JEREMIYA 32 - Sumi Naga CL (Re-edited) Bible (BSI)

Jeremiah no Alu Lakhi Qhü

¹ Judah kükau Zedekiah yepe mpe achighiu, ti ye Nebuchadnezzar yepe mpe chighiakütacheu lono Ampeu tsa Jeremiah lau ighi.

² Tipau ghuloki lo Babylon ghüshimi no Jerusalem khasüpe ae, eno Jeremiah ye Judah kükau kükaki lo aghukhemi bocho lo khathave.

³ Judah kükau Zedekiah no pa pesü akughu shive no pi, “Kushiye no ye, ‘Ampeu no ishi piani: Julo, I no mishighüna hipau pesü Babylon kükau u lo süvetsü ani, pa no ti leluve nani’ ipi tungkuptsa pi kea?

⁴ Nono pike, ‘Judah kükau Zedekiah ye Chaldeami u lono pomla nani, thebei no Babylon kükau u lo süvetsü nani, pa sasü agi no agi kithe küptsa nani, eno pa sasü anhethi no anhethi kithe ithulu nani.

⁵ Pa no Zedekiah sasü Babylon lo wuve nani, eno I no pa xuju moke kutolo pa ye tile anani, Ampeu no sheshu. Nono Chaldeami mjochile namu no ye tomla nani.’”

⁶ Jeremiah no pi, “Ampeu tsa I lau ighie:

⁷ Jualo, Shallum nu Hanamel, o pu thiküzüu no o lau ighi no ishi pi nani, ‘Anathoth lo I lu akeu qhüluve lo, kughengu xachilelu kepu chipiu ye ow ke.’

⁸ Tileno I tikishiu Hanamel no Ampeu tsa kiqi lono akhemi bocho lo I lau ighi no I vilo pi, ‘Benjamin yeghi lo Anathoth lo I lu akeu qhüluve lo, kughengu amheghi shi xachilelu kepu chipiu ye ow ke; qhüpe ow shilulo.’ Ikehu hi ye Ampeu tsa kepi I no ithive.

⁹ “Anathoth lo I tikishiu Hanamel lu I no qhüluve, eno ghükayi gram 200 hupe tsüve.

¹⁰ I no qhüluve keu jemchi shive no tipau chishidave, thopimi qhiluve eno ahu lono pisa mighiluve.

¹¹ Tishino aküqhü xakütha jemchi shive keu kiyepa eno jemchi sümokeu kiyepa I no luve.

¹² Eno aküqhü xakütha kiyepa pesü I tikishiu Hanamel ngo thopimi jemchi shikemi eno Judahmi akhemi bocho lo akemi nhethe lono I no Mahseiah nu Neriah, Neriah nu Baruch tsüve.

¹³ Hipaqo nhethe lono I no Baruch azah tsüno pi,

¹⁴ ‘Aqokitikhi MPEU, Israel Lhou no ishi piani: Aküqhü kiyepa jemchi shikeu eno shimo keu hipaqo lulo, eno ado kushuo qhilu kepushi ayeghi li lo süvelo.

¹⁵ Kughengu aqokitikhi MPEU, Israel Lhou no ishi piani: Aghakhu hipau lo aki alu eno atsailu ye qhükithe luni aphie.’

Vethakulupu Kighini

¹⁶ “Aküqhü kiyepa pesü Neriah nu Baruch tsüve kethiu I no Ampeu lau ishi inikhu:

¹⁷ ‘Ya, Ampeu Alhou! Nono atsütsü ayeghi O küka kuloghi lono eno O u sükhope mlae! O ghenguno kiumu kushokütsü kühae.

¹⁸ Nono qhethonhe lau iqemokeu kikimiye piye cheni, ikemu apuaza no pimive kelo pano tianuliqo lau aghime süghi cheni, No ye kije eno akughushu Lhou, O je ye aqokitikhi MPEU ke,

¹⁹ Ow kichekütsü ye kije eno O kümla ye akughushu, O nhethi no timi tianuli laghi kümtsü jukuto acheni, lakhikhi laghi eno pa kümla kiqi lono asaxü tsücheni.

²⁰ Nono Egypt yeghi lo amchipu eno akichiqhipu piye, eno ishi kutolo tishi ani, Israel lo eno timi jeli kümtsü gholo ishi ghi O jekipipu shi aphi.

²¹ O u kumto eno O u xachhope amchipu eno akichiqhipu kümla shino Nono Ow timi Israelmi Egypt yeghi lono saipeghi.

²² Nono pano puasüqo tsünike tushoqhi keu, akichhizü eno akhingozü qowu akeu yeghi panongu tsüe.

²³ Panongu no tile ilo no ayeghi pükhalu. Ikemu panongu ye O tsa gholumo eno O yezah lo cheche moveke. Nono panongu pelo shi penike azah tsükeu kiumu shimove. Tighenguno Nono panongu shou amhekiqi hipaqo pukutsüe.

²⁴ Julo, mishighüna leniye amoqhe pukuvae. Azütakikihi, püqümiye, eno püsa ghenguno mishighüna ye leighi akemi Chaldeami u lo süve tsüae. Nono kiu pi keno shikupu ani, eno Nono ti ithulu ani.

²⁵ Ikeghi O Ampeu Alhou, mishighüna ye Chaldeami tsüveamu Nono I vilo pike, “Pisa pesü alu qhülo eno thopimi qhilo.”’”

²⁶ Ampeu tsa Jeremiah lau ighi:

²⁷ “Julo, Ni ye Ampeu, timi kümtsü Lhou. I ghenguno kiu kiumu kushokütsü keshea?

²⁸ Tighenguno Ampeu no ishi piani: Julo, I no mishighüna hipau pe Chaldeami eno Babylon kükau Nebuchadnezzar u lo süve tsüni cheni, panongu no hipau leluve nani.

²⁹ Chaldeami no mishighüna hipau sasü aghüshi akelo ighi no ami süvetsü nani, eno aki khipaqo kütsüqa lono Baal lau akümllagho leqhitsü eno kütau lhouqo lau atsaiji kümllagho tsükeu lono I mlo shikighide cheni keno ti kümtsü pitive nani.

³⁰ Kughengu Israel ngo Judah tianuliqo ye pano lhothe lono ishi kutolo I nhethe lo alhoksa kümla likhi thono kütau kiumu shi püamoe. Panongu ye pano u no mlakeu pesü I mlo shikighide keu nguno alau ye kiumu mla püamoe, ipi Ampeu no sheshu.

³¹ Mishighüna hipau ye shiqheke tsala lono ishi kutolo I mlokighide eno aloghu xukutho tsüe, tighenguno I no I zülono ikhive nani,

³² kughengu Israel ngo Judah tianuliqo kümla lhoksa jeli no I mlo shikighide tsüke—kükami ngo hiyampemi, achinemi ngo tungkupmi, Judah ngo Jerusalem lo küxümiqo kümtsü noke.

³³ Panongu ye agi kumono azübou kughope I tsüe. I no tamo mithe panongu shika anamu panongu no I kükütsütsa lumoe.

³⁴ Panongu no I je lono ku keu ki shikitiqe nike aphikümqhüpu julho ghopeqhi.

³⁵ Panongu no Hinnom Nu Khila lo Baal ghenguno qhemghai ke-a mlape qhi, I no azah tsümo momu I kükümsü lomu iloghimo keu Molekh lhou lau panongu tianuliqo pesü aghashi, hitoi aphikümqhüpu shikeu lono Judah pelo axine shipeke.

Panongu no Iw Timi Shini

³⁶ “Tighenguno mishighüna khipau ghenguno nongu no, ‘Ti ye azütakikihi, püqümiye, eno püsa ghenguno pesü Babylon kükau tsüvae,’ ipi ani keno, itehi Ampeu, Israel Lhou no ishi piani:

³⁷ Julo, I no I mlokighide, I loghu eno axukighide lono hapupove keqo aghakhu kümtsü lono xukumqo nani, eno I no panongu pelo sükusho lono xülupe nani.

³⁸ Panongu no Iw timi shive nani, eno I no panongu Lhou shinani.

³⁹ I no amlo lakhi eno alaghi lakhi panoqo tsü nani, tishianguno panongu no alholo I sümsa nani, ti ye panongu eno pano tianuli kivipu ghenguno eno pano thiu atilimi ghengu ghike.

⁴⁰ I no panongu sasü lhokta puloshoqhi shinani, Ni ye panongu kivipu kümla shini keu lono tsüghüve monani. Panongu mlo lo I sümsani keu I no sütsü nani, ikehu panongu ye I launo tsüghüve monani.

⁴¹ I no pano ghenguno akivi shitsü keu lo alovi nani, I mlo eno I ngulho kuchopu süno panongu pesü ayeghi hipau lo pükhükulu shi shosü nani.

⁴² “Ampeu no ishi piani: I no amhekiqi kije hijeje timi hipaqo shou süghike toi I no pano lau tushoqhi püakeu ngukümgha kümtsü panongu lau süghitsü nani.

⁴³ Ayeghi hipau lo alu qhüchilelu nani, tipa ghenguno nongu no pike, ‘Hi ye pighive no timi na tüghashi mu kühavae; Chaldeami u lo süve tsüae.’

⁴⁴ Pisa pesü aluza qhülu nani, Benjamin yeghi lo eno Jerusalem hokümxa lo, Judah mishighünaqo lo eno atoghi lo mishighünaqo lo, Shephelah mishighünaqo lo, eno Negeb lo mishighünaqo lo ayeghi küqhü xakütha shipe qhinani eno jemchi ngo thopi shipe qhinani, kughengu I no pano kinigha tsüchile nani, ipi Ampeu no sheshu.”