JEREMIYA 35 - Sumi Naga CL (Re-edited) Bible (BSI)

Rekhabmi Ghokulu

¹ Josiah nu, Judah kükau Jehoiakim ghuloki lono Ampeu tsa Jeremiah lau ighi:

² “Rekhabmi limi lau wuno panongu sasü Ampeu kilo achebo lakhi lono pütsalo; tishino atsaiji piyelo.”

³ Ikehu I no Habazaniah nu, Jeremiah nu Jaazaniah eno pa thiküzümi ngo pa nuliqo eno Rekhab limi kümtsü lau wu.

⁴ I no panongu sasü Ampeu kilo Igdaliah nu Alhou timi Hanan, eno pa nuliqo chebo lo ighi, ti ye hiyampemi chebo, khikhi ahukikha kheu Shallum nu Maaseiah chebo shou akeno tipau loke.

⁵ I no Rekhabmi zülo atsaiji chhitoi lesü no ajukhuqo qhitsü, eno panongu vilo “Atsaiji sholo” ipi.

⁶ Ikemu panongu no khochile, “Ningu ye shomoe, kughengu ningu pasü Rekhab nu Jonadab no azah ningu tsüe, ‘Nongu na nongu nuli namu alholo atsaiji shomoni.

⁷ Nongu ye aki lakhimu shiqhe moni; nongu ye athi xusü moni; momu atsaibo shosü no chimoni; ikemu nongu küxü kupuju lo aphiki lo xüni, tishianguno nongu no ayeghi khile ngoni keno ado kushuo xülu nani.’

⁸ Ningu ye ningu pasü Rekhab nu Jonadab no azah ni tsükeu aghokulu shi ighivae, ti ye ni küxü kupuju lo ningu na ningu nipu, ni tianuliqo namu kümtsü atsaiji shomo nani,

⁹ momu ngokepu ki shimo nani. Ningu ye atsaili momu alu eno athi xusü chemoe,

¹⁰ eno aghokulu shi aphiki lo ngono ningu pasü Jonadab no azah tsükeu shisü ighivae.

¹¹ Ikemu Babylon kükau Nebuchadnezzar no ayeghi lenike ighi kelo ningu no pi, ‘Ighilo, ningu Chaldeami eno Syria ghüshimi kümsa ghenguno Jerusalem lo wuveni.’ Ikehu ningu ye Jerusalem lo xüani.”

¹² Tile Ampeu tsa Jeremiah lau ighi:

¹³ “Israel Lhou, aqokitikhi MPEU no ishi piani: Wuno Judah ngo Jerusalem lo küxümi vilo pilo, Nongu ye I kükütsu tsaqo ini moni keshea? Ampeu no asheshu.

¹⁴ Rekhab nu Jonadab no pa tikughukomi lau atsaiji shomoni keu za tsükeu ye pechephi, eno ishi kutolo panongu ye shochemoe, kughengu panongu ye pano pasü no azah tsükeu gholue. Ni ye tamo mithe nongu vilo pive akemu nongu no I tsa inimoe.

¹⁵ I no nongu lau I qemi tungkupmi puwu, eno tamo mithe puwu no panongu no picheni, ‘Itehi nongu kümtsü alhoksa laghi launo tsüghüve lo, no kümla kililo, kütau lhouqo huthuni ke papewu kevilo, tishiaye nongu ye I no nongu eno no puasüqo tsükeu yeghi lo xülu nani.’ Ikemu nongu no akini kugho puwomo momu I tsa inimoe.

¹⁶ Rekhab nu Jonadab kughuko ye pano pasü no azah tsükeu pelu ikemu timi hipaqo ye I gholumoe.

¹⁷ Tighenguno, aqokitikhi Mpeu, Israel Lhou no ishi piani: Julo, I no shupheve ketoi Ni ye Judah ngo Jerusalem lo küghüna küami kümtsü shou kütsakungo süghini cheni, kughengu I no panongu vilo pi anamu panongu no initsü moe, I no panongu ku keghi panongu no khochile moe.”

¹⁸ Ikemu Jeremiah no Rekhab limi vilo pi, “Israel Lhou, aqokitikhi MPEU no ishi piani: Nongu pasü Jonadab no azah eno ayezah tsükeu kümtsü nongu no pelue,

¹⁹ tighenguno Israel Lhou aqokitikhi MPEU no ishi piani: Rekhab nu Jonadab ye I huthuni keu timi khilemu püqüve mo nani.”