JEREMIYA 31 - Sumi Naga CL (Re-edited) Bible (BSI)

Akumlo lono Alovive nani

¹ “Ampeu no sheshu, tipa ghuloki lo I no Israel lagha kümtsü Lhou shive nani, eno panongu no Iw timi shive nani.”

² Ampeu no ishi piani: “Khunono azütakikihi lono xülu keno asayeqha lo küpükini ithulue; Israelmi no akulhokiqhi phuighi kelo,

³ Ampeu no putou no ni lau ipeghi piye. I no lhokta kikimiye pesü o kimiye; tighenguno I no ishokibe o lau pükhükulu shike.

⁴ I no itaghi o shiqheni, eno o pesü shiqheve nani, O amikuchou Israel! Itaghi nono amqübo ikhipe alokivimi kighilhe shinani.

⁵ Itaghi Samaria naghutoqo lo nono atsaibo shosü nani; alukichimi no axathibo shosü eno axathi xochulu nani.

⁶ Ephraim ghakhu lo akhemi no ku keu tsala ighi nani: ‘Ithulo, ningu Zion lo Ampeu ni Lhou lau iqhoni nolo.’”

⁷ Kughengu Ampeu no ishi piani: “Jacob ghenguno igha ale phelo, eno shiye tomi ghenguno ighamku lo; asheshu lo, akishe tsüno pilo, ‘O Ampeu, Ow timi Israelmi ghükulumi xalulo.’

⁸ Julo, I no ahuu ghakhu lono panongu saghi nani eno ayeghi shekha lono panoqo hekütsü nani, panongu gholo anhechemi ngo apukhu kinitave kemi, mishipu akemi totimi eno punu niye akemi, aqo kije küqhano hile ideighi nani.

⁹ Panongu no qasü ighi nani, I no panoqo saghi kelo kimiye tsü penike qhüiniju nani, I no panongu sasü aghoki phivi lono chewu nani, panongu no akümzü la lo küpxamo no wunani, kughengu Ni ye Israel Papu eno Ephraim ye I nu anoghiu ke.

¹⁰ “Ampeu tsa inilo, O shiyeqo, eno putou azüghimkü lo küami vilo sheshulo; ‘Khuu no Israelmi kuthole keno Pa no xukumqo nani, eno ambekheu no aloji khe aketoi pano khekuto nani’ ipilo.

¹¹ Kughengu Ampeu no Jacob xachile luvae eno pano nguno akumtomi u lono pa qhüchile luvae.

¹² Panongu no Zion toghi lono ale phesü ighi nani, Ampeu kivi ghenguno panongu no alovi nani, athi, atsaizü eno thazü ghenguno, pichepighi ghenguno alovi nani; pano küxü ye azü no pütsü keu ghutu toi nani, panongu ye amlosa kithemae.

¹³ Tile ilimiqo no alovi ilhe nani, apumi eno layemi no alovi nani. I no pano mloghuju pesü alokivi lo süvetsü nani; I no pano lokughuno tsü, amloksa theli lo alokiqi tsü nani.

¹⁴ I no pofushi achinemi ghapiqitsü nani, eno Iw timiqo no I kivi ghenguno aghakiqi shinani, ipi Ampeu no sheshu.”

¹⁵ Ampeu no ishi piani: “Ramah lo asütsa chilu, akumlo eno kukhukimji küqa. Rachel no li tianuliqo ghenguno qa ani; alovekughuno tsüni keu milivae, kughengu panongu ye kühavae.”

¹⁶ Ampeu no ishi piani: “O küqa ghügha tavelo, eno o nhezü kipiji tavelo, kughengu o kümla jume ani, ipi Ampeu no sheshu, eno panongu ye aghümi yeghi lono ideighi nani.

¹⁷ O ghenguno hithiu lajupu ani, ipi Ampeu no sheshu, eno o tianuliqo ye pano ghakhu lo ideighi nani.

¹⁸ Ephraim mloghuju I no chiluvae, ‘Nono I sakiyi, eno ni ye qophe mphi keu mishiti toi ghasü luvae; I sachile ighilo eno ni ye athoputho luve nani, kughengu No ye I MPEU eno I Lhou ke.

¹⁹ Ni ye itsü wuve kemu xaide luvae, eno I kütsüluve kethiu ye I no I lukobo lo hepukuvae; Ni ye kujove eno I shikuchunive, kughengu ni ye I lhothe lo kukujopu xapu ani.

²⁰ Ephraim ye I nu I qhuu I no kimiye chekeu ke kumo? Kughengu I no ghuthu khije pa lachile pini keno tijehi pa kümsülu acheni. Ikehu I mlo no pa laju acheni; Ni ye kuchou no pa kimiyekütü anani, ipi Ampeu no sheshu.

²¹ “Ala lo amchipu shipe qhilo; o ghenguno kichekütsü mlalo; nono khipa la lono wuve keno alaghila jukimchi pe qhivelo. Ideighilo, O amikuchou Israel, ow mishighünaqo lo ideighilo.

²² O aküpülü kükühau atotiu, no ye khitohi künachoni kea? Kughengu Ampeu no ayeghi lo thime kithe lhophevae: totimi kiptimi süho luve nani.”

²³ Aqokitikhi MPEU, Israel Lhou no ishi piani: “I no panongu kinigha athoputho tsükelo, panongu no itaghi ghuthu lakhi atsa hipaqo Judah yeghi eno mishighünaqo lo peitha nani: “‘O achipiu mikucho ghüna, O akimthe toghi, Ampeu no o kümghatsü peniu!’

²⁴ Judah eno mishighünaqo ngo alukichimi eno ambe loji sasü itsü chekemi no kümtsa tile xünani.

²⁵ Kughengu I no qeinaive kemi eno kulhokughomi ghapiqi tsüno aghüthi püxütsü nani.”

²⁶ Ikelo I no idathughi no jukelo I ni ye aloponyi züuve aghi.

²⁷ “Julo, Ampeu no sheshu, I no Israel ngo Judah kibo lo timi xüthi eno tüghashi xüthi pesü xusüni keu tsala cheni.

²⁸ Hitoi shinani, I no panongu nhüve, peve, xaleqhive, kütsaleve, eno aghüzapu süghi keu shou khekuto ketoi, I no panongu khekuto no shiqhe eno shosü tsünani ipi Ampeu no sheshu.

²⁹ Tipa ghuloki lo panongu ye ishi pimoae: “‘Apunoqo no atsaithi kiqhi chuve, eno atianuliqo no ahu müqüe.’

³⁰ Ikemu kümtsü no pütüta xine ghenguno thinani. Khuu no atsaithi kiqhi chuni keno pa no ahu müqü nani.

Puloshoqhi Kithe

³¹ “Julo, Ampeu no sheshu, I no Judah kibo sasü puloshoqhi kithe shini keu tsala cheni,

³² ti ye I no Egypt yeghi lono pano puasüqo au lono sünhe sapeghike tsala lono puloshoqhi shikeu toimo nani, kughengu I no panongu kimi shi anamu panongu no Iw puloshoqhi tipau kubove ke.

³³ Tithiu I no itehi Israel kibo sasü puloshoqhi shini keu ye hike, Ampeu no sheshu: I no I yezah panongu lolo sütsüni, panongu mlo lo yesü tsüni. I no panongu Lhou shinani eno panongu no Iw timi shinani.

³⁴ Khunomu pa kisüghüu vilo eno pa thiküzüu vilo, ‘Ampeu ithilo,’ ipi moae, kughengu panongu dolo akitilau lono akijeu kutolo kümtsü no Ni ithi nani, ipi Ampeu no sheshu. I no panoqo kipimi qhivetsü nani, eno Ni ye panongu xine kümsüchilelu tsümo nani.”

³⁵ Ampeu no ishi piani, khuu no puchou khetsünhe küvü tsü eno aqhi ngo ayepuqo ghope putho lo aküvü tsücheni, khuu no azüghi zü xukutho no ighape cheni keno, Pa je ye aqokitikhi MPEU ke.

³⁶ “Akikithi hipau no I zülono hauve aye, Ampeu no sheshu, tithiu likhino Israel lagha ye alholo ghenguno shiye kumovae pilu nani.”

³⁷ Ampeu no ishi piani: “Atsütsü mighilu eno ayeghi boqha lheilo tolu cheghike aye, Ni ye Israel lagha no mlave keu ghenguno ikhive aghini cheke, ipi Ampeu no asheshu.”

³⁸ “Julo, Ampeu no sheshu, Hananel Qoghe lono Acheku Khagho kutolo Ampeu ghenguno mishighüna shiqhe kitheni keu tsala cheni.

³⁹ Akimghipu kighi ye müzüchoi Gareb toghi kutolo wunani, tileno tsüghüsü Goah tonani.

⁴⁰ Akithi kumo khila eno ayevu pele chekeu kümtsü, eno aluza lono Kidron ghokiti, kipelau Khurshi Khagho cheku kutolo, Ampeulau akimthe shinani. Mishighüna ye alholo ghenguno nhüve momu kütsaleve moae.”