁷ Jeremiah mijekütsü lono Baruch no liküküzü kaku lo yekeu Akükau no pitive tsüke thiu Ampeu tsa Jeremiah lau ighi:

²⁸ “Liküküzü kaku atüghüu Judah kükau Jehoiakim no pitive tsükeu lo akeu tsa kümtsü liküküzü kaku kütau lakhi lo yesülo.

²⁹ Judah kükau Jehoiakim vilo pilo, ‘Ampeu no ishi piani, Nono ishi pipüzü liküküzü kaku hipau pitivae, “No ye kushiye tipau lo Babylon kükau no mtsüqhei ighi no ayeghi hipau kütsave nani eno timi ngo tüghashi pühave tsü nanie pi yepuku kea?”

³⁰ Tighenguno Ampeu no Judah kükau Jehoiakim ghenguno ishi piani: David kükalakhü lo iqani kemi pa müzülo lakhimu kühave nani, pa sükumo ye khalau puchou akülü no pügha nani eno putho lo avütsa no ghaqhi nani.

³¹ Panongu xine ghenguno I no pa eno pa tikughuko ngo pa qemiqo ghime nani. I no amhekiqi shupheve ketoi panongu shou eno Jerusalem ngo Judah lo timiqo shou süghi nani, ikemu panongu ye ini tsümo nani.’”

³² Ikehu Jeremiah no liküküzü kaku kütau pesü Neriah nu akiyeu Baruch tsü. Eno Baruch no Judah kükau Jehoiakim no pitive tsükeu liküküzü kaku lo Jeremiah no shetsü keu tsa kümtsü yesüve. Atsa kimihi keu kutomo tipa gholo süküqhave.