JEREMIYA 33 - Sumi Naga CL (Re-edited) Bible (BSI)

Külakishi Shoqhi

¹ Aghukhemi bocho lo khathape püake dolono Ampeu tsa ghuthu akiniu Jeremiah lau ighi:

² Ampeu khuu ayeghi lho keno, khuu no tipau kughulho pe kogheküghü shi keno, Pa je ye Ampeu ke, Pa no ishi piani:

³ I ku ighilo eno I no o khochileni, nono ithimphi keu thime kije eno tuqhou I no o vilo pini.

⁴ Kughengu mishighüna lo aki eno Judah kükami ki kütsave keqo pesü leighi kemi no amoqhe puku akeu eno pano zütakikihi lono sükusho luniye akeu ghenguno Israel Lhou, Ampeu no ishi piani:

⁵ Panongu ye Chaldeami sasü aghü shinike cheni, ikemu I mlokighide eno I loghu lono ghiqhive kemi kithi kumo no chhitoive nani, kughengu pano kümla lhoksa ghenguno I no mishighüna hipau lono I gi küsüluve nani.

⁶ Julo, I no ashiaji kivi eno shikipivi süghi nani, eno I no panongu shipivi no kupukuno küakini eno sükusho pephe piye nani.

⁷ I no Judah ngo Israel kinigha athoputho tsü nani, eno pano küxü atüghü lo toi shiqhe tsü nani.

⁸ Panongu no I shou axine shikeu kipimi kümtsü I no shikimtheve tsü nani, eno I hekibide kipimi xine kümtsü qhivetsü nani.

⁹ Mishighüna hipau no ayeghi lo shiye khunono I no akivi mlakeu sütsa chilu cheni keno, kümtsü zülo alokivi, ajekipi, shekiqhe eno agigihu pesü I tsü nani. Tipaqo no msa khokhoshi nani, kughengu I no akivi eno küakini pesü aphughi kümghatsü nani kehue.

¹⁰ “Ampeu no ishi piani: A-a hipau khikhi nono, ‘Hi ye pighive no timi ngo tüghashi mu kühavae,’ ipi cheni keno, Judah phughi eno Jerusalem laghila pighive no timi na tüghashi mu tile xüni kemi kühave keu-a lono itaghi hipaqo chilu nani

¹¹ alokivi kighilhe eno amlokiqi, külapuu eno külaliu lokivi sütsa, Ampeu kilo shikimthi kümllagho peighi kelo ale phekeu sütsa chilu nani: “‘Aqokitikhi MPEU lau shikimthi tsülo, kughengu Ampeu ye aloe, Paw iqemokeu kikimiye ye alholo acheni!’ Kughengu I no atüghü lo toi ayeghi kinigha tsüchile nani, ipi Ampeu no pi.

¹² “Aqokitikhi MPEU no ishi piani: Timi na tüghashi namu kühano pighive keu-a hipau lo, eno mishighüna kümtsü lo itaghi ambekhemi no küghüna no ambe loji kulhoqhi tsü nani.

¹³ Ato ghakhu lo, Shephelah lo, Negeb lo, Benjamin yeghi lo, Jerusalem hokümxa lo, eno Judah lo mishighünaqo lo ambe lojiqo ye khuu no panongu kihi cheni keno pa u qholo ngolu nani, ipi Ampeu no pi.

David lau Lhokta Puloshoqhi

¹⁴ “Julo, Ampeu no asheshu, I no Israel ngo Judah kibo lau tushoqhi püakeu shikupuni keu tsala cheni.

¹⁵ Tipa tsala eno aghuloki lo David ghenguno amikucho Loka lakhi I no ishe ipeghi penani, eno pa no ayeghi lo achipiu eno amikucho xakütha shinani.

¹⁶ Tipa tsala lo Judah ye xaluve nani, eno Jerusalem ye sükusho lono xülu nani. Aje hipau pe ishi ku nani: ‘Ampeu ye ni chipiu mikuchoe.’

¹⁷ “Kughengu Ampeu no ishi piani: David laghami ye Israel kükalakhü lo iqani keu kühave monani,

¹⁸ eno Levi chinemi ye I zülo akipti kümllagho, athi kipti kümllagho, eno aghakishi tsüni kemi kühave monani.”

¹⁹ Ampeu tsa Jeremiah lau ighi:

²⁰ “Ampeu no ishi piani: I no tsüküvü ngo tsüküzü qhipüa keu puloshoqhi nono hephove no tishikeu lono tsüküvü ngo tsüküzü no ado kiqi lono ipeghi move aye,

²¹ I qeu David sasü, eno Levi chinemi I zülo hukuthumi sasü I no puloshoqhi shi püakeu ghi hepho luve nani, tishianguno David ye pa kükalakhü lo ayepeni kemi kühave nani.

²² Atsütsü lo ayepuqo kihi khamla eno azüghi lo asaye mighi khamla ketoi, I no I qeu David ti kughuko küghüsü tsü nani, eno Levi chinemi I huthu chekemi ghi tishi tsünani.”

²³ Ampeu tsa Jeremiah lau ighi:

²⁴ “No ye timi hipaqo no, ‘Ampeu ye Pa no kishelu keu lagha kini kilevae,’ pikeu chhejumo keshea? Panongu no Iw timi pipüthavae, ikehu panongu ye pano zülo shiye lakhi kumovae.

²⁵ Ampeu no ishi piani: I no tsüküvü ngo tsüküzü sasü puloshoqhi shi püaghimo eno atsütsü ngo ayeghi akikithi lono püaghimo aye,

²⁶ Ni ye Jacob tikughukomi eno I qeu David ngo pa tikughuko lo timi lakhi kishepe Abraham, Isaac eno Jacob tikughuko shou yepeu shipemoni cheke. Kughengu I no pano kinigha tsüchile no panongu shou kimiyeqhiyi nani.”