JEREMIYA 34 - Sumi Naga CL (Re-edited) Bible (BSI)

Zedekiah Kithi

¹ Babylon kükau Nebuchadnezzar no paw ghüshimi, ayeghi lo pa yekipe qholo kükaqha, eno ashiaye kümtsü no Jerusalem ngo tile mishighünaqo sasü aghüshi ake lono Ampeu launo atsa Jeremiah lau ighi:

² “Israel Lhou, Ampeu no ishi piani: Wuno Judah kükau Zedekiah vilo pilo, ‘Ampeu no ishi piani: Julo, I no mishighüna hipau pesü Babylon kükau u lo süvetsü ani eno pa no ami pesü pitive nani.

³ No ye pa u lono pomla nani ikemu mtsüqheino o küghape pa u lo phesüve nani. Nono anhethi no anhethi eno agi no agi kithe ghi Babylon kükau ithulu no pütsa nani. No ye Babylon lo wuve nani.’

⁴ Tishimu Ampeu tsa inilo, O Judah kükau Zedekiah! Ampeu no o ghenguno ishi piani: ‘No ye azütakikihi lono thimo nani.

⁵ No ye iqüghai thinani. O züumi kükami o punoqo kithi lo axokütsüngü pitike toi, o ghenguno timiqo no axokütsüngü piti no mloqa ghi ishi pi nani, “Aha, ampeu!”’ Kughengu I no piqhivae, ipi Ampeu no sheshu.”

⁶ Jeremiah no Jerusalem lono atsa hi kümtsü pesü Judah kükau Zedekiah vilo pikeu ye

⁷ Babylon kükau ghüshimi no Jerusalem ngo Judah lo mishighüna ashekhau Lachish eno Azekah sasü aghü shiake lonoe, kughengu hiküma ye Judah lo aliwo kumto mishighüna ke.

⁸ Akükau Zedekiah no timiqo sasü Jerusalem lono puloshoqhi shive no timiqo lau kuqhokiphe pikülhave kethiu Ampeu tsa Jeremiah lau ighi,

⁹ ti ye timi kümtsü no Hebrew qüaxemi kiptimi totimi kuqhopheve peniye, tishikeu lono khunomu athiküzümi Jewmi pesü aqüaxe shipemo niye ke.

¹⁰ Puloshoqhi shikemi hiyampemi eno timi kümtsü no aghokulu shi kiptimi na totimi namu aqüaxemi kuqhove eno tsügha kithemo nike pulove. Panongu no agholu no kuqhophe khave.

¹¹ Ikemu athiu ye panongu no tsüghüwo kuqhopheve kemi kiptimi totimi aqüaxemi itaghi sachile luve eno aqüaxe lo süve.

¹² Jeremiah lau Ampeu tsa ighi:

¹³ “Israel Lhou, Ampeu no ishi piani: Ni ampi no Egypt kughuki lono no puasüqo saipeghi kelono panongu sasü puloshoqhi shino pi,

¹⁴ ‘Ampe tsüni shekha lo Hebrewmi khunoqo o lau jesüve no ampe tsügho o qeve akeno no ye panongu kuqho pheveni; o kümlapu lono no ye pa pelo ililaive peni.’ Ikemu no puasüqo no I tsa inimo eno panongu kini mu I lau kugho puwomoe.

¹⁵ Nongu no anileshi xaide ighi no I nhethi lo kiu no achipi keno mlae, pütüta kisüghümi lau kuqhokiphe sheshu, eno I je lono ku keu ki lono I zülo puloshoqhi shike,

¹⁶ ikemu nongu no tsüghüwo pütüta qüaxemi kiptimi totimi, pano kupulo lono kuqhopheve keqo, sachile luve keu lono I je shipixive, eno nongu no panongu pesü aqüaxe lo süveke.

¹⁷ “Tighenguno Ampeu no ishi piani: No ye I gholu ghi athiküzümi eno akisüghümi lau kuqhokiphe pikülha move; julo, I no azütakikihi, püsa, eno püqümiye lono ikiqiveni keu kuqhokiphe pesü o kütüghü ani, ipi Ampeu no sheshu. I no o pesü ayeghi lo kükaqha kümtsü lau kümsapu shitsü nani.

¹⁸ Timi khunono Iw puloshoqhi pepimive eno I zülo puloshoqhi beküthaqo pemoni keno I no panoqo pesü panongu no amshiti xapha kini shipe tipau mta lono wuke toi shitsü nani,

¹⁹ Judah ngo Jerusalem hiyampemi, shokomi, achinemi, eno timi kümtsü amshiti xaphave keu mta lono wuke.

²⁰ I no panongu pesü pano ghümi eno pano küxü phuche kemi u lo süvetsü nani. Pano kithi kumo ye amülhü lo aghauqo eno ayeghi lo tüghashiqo chuqupu shinani.

²¹ Judah kükau Zedekiah eno paw hiyampemi ye I no pano ghümi u lo süvetsü nani, eno pano küxü phuche kemi u lo süvetsü nani, nongu launo wuve kemi Babylon kükau ghüshimi u lo süvetsü nani.

²² Julo, Ampeu no sheshu, I no azah tsüno panongu sasü mishighüna hipau lo ighi nani. Panongu no mishighüna sasü aghüshi nani eno ami no pitive tsü nani. I no Judah mishighünaqo pighive tsüno timi küghüna movepe nani.”